ଭୁବନେଶ୍ୱର,୯।୩(ବ୍ୟୁରୋ): ନବରାତ୍ର ହେଉ କି ହୋଲି, ଦୀପାବଳି। ଦେଶର ବିଭିନ୍ନ ପ୍ରାନ୍ତରେ ଏହି ଉତ୍ସବକୁ ଭିନ୍ନ ଶୈଳୀରେ ପାଳନ କରାଯାଉଥିବା ଦେଖିବାକୁ ମିଳିଥାଏ। ହେଲେ ବର୍ତ୍ତମାନର ଟେକ୍ନୋଲୋଜି ଓ ସୋସିଆଲ ମିଡିଆ ଯୁଗରେ ପର୍ବପର୍ବାଣିର ପାଳନ ଶୈଳୀ ଆଉ ଗୋଟିଏ ସ୍ଥାନରେ ସୀମିତ ନ ରହି ପରିବ୍ୟାପ୍ତ ହୋଇଛି। ପଶ୍ଚିମ ଭାରତର ପର୍ବପର୍ବାଣି ପୂର୍ବ ଭାରତରେ ଲୋକପ୍ରିୟ ହେଉଥିବା ବେଳେ ଉତ୍ତର ଭାରତର ଲୋକପ୍ରିୟ ଦେଶର ବିଭିନ୍ନ ସ୍ଥାନରେ ପାଳନ ହେଉଥିବା ଦେଖିବାକୁ ମିଳୁଛି। ସମଗ୍ର ଦେଶରେ ନବରାତ୍ର ଦାଣ୍ଡିଆ ଖେଳର ଲୋକପ୍ରିୟତା ଭଳି ଆଜିକାଲି ହୋଲିରେ ମଧ୍ୟ ଲଉଡି ଖେଳ ଓ ଦହିହାଣ୍ଡି ଭଙ୍ଗା ପରମ୍ପରା ଚାରିଆଡ଼େ ହେଉଥିବା ଦେଖିବାକୁ ମିଳୁଛି।
ଦିନଥିଲା ଦୋଳ ପୂର୍ଣ୍ଣିମା, ରାଧାକୃଷ୍ଣଙ୍କ ମେଳଣ ଓ ଅବିର ଖେଳର ଉତ୍ସାହ ନେଇ ଆସୁଥିଲା ହୋଲି। ରାଧାକୃଷ୍ଣ ବିମାନରେ ବୁଲି ଭୋଗ ଖାଇବାର ପରମ୍ପରା ଆଜି ବି ରହିଥିଲେ ମଧ୍ୟ ପୂର୍ବଭଳି ଉତ୍ସାହ କିନ୍ତୁ ଦେଖିବାକୁ ମିଳୁନି। ହୋଲି ପାଳନର ଶୈଳୀ ପରିବର୍ତ୍ତନ ହୋଇଛି। ଲାଇଭ୍ ଡିଜେ, ରେନ୍ ଡ୍ୟାନ୍ସ, ମଡ୍ ପୁଲ୍ରେ ହୋଲି ଖେଳ ଭଳି ନୂଆ କନ୍ସେପ୍ଟ ବର୍ତ୍ତମାନର ଯୁବପିଢିଙ୍କ ମଧ୍ୟରେ ବହୁଳଭାବେ ଆଦୃତ ହେଉଛି। ନୂଆବର୍ଷ ପାର୍ଟି ଭଳି ବିଭିନ୍ନ ଇଭେଣ୍ଟ ମ୍ୟାନେଜମେଣ୍ଟ ସଂସ୍ଥା ପକ୍ଷରୁ ସ୍ବତନ୍ତ୍ର କାର୍ଯ୍ୟକ୍ରମ ତଥା ହୋଲି ପାର୍ଟିର ଆୟୋଜନ କରାଯାଉଛି। କୃତ୍ରିମ ବର୍ଷାରେ ଧୁମ୍ଧଡ଼କ ଗୀତର ତାଳେ ତାଳେ ନାଚି କିଏ ଏହି ରଙ୍ଗର ପର୍ବରେ ଖୁସି ମନାଉଛି ତ କିଏ ମୁଲତାନି ମାଟି, ଗୋଲାପ ପାଖୁଡା, ଚନ୍ଦନ ପେଷ୍ଟ, ଲିମ୍ବ ପତ୍ର ଆଦି ପକାଯାଇ ପ୍ରସ୍ତୁତ ହେଉଥିବା ଅର୍ଗାନିକ କାଦୁଅରେ ହୋଲି ଖେଳୁଛନ୍ତି। ଅବଶ୍ୟ ଏଥର କରୋନା ଭୟରେ ହୋଲି ପାଇଁ ଆୟୋଜିତ ହେବାକୁ ଥିବା ଅଧିକାଂଶ ଇଭେଣ୍ଟକୁ ବାତିଲ କରାଯାଇଛି। କେତେକ ସ୍ଥାନରେ ଆୟୋଜକ ସଂସ୍ଥା ମାସ୍କ ପିନ୍ଧି ହୋଲି ଖେଳିବାର ବ୍ୟବସ୍ଥା ମଧ୍ୟ କରିଛନ୍ତି।
ଦହିହାଣ୍ଡି ଭଙ୍ଗା ପରମ୍ପରା
ହୋଲିରେ ଦହିହାଣ୍ଡି ଭଙ୍ଗା ହେବାର ଏକ ପରମ୍ପରା ରହିଛି। ପଶ୍ଚିମ ଭାରତର କିଛି ରାଜ୍ୟରେ ଏହି ପରମ୍ପରା ରହିଆସିଥିବା ବେଳେ ଏବେ ଓଡିଶାରେ ମଧ୍ୟ ଏହାର ଲୋକପ୍ରିୟତା ବଢିବାରେ ଲାଗିଛି। ହୋଲି ଅବସରରେ ବିଭିନ୍ନ ସ୍ଥାନରେ ଏଭଳି ଦହିହାଣ୍ଡି ଭଙ୍ଗା ପରମ୍ପରା ଦେଖିବାକୁ ମିଳୁଛି। ପୁରୁଣା ଭୁବନେଶ୍ୱର, ମଞ୍ଚେଶ୍ୱର ସମେତ ରାଜଧାନୀର କେତେକ ସ୍ଥାନରେ ଦହିହାଣ୍ଡି ଭଙ୍ଗା ଉତ୍ସବ ଅନୁଷ୍ଠିତ ହେଉଥିବା ବେଳେ ଏଥିପାଇଁ ପ୍ରସ୍ତୁତି ଚାଲିଛି।
