ବନ୍ତ,୩୦।୩(ଡି.ଏନ୍.ଏ.): କରୋନା ପାଇଁ ରାଜ୍ୟ ସରକାର ସମସ୍ତ ବିଦ୍ୟାଳୟକୁ ଛୁଟି ଘୋଷଣା କରିଥିବା ବେଳେ ଛାତ୍ରୀଛାତ୍ରଙ୍କ ପାଇଁ ମଧ୍ୟାହ୍ନଭୋଜନ ଚାଉଳ ପ୍ରଦାନର ବ୍ୟବସ୍ଥା କରିଛନ୍ତି। ସୋମବାର ଭଦ୍ରକ ଜିଲା ବନ୍ତ ବ୍ଲକର ବିଭିନ୍ନ ବିଦ୍ୟାଳୟରେ ପ୍ରତ୍ୟେକ ଛାତ୍ରୀଛାତ୍ରଙ୍କ ଅଭିଭାବକମାନେ ବିଦ୍ୟାଳୟରୁ ଟୋକନ୍ ସଂଗ୍ରହ କରୁଥିବାର ଦେଖାଯାଇଛି। ପଳାସଗଡ଼ିଆସ୍ଥିତ ଓଡ଼ିଶା ଆଦର୍ଶ ବିଦ୍ୟାଳୟରେ ୬ଷ୍ଠରୁ ୮ମ ଶ୍ରେଣୀ ପର୍ଯ୍ୟନ୍ତ ୨୨୦ ପିଲାଙ୍କୁ ଟୋକନ୍ ଦିଆଯାଉଛି। ପ୍ରତି ପିଲା ପିଛା ୪ କିଗ୍ରା ୫୦୦ କରି ୩ ମାସ ପାଇଁ ୧୩ କିଗ୍ରା ୫୦୦ ଚାଉଳ ଦିଆଯିବା ପାଇଁ ଟୋକନ୍ ପ୍ରଦାନ କରାଯାଉଛି। ବିଭିନ୍ନ ସ୍ଥାନରୁ ଆସୁଥିବା ଅଭିଭାବକମାନଙ୍କୁ ପ୍ରଥମେ ସାନିଟାଇଜର୍ରେ ହାତ ସଫା କରିବାକୁ ଦିଆଯାଉଛି। ଭାରପ୍ରାପ୍ତ ଅଧ୍ୟକ୍ଷ ମନୋରଞ୍ଜନ ବଳ, ଶିକ୍ଷକ ରତିକାନ୍ତ ପଣ୍ଡା, ବାସୁଦେବ ପହି, ଶିକ୍ଷାକର୍ମଚାରୀ ସତ୍ୟପ୍ରିୟ ସୁଶୀଲ ନାୟକ, ଦିଲ୍ଲୀପ ମହାନ୍ତି, ଦୀପକ ମୁଖୀ ପ୍ରମୁଖ ଟୋକନ୍ ଦାୟିତ୍ୱରେ ଅଛନ୍ତି। ସେହିପରି ନିଳୋକ ହରିହର ସରକାରୀ ସଂଯୁକ୍ତ ଉପ୍ରା ବିଦ୍ୟାଳୟରେ ୧୫୦ ପିଲାଙ୍କ ପାଇଁ ଟୋକନ୍ ବ୍ୟବସ୍ଥା ହୋଇଛି। ସକାଳୁ ଅଭିଭାବକମାନେ ବିଦ୍ୟାଳୟ ପରିସରରେ ବୃତ୍ତ ଚିହ୍ନ ମଧ୍ୟରେ ଠିଆ ହୋଇ ଟୋକନ୍ ସଂଗ୍ରହ କରୁଛନ୍ତି। ପ୍ରଥମରୁ ୫ମ ଶ୍ରଣୀ ପିଲାଙ୍କୁ ଏପ୍ରିଲ୍, ମେ, ଜୁନ୍ ୩ ମାସର ୯ କିଗ୍ରା ଏବଂ ୬ଷ୍ଠରୁ ୮ମ ଶ୍ରେଣୀ ପିଲାଙ୍କୁ ୩ ମାସର ୧୩ କିଗ୍ରା ୫ଶହ ଗ୍ରାମର ଟୋକନ୍ ପ୍ରଦାନ କରାଯାଉଛି। ଟୋକନ୍ ପ୍ରଦାନରେ ଭାରପ୍ରାପ୍ତ ପ୍ରଧାନଶିକ୍ଷକ ବଟକୃଷ୍ଣ ସେଠୀ, ଶିକ୍ଷକ ନିରାକର ଜେନା, ସୁରେନ୍ଦ୍ର ପଣ୍ଡା, ରତିକାନ୍ତ ନାୟକ, ପରିଚାଳନା କମିଟିର ଅଧ୍ୟକ୍ଷ ଅଭିରାମ ଜେନା ସହଯୋଗ କରୁଛନ୍ତି।
