ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲିିଙ୍କ ଜୀବନୀ ଉପରେ ବଲିଉଡ ଚଳଚ୍ଚିତ୍ର ନିର୍ମାଣ ହେବାର ଯୋଜନା ଚାଲିଛି। ଉକ୍ତ ଚଳଚ୍ଚିତ୍ରରେ କୋହଲି ନିଜ ଭୂମିକାରେ ଅଭିନୟ କରିବାକୁ ରାଜି ଅଛନ୍ତି। ତେବେ ଏଥିପାଇଁ ସେ ଏକ ସର୍ତ୍ତ ରଖିଛନ୍ତି। ତାଙ୍କର ସର୍ତ୍ତ ହେଲା ଯେ ଉକ୍ତ ଚଳଚ୍ଚିତ୍ରରେ ସ୍ତ୍ରୀ ତଥା ବଲିଉଡ୍ର ଆଗଧାଡିର ନାୟିକା ଅନୁଷ୍କା ଶର୍ମା ଅଭିନୟ କରିବେ। ତାଙ୍କ ଉପରେ ଚଳଚ୍ଚିତ୍ର ର୍ନିମାଣ ପ୍ରସଙ୍ଗରେ କୋହଲିଙ୍କୁ ପଚାରିବାରୁ ସେ କହିଥିଲେ, ଅନୁଷ୍କାଙ୍କ ସହ ନିଶ୍ଚିତ ଭାବେ ଏପରି ଚଳଚ୍ଚିତ୍ର ମୁଁ ନିଜେ ପ୍ରସ୍ତୁତ କରିବାକୁ ରାଜି। ମୋର ବ୍ୟକ୍ତିତ୍ୱ କଦାପି ଏପରି ନ ଥିଲା। ପ୍ରତିଟି ବ୍ୟକ୍ତିଙ୍କ ମଧ୍ୟରେ ଏକ ସ୍ନେହୀ ବ୍ୟକ୍ତିତ୍ୱ ରହିଥାଏ। ତେବେ ଅନ୍ୟ ଜଣେ ବ୍ୟକ୍ତି ସର୍ବଦା ତୁମଠାରୁ ଏପରି ଗୁଣ କାଢି ପାରିଥାଆନ୍ତି। ଅନୁଷ୍କାଙ୍କୁ ଭେଟିବା ପରେ ଅନୁଭବ କରିଥିଲି ଯେ ମୁଁ ହିଁ ସବୁକିଛି ନୁହେଁ। ଅନ୍ୟ କାହା ସହ ମିଶି ତାଙ୍କ ପରି ଜୀବନ ଜିଇଁବା ଉଚିତ। ଅନୁଷ୍କାଙ୍କୁ ଭେଟିବା ପୂର୍ବରୁ ମୁଁ ବହୁତ ସ୍ବାର୍ଥପର ଥିଲି ଏବଂ ମୋତେ ସୁହାଇବା ପରି କାମ କରୁଥିଲି। ଅନୁଷ୍କାଙ୍କ ସହ ବହୁତ କଥାବାର୍ତ୍ତା କରିବା ପରେ ପରସ୍ପର ପ୍ରତି ସମ୍ମାନ ବଢିଥିଲା। ମୁଁ ଜାଣି ପାରିଥିଲି ଯେ ନିଜ ପାଇଁ ସବୁକିଛି କରିବା ଅପେକ୍ଷା ଅନ୍ୟମାନଙ୍କ ପାଇଁ ମଧ୍ୟ କିଛି କରିବା ଉଚିତ। ମୋ ଜୀବନକୁ ଆସିବା ପରେ ଅନୁଷ୍କା ମୋତେ ଏହା ଶିଖାଇଥିଲେ। ସୂଚନାଯୋଗ୍ୟ, ସଚିନ ତେନ୍ଦୁଲକର, ମହେନ୍ଦ୍ର ସିଂହ ଧୋନି, ମହମ୍ମଦ ଆଝାରୁଦ୍ଦିନ, ଧାବକ ମିଲ୍ଖା ସିଂହ, ବକ୍ସର ମ୍ୟାରୀ କମ, ମହିଳା ପହଲ୍ବାନ୍ ଗୀତା ଫୋଗତ, ହକି ଖେଳାଳି ସନ୍ଦୀପ ସିଂହଙ୍କ ପରି ନାମୀ ଖେଳାଳିଙ୍କ ଜୀବନୀ ଉପରେ ବଲିଉଡ ଚଳଚ୍ଚିତ୍ର ନିର୍ମାଣ ହୋଇଛି।
