ନୂଆଦିଲ୍ଲୀ, ୩୧।୩-
ଅନ୍ତର୍ଜାତୀୟ ଅଲିମ୍ପିକ୍ କମିଟି(ଆଇଓସି) ପକ୍ଷରୁ ଟୋକିଓ ଅଲିମ୍ପିକ୍ସ ପାଇଁ ନୂଆ ତାରିଖ ଘୋଷଣା ପରେ ଭାରତୀୟ ମହିଳା ଓ ପୁରୁଷ ହକି ଦଳ ସେହି ଅନୁସାରେ ନିଜକୁ ପ୍ରସ୍ତୁତ କରିବା ପାଇଁ ସଜବାଜ ହୋଇଛି। ନୂଆ ତାରିଖ ଅନୁସାରେ ଟୋକିଓ ଅଲିମ୍ପିକ୍ସ ୨୦୨୧ ଜୁଲାଇ ୨୩ରୁ ଅଗଷ୍ଟ ୮ ପର୍ଯ୍ୟନ୍ତ ଅନୁଷ୍ଠିତ ହେବ। ଏଥିପାଇଁ ୧୫ ମାସ ସମୟ ଥିବାବେଳେ ଉଭୟ ଦଳର କୋଚ୍ ଓ ସପୋର୍ଟ ଷ୍ଟାଫ୍ଙ୍କ ସହିତ ଆଲୋଚନା କରି ହକି ଇଣ୍ଡିଆ ପକ୍ଷରୁ ଆକ୍ସନ ପ୍ଲାନ ଆରମ୍ଭ ହେବାକୁ ଯାଉଛି। ” ଆସନ୍ତା ବର୍ଷ ଅଲିମ୍ପିକ୍ସ ନୂଆ ତାରିଖକୁ ଆମେ ଅପେକ୍ଷା କରିଥିଲୁ। ଏବେ ସମୟ ମିଳିଥିବାରୁ ଆମେ ଯୋଜନାବଦ୍ଧଭାବେ ପ୍ରସ୍ତୁତ ହେବୁ। ଆମେ ଯୋଗ୍ୟତା ଅର୍ଜନ କରିଥିବାରୁ ଏବେ କେବଳ ଅଲିମ୍ପିକ୍ସ ଉପରେ ଲକ୍ଷ୍ୟ ରହିବ। ଆମେ ଭାରତୀୟ ଅଲିମ୍ପିକ୍ ଆସୋସିଏଶନ(ଆଇଓସି), କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରଣାଳୟ, ସ୍ପୋଟ୍ସ ଅଥରିଟି ଅଫ ଇଣ୍ଡିଆ ସହିତ ଆମେ ଆଗାମୀ ୧୫ ମାସଧରି କାମ କରିବୁ। ଅଲିମ୍ପିକ୍ସରେ ଭାରତୀୟ ଦଳ ଯେପରି ସଫଳ ହୋଇପାରିବ ତା ଉପରେ ମୁଖ୍ୟତଃ ନଜର ରହିବ। ବର୍ତ୍ତମାନ ପରିସ୍ଥିତିରେ କେଉଁ ପ୍ରତିଯୋଗିତା ଆମପାଇଁ ଉପଲବ୍ଧ ହେବ ତାହା ଜାଣିବା କଷ୍ଟକର। ତେବେ ଆମର ଉଭୟ ଦଳ ବେଙ୍ଗାଲୁରୁଠାରେ ସୁରକ୍ଷିତ ପରିବେଶରେ ରହିଛନ୍ତି। କୋଚ୍ ଓ ସପୋର୍ଟ ଷ୍ଟାଫ୍ ମଧ୍ୟ ସେଠାରେ ରହିଛନ୍ତି। ଆମକୁ ଅନୁମତି ମିଳିଲେ ଖେଳାଳିମାନେ ପ୍ରକୃତ ଟ୍ରେନିଂକୁ ଫେରିବେ“ ବୋଲି ହକି ଇଣ୍ଡିଆ ସଭାପତି ମହମ୍ମଦ ମୁସ୍ତାକ ପ୍ରକାଶ କରିଛନ୍ତି।
