ମୁମ୍ବାଇ,୨୮।୯: ଆଇଏନ୍ଏସ୍ ଖଣ୍ଡେରୀକୁ ଭାରତୀୟ ନୌସେନାରେ ସାମିଲ୍ କରାଯାଇଛି। ଏହାଦ୍ୱାରା ଭାରତର ପ୍ରତିରକ୍ଷା ଶକ୍ତି ବୃଦ୍ଧି ପାଇବ ବୋଲି କୁହାଯାଉଛି। ଖଣ୍ଡେରୀକୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ମୁମ୍ବାଇଠାରେ ନୌସେନାରେ ସାମିଲ୍ କରିଛନ୍ତି। ସମୁଦ୍ରରେ ଗଭୀର ପାଣି ତଳେ ୧୨ ହଜାର କିମି ଯାତ୍ରା କରିବାର କ୍ଷମତା ଆଇଏନ୍ଏସ୍ ଖଣ୍ଡେରୀର ରହିଛି। ଏହାକୁ ନୌସେନାରେ ସାମିଲ୍ କରି ରାଜନାଥ ସିଂ କହିଛନ୍ତି ଯେ, ଏହାଦ୍ୱାରା ଆବଶ୍ୟକ ପଡ଼ିଲେ ପାକିସ୍ତାନକୁ ଉଚିତ ଜବାବ ଦିଆଯାଇ ପାରିବ। ଆଇଏନ୍ଏସ୍ ଖଣ୍ଡେରୀରେ ୩୬୦ ବ୍ୟାଟେରୀ ସେଲ୍ ରହିଛି। ପ୍ରତି ସେଲ୍ର ଓଜନ ୭୫୦ କିଲୋଗ୍ରାମ୍। ଏହା ସହିତ ଏଥିରେ ୧୨୫୦ କେଡବ୍ଲ୍ୟୁ ଡିଜେଲ୍ ଇଞ୍ଜିନ୍ ରହିଛି। ଏହା ଏକକାଳୀନ ୪୫ ଦିନ ଧରି ଯାତ୍ରା କରିବାକୁ ସକ୍ଷମ। ଏହି ବ୍ୟାଟେରୀ ସହାୟତାରେ ଆଇଏନ୍ଏସ୍ ଖଣ୍ଡେରୀ ଏକକାଳୀନ ୧୨ ହଜାର କିମି ଯାତ୍ରା କରିପାରିବ। ଗଭୀର ସମୁଦ୍ରରେ ୩୫୦ ମିଟର ତଳେ ଥିବା ଏହା ଶତ୍ରୁଙ୍କୁ ଏହା ସନ୍ଧାନ କରିପାରିବ। ଏହା ସର୍ବାଧିକ ୨୨ ନୋଟସ୍ ଗତିରେ ଯାତ୍ରା କରିବାକୁ ସକ୍ଷମ।
