ବ୍ରହ୍ମପୁର ଅଫିସ,୩୧ା୩-କରୋନା ସଂକ୍ରମଣକୁ ପ୍ରତିରୋଧ କରିବା ନେଇ ଜିଲାପ୍ରଶାସନ ପକ୍ଷରୁ ଲକ୍ଡାଉନ୍ ଜାରି ରହିଛି। ଏହାର ପ୍ରଭାବରେ ବ୍ରହ୍ମପୁରରେ ରାଜ୍ୟ ବାହାରୁ ଆସି ଫସି ରହିଥିବା ଏବଂ ସହରରେ ଜୀବନ ଜୀବିକା ପ୍ରଭାବିତ ଯୋଗୁ ଅସହାୟ, ଅନାହାରରେ ଦିନ କାଟୁଥିବା ଲୋକଙ୍କୁ ଶୁଖିଲା ଖାଦ୍ୟ ଯୋଗାଇବା ନେଇ ବିଏମ୍ସି ପକ୍ଷରୁ ପ୍ରୟାସ ଆରମ୍ଭ ହୋଇଛି। ସହରର ବିଭିନ୍ନ ବସ୍ତିଅଞ୍ଚଳ ସମେତ ସହରର ବିଭିନ୍ନ ସ୍ଥାନରେ ବାହାରୁ ଆସି ଅଟକି ରହିଥିବା ଅସହାୟଙ୍କୁ ରାଶନ ସାମଗ୍ରୀ ବଣ୍ଟନ ପ୍ରକ୍ରିୟା ଆରମ୍ଭ ହୋଇଛି। ବ୍ରହ୍ମପୁର ବିଭିନ୍ନ ବ୍ୟବସାୟୀକ ସଂଗଠନ ଓ ସାମାଜିକ ସଂଗଠନ ସହଯୋଗରେ ବିଏମ୍ସି ପକ୍ଷରୁ ବିଭିନ୍ନ ବସ୍ତି ଅଞ୍ଚଳରେ ଥିବା ଗରିବ ପରିବାରଙ୍କୁ ୧୦ ଦିନର ରାଶନ ସାମଗ୍ରୀ ବଣ୍ଟନ ନେଇ କାର୍ଯ୍ୟକ୍ରମ ଆରମ୍ଭ ହୋଇଛି। ମଙ୍ଗଳବାର ଲେପ୍ରୋସି କଲୋନୀରେ ଥିବା ୨୫୦ ପରିବାରଙ୍କୁ ୧୦ ଦିନ ପାଇଁ ଚାଉଳ, ଡାଲି, ତେଲ, ଅଟା ଓ ସୁଜି ଆଦି ରାଶନ ସାମଗ୍ରୀ ପ୍ରଦାନ କରାଯାଇଥିବା ସୂଚନା ମିଳିଛି। ଲକ୍ ଡାଉନ ସମୟ ଅବଧି ମଧ୍ୟରେ ୪୦ ହଜାର ଅସହାୟ, ଗରିବଙ୍କୁ ରାଶନ ସାମଗ୍ରୀ ବଣ୍ଟନ କରାଯିବାକୁ ଯୋଜନା ରହିଥିବା ନେଇ ବିଏମ୍ସି ପକ୍ଷରୁ ସୂଚାଯାଇଛି।
