ନୂଆଦିଲ୍ଲୀ,୨୬।୪(ପି.ଟି.)- ରବିଚନ୍ଦ୍ରନ ଅଶ୍ୱିନ ଭାରତର ଶ୍ରେଷ୍ଠ ସ୍ପିନର ବୋଲି ପାକିସ୍ତାନ ପୂର୍ବତନ ସ୍ପିନର ସାକଲିନ୍ ମୁସ୍ତାକ କହିଛନ୍ତି। ଟେଷ୍ଟରେ ସେ ଆଶତୀତ ସଫଳତା ଅର୍ଜନ କରିଛନ୍ତି। ତେବେ ତାଙ୍କୁ ସୀମିତ ଓଭର କ୍ରିକେଟ ଅର୍ଥାତ୍ ଦିନିକିଆ ଓ ଟି୨୦ ଫର୍ମାଟରୁ କାହିଁକି ଦୂରେଇ ରଖାଯାଉଛି ତାହା ବୁଝି ହେଉନି ବୋଲି ସେ କହିଛନ୍ତି। ଅଶ୍ୱିନ ନିୟମିତ ଭାବେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଖେଳୁଥିଲେ ମଧ୍ୟ ୨୦୧୭ ପରଠାରୁ ତାଙ୍କୁ ସୀମିତ ଓଭର ଫର୍ମାଟରେ ଖେଳାଯାଉ ନାହିଁ। ରବୀନ୍ଦ୍ର ଜାଡେଜା ମଧ୍ୟ ସମାନ ସ୍ଥିତିର ସମ୍ମୁଖୀନ ହୋଇଥିଲେ। ତେବେ ଅଲରାଉଣ୍ଡର ହୋଇଥିବାରୁ ସେ ଏବେ ୩ଟି ଯାକ ଫର୍ମାଟରେ ଖେଳୁଛନ୍ତି।
ଫିଙ୍ଗର ସ୍ପିନର ହୁଅନ୍ତୁ ବା ଜଣେ ରିଷ୍ଟ ସ୍ପିନର ଜଣଙ୍କ ସଫଳତା ହେଉଛି ଚରସ୍ଥାୟୀ। ଜଣକର ପ୍ରତିଭା ଓ କ୍ରିକେଟକୁ ବୁଝିବାର କ୍ଷମତା ହିଁ ଜଣକୁ ମହାନ ଖେଳାଳି ଭାବେ ଗଢି ତୋଳିଥାଏ। ତେଣୁ ଅଶ୍ୱିନ୍ଙ୍କ ପାଖରେ ଏହି ସବୁ ଗୁଣ ଥିଲେ ମଧ୍ୟ ତାଙ୍କୁ ଦିନିକିଆ ଓ ଟି୨୦ରୁ ବାଦ ଦେବା ଆଶ୍ଚର୍ଯ୍ୟଜନକ ବୋଲି ସାକ୍ଲିନ୍ କହିଛନ୍ତି। ଟେଷ୍ଟ ଫର୍ମାଟରେ ସେ ଆଗଧାଡିର ବ୍ୟାଟ୍ସମ୍ୟାନଙ୍କୁ ଆଉଟ କରିଛନ୍ତି। ଏହା ଦିନିକିଆ କ୍ରିକେଟ ତୁଳନାରେ ଅଧିକ କଷ୍ଟକର। ତେଣୁ ଅଶ୍ୱିନଙ୍କୁ ଶ୍ରେଷ୍ଠ ସ୍ପିନର ବୋଲି କୁହାଯାଇପାରେ।
ତେବେ ବିବିଧତା କାରଣରୁ ଚୟନକର୍ତ୍ତାମାନେ ଦୁଇ ରିଷ୍ଟ ସ୍ପିନର କୁଲଦୀପ ଯାବ ଓ ୟୁଜବେନ୍ଦ୍ର ଚହଲଙ୍କୁ ଅଧିକ ପସନ୍ଦ କରୁଛନ୍ତି। ୨୦୧୭ ଚାମ୍ପିୟନ୍ସ ଟ୍ରଫି ପରେ ଏପରି ଲକ୍ଷ୍ୟ କରାଯାଉଛି। ଦିନିକିଆରେ ଏହି ଦୁଇ ବୋଲର ନିଜକୁ ପ୍ରତିଷ୍ଠିତ କରାଇଛନ୍ତି। କିନ୍ତୁ ୨୦୧୯ ବିଶ୍ୱକପ୍ରେ ଦୁଇଜଣଙ୍କୁ ଏକାଠି ଖେଳିବାର ଦେଖାଯାଇନାହିଁ। ଅବଶ୍ୟ ବିଦେଶ ଅପେକ୍ଷା ଘରୋଇ ପରିବେଶରେ ଅଶ୍ୱିନ ଅପେକ୍ଷାକୃତ ଅଧିକ ସଫଳ ରହିଛନ୍ତି। ଅନ୍ୟତମ ସ୍ପିନର ହରଭଜନ ସିଂଙ୍କୁ ମଧ୍ୟ ସମାନ ଢଙ୍ଗରେ ଅଣଦେଖା କରାଯାଇଥିଲା। ତେଣୁ ସୀମତ ଓଭରରେ ଅଶ୍ୱିନଙ୍କୁ ପୁଣି ଖେଳାଇବାର ଆବଶ୍ୟକତା ରହିଛି। ଭାରତ ଓ ପାକିସ୍ତାନ ମଧ୍ୟରେ ପୁଣି ଦ୍ୱିପାକ୍ଷିକ ସିରିଜ ଖେଳାଯିବାର ଆବଶ୍ୟକତା ରହିଛି ବୋଲି ସେ ମତ ଦେଇଛନ୍ତି।
