ଢାକା, ୧୬।୪- ଆସନ୍ତା ମେ ୩୦ରୁ ଇଂଲଣ୍ଡରେ ଆରମ୍ଭ ହେବାକୁ ଥିବା ଆଇସିସି ବିଶ୍ୱକପ୍ର ଦ୍ୱାଦଶ ସଂସ୍କରଣ ଲାଗି ମଙ୍ଗଳବାର ବାଂଲାଦେଶ ଦଳ ଘୋଷଣା କରାଯାଇଛି। ଅଭିଜ୍ଞ ଦ୍ରୁତ ବୋଲର ମାଶ୍ରାଫି ମୋର୍ତାଜାଙ୍କ ନେତୃତ୍ୱରେ ଘୋଷିତ ୧୫ ଜଣିଆ ଦଳରେ ନୂଆମୂହଁ ଭାବେ ଦ୍ରୁତ ବୋଲର ଆବୁ ଜାୟେଦଙ୍କୁ ସ୍ଥାନ ମିଳିଛି। ୨୫ବର୍ଷୀୟ ଡାହାଣହାତୀ ବୋଲର ଜାୟେଦ ଗତବର୍ଷ ଜାତୀୟ ଦଳ ପକ୍ଷରୁ ଟେଷ୍ଟ ପଦାର୍ପଣ କରିଥିଲେ। ସେ ବର୍ତ୍ତମାନ ସୁଦ୍ଧା ୩ ଟି୨୦ ମ୍ୟାଚ୍ ମଧ୍ୟ ଖେଳିଛନ୍ତି। ତେବେ ସେ ବିଶ୍ୱକପ୍ ଅବସରରେ ଦିନିକିଆ କ୍ୟାରିୟର ଆରମ୍ଭ କରିବାର ସମ୍ଭାବନା ରହିଛି। ସେହିଭଳି ମୋର୍ତାଜାଙ୍କୁ ସହାୟତା ଲାଗି ବରିଷ୍ଠ ଅଲ୍ରାଉଣ୍ଡର ଶାକିବ ଅଲ୍ହାସାନଙ୍କୁ ଦଳର ଉପଅଧିନାୟକ ଦାୟିତ୍ୱ ପ୍ରଦାନ କରାଯାଇଛି। ବ୍ୟାଟ୍ସମ୍ୟାନ ମୋସାଡେକ ହୋସେନ ମଧ୍ୟ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି। ଶେଷଥର ପାଇଁ ଗତ ସେପ୍ଟେମ୍ବରରେ ଅନୁଷ୍ଠିତ ଏସିଆନ୍ କପ୍ରେ ସେ ଜାତୀୟ ଦଳ ପକ୍ଷରୁ ପ୍ରତିନିଧିତ୍ୱ କରିଥିଲେ। ବିଶ୍ୱକପ୍ ପରି ବଡ଼ ଟୁର୍ନାମେଣ୍ଟ ହୋଇଥିବାରୁ ଦଳରେ ଅଭିଜ୍ଞ ଖେଳାଳିଙ୍କୁ ଅଧିକ ଗୁରୁତ୍ୱ ଦିଆଯାଇଛି ବୋଲି ବାଂଲାଦେଶ କ୍ରିକେଟ ଚୟନ କମିଟିର ମୁଖ୍ୟ ମିନହାଜୁଲ ଆବେଦିନ କହିଛନ୍ତି। ଜୁନ ୨ରେ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚ୍ ଖେଳି ବାଂଲାଦେଶ ବିଶ୍ୱକପ୍ରେ ଏହାର ଅଭିଯାନ ଆରମ୍ଭ କରିବ।
ବାଂଲାଦେଶ ବିଶ୍ୱକପ୍ ଦଳ: ମାଶ୍ରାଫି ମୋର୍ତାଜା (ଅଧିନାୟକ), ତାମିମ ଇକବାଲ, ଲିଟନ ଦାସ, ସୌମ୍ୟ ସର୍କାର, ମୁଶଫିକର ରହିମ୍ (ଉଇକେଟ୍କିପର), ମହମ୍ମଦୁଲ୍ଲା ରିୟାଦ, ଶାକିବ ଅଲ୍ ହାସାନ, ମହମ୍ମଦ ମିଥୁନ, ସବିର ରହମନ, ମୋସାକେ ହୋସେନ, ମହମ୍ମଦ ସୈଫଉଦ୍ଦିନ, ମେହିଦୀ ହାସାନ, ରୁବେଲ ହୋସେନ, ମୁସ୍ତାଫିଜୁର ରେହମାନ ଓ ଆବୁ ଜାୟେଦ।
