ଢେଙ୍କାନାଳ ଅଫିସ, ୧୮।୯-ଗଣପର୍ବ ଲକ୍ଷ୍ମୀପୂଜା ପାଇଁ ପ୍ରସ୍ତୁତ ହେଉଛି ଢେଙ୍କାନାଳ। ହେଲେ ସହରରେ ଆପରାଧିକ କାର୍ଯ୍ୟକଳାପ ରୋକିବା ଦିଗରେ ପୋଲିସକୁ ଆଖିଦୃଶିଆ ସଫଳତା ମିଳିନାହିଁ। ପାର୍ବଣ ପୂର୍ବରୁ ସହରତଳି ଅଞ୍ଚଳରେ ମଦ୍ୟପ, ଅସାମାଜିକଙ୍କ କାର୍ଯ୍ୟକଳାପ ବୃଦ୍ଧି ପାଇବାରେ ଲାଗିଛି। ଏହାକୁ ରୋକିବାକୁ ଆଗେଇ ଆସିଛି ମୀନାବଜାର କୁମ୍ଭାରସାହି ଅଞ୍ଚଳର ଦିବ୍ୟଜୋତି କ୍ଲବ୍। କ୍ଲବର ସଦସ୍ୟମାନେ ନିଜସ୍ବ ଖର୍ଚ୍ଚରେ ବିଭିନ୍ନ ସ୍ଥାନରେ ସିସିଟିଭି କ୍ୟାମେରା ଲଗାଇଛନ୍ତି। କ୍ଲବ ସଭାପତି ହୃଦାନନ୍ଦ ବେହେରାଙ୍କ କହିବା କଥା, କିଛିଦିନ ହେଲା ଅଞ୍ଚଳରେ ଅପରାଧ ବଢ଼ିବାରେ ଲାଗିଛି। ମଦ୍ୟପ, ଲୁଟେରାଙ୍କ ଉପଦ୍ରବ ଚିନ୍ତାର କାରଣ ପାଲଟିଛି। ଏ ନେଇ ପୋଲିସକୁ ଅବଗତ କରାଯାଇଥିଲା। ତଥାପି କୌଣସି ସୁଫଳ ମିଳିଲାନାହିଁ। ତେଣୁ ନିଜ ପାଇଁ ନିଜେ ନ୍ୟାୟରେ ଏହାର ସମାଧାନ କରିବାକୁ ଅଣ୍ଟା ଭିଡ଼ିଥିଲେ କ୍ଲବର ସଦସ୍ୟ। ଅଞ୍ଚଳରୁ ଅସାମାଜିକ କାର୍ଯ୍ୟକଳାପ ଉପରେ ଲଗାମ କଷିବାକୁ ସିସିଟିଭି କ୍ୟାମେରା ଲଗାଇବାକୁ ନିଷ୍ପତ୍ତି ନିଆଯାଇଥିଲା। ପ୍ରଥମ ପର୍ଯ୍ୟାୟରେ ୫ ସ୍ଥାନରେ ସିସିଟିଭି ଖଞ୍ଜାଯାଇଛି। ସମ୍ବେଦନଶୀଳ ସ୍ଥାନରେ ଆହୁରି ୩ଟି କ୍ୟାମେରା ଲଗାଯିବ ବୋଲି ସେ ସୂଚନା ଦେଇଛନ୍ତି। ଏହି କାର୍ଯ୍ୟରେ ସମ୍ପାଦକ ଅଭିମନ୍ୟୁ ବେହେରା, ସଦସ୍ୟ ଦିବ୍ୟସିଂହ ରାଉଳ, ପ୍ରିୟବ୍ରତ ଗଡ଼ନାୟକ, ଉଦୟନାଥ ବେହେରା, ବିରଞ୍ଚତ୍ ରାଉଳ, କୈଳାସ ରାଉତ, ନିତ୍ୟାନନ୍ଦ ବେହେରା, ଅନିଲ ବେହେରା, ବାବୁଲା ବେହେରା, ଟୁକୁନି ରାଉଳ, ସତ୍ୟାନନ୍ଦ ରାଉଳ, ରଞ୍ଜନ ରାଉଳ, ରାଜେଶ ସ୍ବାଇଁ ପ୍ରମୁଖ ସହାୟତା କରିଥିଲେ।
