ଗୁଆହାଟୀ,୪ା୧ (ପି.ଟି.): ଏଠାରେ ରବିବାର ଖେଳାଯିବାକୁଥିବା ଶ୍ରୀଲଙ୍କା ବିପକ୍ଷ ଟି୨୦ ପାଇଁ ଶନିବାର ଭାରତୀୟ କ୍ରିକେଟ ଦଳର ଖେଳାଳିମାନେ ଅଭ୍ୟାସ କରିଛନ୍ତି। ଏହି ସମୟରେ ଅଧିନାୟକ ବିରାଟ କୋହଲିଙ୍କ ବାମହାତ କାଣି ଆଙ୍ଗୁଠିରେ ଆଘାତ ଲାଗିଛି। ପ୍ରାକ୍ଟିସ ସେସନର ପ୍ରଥମାର୍ଦ୍ଧରେ ଏହି ଘଟଣା ଘଟିଛି। ଟିମ୍ ଫିଜିଓ ନୀତିନ ପଟେଲ ତୁରନ୍ତ କୋହଲିଙ୍କ ନିକଟକୁ ଯାଇ ମ୍ୟାଜିକ୍ ସ୍ପ୍ରେ ବ୍ୟବହାର କରିଥିଲେ। ଭାରତୀୟ ପ୍ରାକ୍ଟିସ ସେସନରେ ଅନୁପସ୍ଥିତ ରହିଥିବା ପ୍ରମୁଖ ଖେଳାଳି ହେଲେ ରାବୀନ୍ଦ୍ର ଜାଡେଜା। ୨୨ ମାସ ପରେ ଏକ ଟି୨୦ ମ୍ୟାଚରେ ଭାରତ ଓ ଶ୍ରୀଲଙ୍କା ପରସ୍ପରକୁ ଭେଟିବାକୁ ଯାଉଛନ୍ତି। ଭାରତ ନିକଟରେ ଖେଳିଥିବା ଟି୨୦ ସିରିଜରେ ୨-୧ରେ ବିଜୟ ହାସଲ କରିଥିଲା। ଅନ୍ୟପକ୍ଷରେ ଶ୍ରୀଲଙ୍କା ଅଷ୍ଟ୍ରେଲିଆଠାରୁ ୦-୩ରେ ସିରିଜ ହାରିଥିଲା। ୧୨ବର୍ଷ ପୂର୍ବେ କୋହଲିଙ୍କ ପଦାର୍ପଣ ପରଠାରୁ ଭାରତ ବିପକ୍ଷରେ ଶ୍ରୀଲଙ୍କା କୌଣସି ଫର୍ମାଟରେ ସିରିଜ ବିଜୟୀ ହୋଇପାରି ନାହିଁ, ସେମାନେ କ୍ରମାଗତ ୧୬ଟି ଗେମ୍ରେ ପରାସ୍ତ ହୋଇଛନ୍ତି। ତେବେ ୨୦୧୪ ଟି୨୦ ବିଶ୍ୱକପ୍ ଫାଇନାଲରେ ଶ୍ରୀଲଙ୍କା ଭାରତକୁ ପରାସ୍ତ କରିଥିଲା।
