ଭବାନୀପାଟଣା,୨୭।୧୨(ଡି.ଏନ୍.ଏ.): କୋହଲା ପାଗ ସାଙ୍ଗକୁ ଗତ ୨୫ତାରିଖ ଠାରୁ କଳାହାଣ୍ଡି ଜିଲାର ବିଭିନ୍ନ ଅଞ୍ଚଳରେ ଝିପିଝିପି ବର୍ଷ ଲାଗିରହିଛି। ଫଳରେ ଖୋଲା ଆକାଶ ତଳେ ମଣ୍ଡିରେ ହଜାର ହଜାର କ୍ୱିଣ୍ଟାଲ ଧାନବସ୍ତା ପଡ଼ିରହିଛି। ଧାନ ଉଠାଣରେ ମିଲର୍ସଙ୍କ ଅବହେଳା ଯୋଗୁ ଧାର୍ଯ୍ୟ ସମୟରେ ଚାଷୀଙ୍କ ଧାନ ଉଠାଣର ଚିନ୍ତାକୁ ଦ୍ୱିଗୁଣିତ କରିଛି। ଜିଲାର୧୩ଟି ବ୍ଲକ୍ର ୭୮ଟି ପ୍ୟାକ୍ସ ଓ ୧୭ଟି ସ୍ବୟଂସହାୟକ ଗୋଷ୍ଠୀ (ଏସ୍ଏଚ୍ଜି)ରେ ଚାଲିଥିବା ୧୭୮ଟି ମଣ୍ଡି ଓ ଉପମଣ୍ଡିର ସମାନ ଅବସ୍ଥା। ମଣ୍ଡିରେ କୌଣସି ଶେଡ୍ ବ୍ୟବସ୍ଥା ନାହିଁ କି ନିୟନ୍ତ୍ରିତ ବଜାର କମିଟି ପକ୍ଷରୁ ଚାଷୀମାନଙ୍କୁ ଆବଶ୍ୟକ ପରିମାଣରେ ପଲିଥିନ ଯୋଗାଇ ଦିଆଯାଇନାହଁ। ଫଳରେ ଖୋଲାଆକାଶ ତଳେ ପଡ଼ିରହିଛି ହଜାର ହଜାର ବସ୍ତା ଧାନ। ଏଥିପାଇଁ ଚାଷୀଙ୍କୁ ପ୍ରାପ୍ୟ ଦେବାରେ ବିଳମ୍ବ ହେଉଛି ଏବଂ ଏହା ଚାଷୀମାରଣ ନୀତିର ନମୁନା ବୋଲି ରିସିଗାଁର ଚାଷୀ ଶାନ୍ତନୁ କୁମାର ବେହେରା, ଅଟାଙ୍ଗଗୁଡାର ଚାଷୀ ସୁନିଲ କୁମାର ବେହେରା ଅଭିଯୋଗ କରିଛନ୍ତି। ଏନେଇ ଜିଲା ଯୋଗାଣ ଅଧିକାରୀ ଶିବପ୍ରସାଦ ଦୋରାଙ୍କୁ ପଚାରିବାରୁ ଅଦିନିଆ ବର୍ଷା କାଳ ସାଜିଛି। ତେବେ ଯଥାସମ୍ଭବ ଧାନ ଉଠାଇବା ପାଇଁ ଚେଷ୍ଟା ଚାଲିଛି ବୋଲି ପ୍ରକାଶ କରିଛନ୍ତି।
