ଚନ୍ଦ୍ରପୁର, ୧୭।୧୨ (ଡି.ଏନ୍.ଏ.) – ଗୁଣାତ୍ମକ ଶିକ୍ଷା ପାଇଁ ଅନେକ ସରକାରୀ ଯୋଜନା ରହିଛି। ସେଗୁଡିକର ଫାଇଦା କିନ୍ତୁ ସବୁଠି ମିଳୁନି। କେଉଁଠି ଆବଶ୍ୟକ ସଂଖ୍ୟକ ଶିକ୍ଷକ ନାହାନ୍ତି ତ କେଉଁଠି ଜରାଜୀର୍ଣ୍ଣ ଶ୍ରେଣୀଗୃହରେ ବିପଦସଙ୍କୁଳଭାବେ ପାଠପଢା ହେଉଛି। ଏଥିସହ ସ୍କୁଲରେ ଅନ୍ୟ ଆନୁଷଙ୍ଗିକ ସୁବିଧା ମଧ୍ୟ ନାହିଁ। ଏହାର ଏକ ଉଦାହରଣ ଦେଖିବାକୁ ମିଳିଛି ଚନ୍ଦ୍ରପୁର ସରକାରୀ ଉଚ୍ଚ ବିଦ୍ୟାଳୟରେ। ୧୯୭୬ରେ ଏହି ସ୍କୁଲ ଉଚ୍ଚ ବିଦ୍ୟାଳୟର ମାନ୍ୟତା ପାଇଛି। କିନ୍ତୁ ଏଯାବତ୍ ଏହାର ଆଖିଦୃଶିଆ ଉନ୍ନତି ହୋଇପାରିନି।
ରାୟଗଡ଼ା ଜିଲା ଚନ୍ଦ୍ରପୁର ବ୍ଲକର ସଦର ମହକୁମାରେ ରହିଛି ଶିକ୍ଷା ବିଭାଗର ଏକମାତ୍ର ସରକାରୀ ଉଚ୍ଚ ବିଦ୍ୟାଳୟ। ଏଠାରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୨୩୮ ଜଣ ଓ ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ୩୨୨ ଛାତ୍ରୀଛାତ୍ର ପାଠ ପଢନ୍ତି। କିନ୍ତୁ ୫୬୦ଜଣ ଛାତ୍ରୀଛାତ୍ରଙ୍କ ଏହି ବିଦ୍ୟାଳୟରେ ୧୨ଜଣ ଶିକ୍ଷକଙ୍କ ବଦଳରେ ରହିଛନ୍ତି ମାତ୍ର ୬ଜଣ। ୨୦୧୫ରୁ ସ୍କୁଲରେ ପ୍ରଧାନଶିକ୍ଷକ ନ ଥିବାବେଳେ ଜଣେ ସହକାରୀ ଶିକ୍ଷକ ଏହି ଦାୟିତ୍ୱ ତୁଲାଉଛନ୍ତି। ଏମାନଙ୍କ ବ୍ୟତୀତ ଏଠାରେ ହିନ୍ଦୀ ଏବଂ କ୍ରୀଡ଼ା ଶିକ୍ଷକ ଏବଂ କିରାଣି ମଧ୍ୟ ନାହାନ୍ତି। ସ୍କୁଲରେ ଥିବା ପୁରାତନ ଆଜ୍ବେଷ୍ଟସ୍ ଘରେ ପାଠପଢ଼ା ଚାଲିଛି। ତାହା ମଧ୍ୟ ଆବଶ୍ୟକ ସଂଖ୍ୟକ ନାହିଁ। ସ୍କୁଲରେ ପାଚେରି ନ ଥିବା ବେଳେ ପିଇବା ପାଣି ମଧ୍ୟ ନାହିଁ ବୋଲି ପୂର୍ବତନ ବ୍ଲକ ଅଧ୍ୟକ୍ଷ ଭୀମ ଗଗରେଙ୍ଗା ଅଭିଯୋଗ କହିଛନ୍ତି। ଗୁଣାତ୍ମକ ଶିକ୍ଷା ପାଇଁ ତୁରନ୍ତ ଶିକ୍ଷକ ନିଯୁକ୍ତି ଦାବି ହୋଇଛି। ଏଥିସହ ଅନ୍ୟ ସବୁ ସମସ୍ୟାର ସମାଧାନ କରିବାକୁ ଅଭିଭାବକମାନେ ଦାବି କରିଛନ୍ତି। ଶିକ୍ଷକ ନିଯୁକ୍ତି ନେଇ ଦାୟିତ୍ୱରେ ଥିବା ଭାରପ୍ରାପ୍ତ ପ୍ରଧାନଶିକ୍ଷକ କେଶବ ବେହେରାଙ୍କୁ ପଚାରିବାରୁ ପ୍ରତି ମାସରେ ଆମର ଦରମା ବିଲ୍ ସାଙ୍ଗରେ ଶିକ୍ଷକ ଅଭାବ ନେଇ ପ୍ରଶାସନକୁ ଜଣାଉଛୁ ବୋଲି କହିଛନ୍ତି। ପ୍ରଶାସନ ଏଥିପ୍ରତି ଦୃଷ୍ଟିଦେଇ ପଦକ୍ଷେପ ନେବା ପାଇଁ ଅଞ୍ଚଳବାସୀ ଦାବି କରିଛନ୍ତି।