ଭାରତୀୟ ପୁରୁଷ ହକି ଦଳର କୋଚ୍ ଗ୍ରାହାମ ରିଡ୍ଙ୍କ ମତରେ ଟୋକିଓ ଅଲିମ୍ପିକ୍ସ ପାଇଁ ନୂଆ ତାରିଖ ଧାର୍ଯ୍ୟ ହୋଇଥିବାରୁ ଆମେ ଆସନ୍ତା ବର୍ଷ ଜୁଲାଇକୁ ଦୃଷ୍ଟିରେ ରଖି ଯୋଜନା ପ୍ରସ୍ତୁତ କରିବୁ। ସାମ୍ପ୍ରତିକ କଠିନ ପରିସ୍ଥିତିକୁ ପଛରେ ପକାଇ ଆମେ ଯଥା ସମ୍ଭବ ଶୀଘ୍ର ଟ୍ରେନିଂପାଇଁ ପଡ଼ିଆକୁ ଓହ୍ଲାଇବୁ ବୋଲି ଆଶା ରଖିଛୁ। ପ୍ରତିଯୋଗିତା ସ୍ଥଗିତ ରହିବାଦ୍ୱାରା ଦଳପାଇଁ ଅନେକ କିଛି କରିବାକୁ ସମୟ ମିଳିଲା ବୋଲି ସେ କହିଛନ୍ତି। ଅନ୍ୟପକ୍ଷରେ ”ଅଲିମ୍ପିକ୍ସ ପାଇଁ ନୂଆ ତାରିଖ ଆମ ସମସ୍ତଙ୍କ ପାଇଁ ଖୁସି ଖବର। ଆମେ ଏଥର ଅଲିମ୍ପିକ୍ସ ଲକ୍ଷ୍ୟରେ ଅଗ୍ରସର ହେବୁ। କଠିନ ପରିସ୍ଥିତିରେ ଆମେ ଗୋଟିଏ ସ୍ଥାନରେ ରହି ସମସ୍ତଙ୍କ ପାଇଁ ଉପଲବ୍ଧ ହେଉଥିଲୁ। ଏବେ ଆମକୁ ସମୟ ଅନୁସାରେ ଗତି କରିବାକୁ ହେବ। ଉଭୟ ଶାରୀରିକ ଓ ମାନସିକଭାବେ ଦୃଢ଼ ରହିବା ସହ ସ୍ବାଭାବିକ ରୁଟିନକୁ ଫେରିବା ପାଇଁ ଅପେକ୍ଷା କରିବାକୁ ପଡ଼ିବ। ଆମେ ମୁଖ୍ୟ ସ୍ରୋତକୁ ଫେରିବାକୁ ପ୍ରସ୍ତୁତ“ ବୋଲି ଭାରତୀୟ ମହିଳା ହକି ଦଳର ମୁଖ୍ୟ କୋଚ୍ ଜୋର୍ଡ ମାରିଜନେ ପ୍ରକାଶ କରିଛନ୍ତି। ପ୍ରକାଶଯୋଗ୍ୟ ଯେ, ଭାରତର ଉଭୟ ମହିଳା ଓ ପୁରୁଷ ଦଳର କୋର୍ ଖେଳାଳିମାନେ ଏବେ ବେଙ୍ଗାଲୁରୁସ୍ଥିତ ସାଇ ସେଣ୍ଟରରେ ରହିଛନ୍ତି। ପ୍ରକାଶ ଯୋଗ୍ୟ ଯେ ୨୦୨୧ ଜୁଲାଇ ୨୩ରୁ ଅଗଷ୍ଟ ୮କୁ ଅଲିମ୍ପିକ୍ସର ନୂଆ ତାରିଖ ଧାର୍ଯ୍ୟ କରାଯାଇଛି।
