ଭୁବନେଶ୍ୱର, ୨୨ା୧୦(ବ୍ୟୁରୋ): ଓଡ଼ିଶା ବିଧାନସଭାର ଶୀତଅଧିବେଶନ ଆସନ୍ତା ନଭେମ୍ବର ମାସ ଅଧାରେ ହେବ ବୋଲି ଜଣାପଡିଛି। ଏହି ଅଧିବେଶନ କାଳରେ ରାଜ୍ୟ ସରକାର ଅତିରିକ୍ତ ଖର୍ଚ୍ଚ ଦାବି ଆଗତ କରିବେ। ଏଥିପାଇଁ ବିଭିନ୍ନ ବିଭାଗ ପକ୍ଷରୁ ଜୋର୍ଦାର ଉଦ୍ୟମ ଆରମ୍ଭ ହୋଇଯାଇଛି। ଅତିରିକ୍ତ ବଜେଟରେ କେତେ ଟଙ୍କା ବ୍ୟୟବରାଦ କରାଯିବ ସେନେଇ ଏକ ଗୁରୁତ୍ୱପୂର୍ଣ୍ଣ ବୈଠକ ଖୁବ୍ଶୀଘ୍ର ଅନୁଷ୍ଠିତ ହେବ। ଏହା ପୂର୍ବରୁ ମଙ୍ଗଳବାର ସୁଦ୍ଧା ସବୁ ବିଭାଗ ପକ୍ଷରୁ ବଜେଟ ବ୍ୟୟବରାଦ ସମ୍ପର୍କିତ ପ୍ରସ୍ତାବ ରଖିବାକୁ କୁହାଯାଇଛି। ଏହିସବୁ ପ୍ରସ୍ତାବ ମିଳିବାପରେ ଅର୍ଥ ବିଭାଗ ପକ୍ଷରୁ ସମସ୍ତ ପ୍ରସ୍ତାବକୁ ତର୍ଜମା କରାଯିବ। ସେହି ଅନୁଯାୟୀ ଏଥିରୁ କେତେ ଅର୍ଥ ରାଜ୍ୟ ସରକାର ବହନ କରିପାରିବେ ତା’ର ଏକ ତାଲିକା ପ୍ରସ୍ତୁତ କରିବେ। ତାଲିକା ପ୍ରସ୍ତୁତ ହେବାପରେ ସବୁ ବିଭାଗର ବଜେଟ ପ୍ରସ୍ତୁତକାରୀ ଟିମ୍ ସହ ଅର୍ଥ ସଚିବ ଏକ ବୈଠକ କରି ଜରୁରୀ ପ୍ରସ୍ତାବ ରଖି ବଳକା କାଟିବାକୁ ନିର୍ଦ୍ଦେଶ ଦେବେ। ସେହି ଅନୁଯାୟୀ ଅତିରିକ୍ତ ବଜେଟର ରୂପରେଖ ପ୍ରସ୍ତୁତ ହେବ। ରାଜ୍ୟ ସରକାର କେତେଗୁଡିଏ ଯୋଜନାରେ କ୍ୟାବିନେଟ୍ ବୈଠକ ଡାକି ବଜେଟ ବୃଦ୍ଧି କରିଛନ୍ତି। ଆସନ୍ତା ଶୀତ ଅଧିବେଶନରେ ଅତିରିକ୍ତ ଖର୍ଚ୍ଚ ଦାବି କରି ରାଜ୍ୟ ସରକାର ସେହି ଯୋଜନାଗୁଡିକର ବ୍ୟୟବରାଦ ବଢାଇବେ ବୋଲି ଜଣେ ସରକାରୀ ଅଧିକାରୀ ସୂଚନା ଦେଇଛନ୍ତି। ପାର୍ଲାମେଣ୍ଟ ଶୀତ ଅଧିବେଶନ ନେଇ ଏଯାଏ କୌଣସି ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇ ନ ଥିବା କାରଣରୁ ଶୀତଅଧିବେଶନ ତାରିଖ ଧାର୍ଯ୍ୟ କରାଯାଇ ନାହିଁ।
