ଇସଲାମାବାଦ, ୨୧।୬: ଗୋଟିଏ ପରିବାରର ୫ ଭଉଣୀ ପ୍ରଶାସନିକ ପରୀକ୍ଷାରେ ସଫଳତା ହାସଲ କରିବା ନିଶ୍ଚିତ ଭାବେ ଏକ ଗୌରବର କଥା। ଏଭଳି ଘଟଣା ପାକିସ୍ତାନରେ ଘଟିଛି। ରାଓ୍ବଲପିଣ୍ଡିରେ ବାସ କରୁଥିବା ମଲିକ୍ ରଫିକ୍ ଅଓ୍ବାନଙ୍କ ୫ ଝିଅ ଏଭଳି କରି ଇତିହାସ ରଚିଛନ୍ତି। ଏବେ ଭଉଣୀମାନଙ୍କୁ ନେଇ ସାରା ପୃଥିବୀରେ ସୋସିଆଲ ମିଡ଼ିଆରେ ଚର୍ଚ୍ଚା ହେଉଛି। ଲୋକେ ସେମାନଙ୍କୁ ପ୍ରଶଂସା କରୁଛନ୍ତି। ସବୁ ଭଉଣୀ ସିଏସ୍ଏସ୍(ସେଣ୍ଟ୍ରାଲ ସୁପରିଅର ସର୍ଭିସ୍)ରେ କୃତୀତ୍ୱ ଅର୍ଜନ କରିଛନ୍ତି। ସିଏସ୍ଏସ୍ ପରୀକ୍ଷାରେ ଏହା ପ୍ରଥମ ଘଟଣା ବୋଲି କୁହାଯାଉଛି। ପ୍ରଥମେ ୨୦୦୮ରେ ଲୈଲା ମଲିକ୍ ଶେର୍ ସିଏସ୍ଏସ୍ ପାସ୍ କରିଥିଲେ। ସେ କରାଚିର ଫେଡେରାଲ ବ୍ୟୁରୋ ଅଫ୍ ରେଭିନ୍ୟୁରେ ଡେପୁଟି କମିଶନର ଭାବେ କାର୍ଯ୍ୟ କରୁଛନ୍ତି। ୨୦୧୦ରେ ଲୈଲାଙ୍କ ତଳ ଭଉଣୀ ଶିରିନ୍ ମଲିକ ଶେର୍ ସିଏସ୍ଏସ୍ ପରୀକ୍ଷାରେ ସଫଳତା ହାସଲ କରି ନ୍ୟାଶନାଲ ହାଇଓ୍ବେ ଅଥରିଟିରେ ନିର୍ଦ୍ଦେଶକ ଭାବେ ଅବସ୍ଥାପିତ ଅଛନ୍ତି। ୨୦୧୭ରେ ପରିବାରର ତୃତୀୟ ଝିଅ ସାସି ମଲିକ ଶେର୍ ସିଏସ୍ଏସ୍ରେ ସଫଳତା ହାସଲ କରି ଅଣ୍ଡର ଟ୍ରେନିଂ ଲାହୋର କଣ୍ଟନମେଣ୍ଟର ସିଇଓ ଭାବେ କାର୍ଯ୍ୟ କରୁଥିବାବେଳେ ଚତୁର୍ଥ ଝିଅ ମାର୍ବି ମାଲିକ ଶେର ସିଏସ୍ଏସ୍ ପରୀକ୍ଷା ପାସ୍ କରି ଏବ୍ଟାବାଦରେ ସହକାରୀ କମିଶନର ଭାବେ କାର୍ଯ୍ୟ କରୁଛନ୍ତି। ୨୦୧୯ରେ ରଫିକ୍ଙ୍କର ସାନ ଝିଅ ଜୋହା ମଲିକ ଶେର୍ ସିଏସ୍ଏସ୍ ପରୀକ୍ଷାରେ ସଫଳତା ଲାଭ କରିଥିଲେ। ତାଙ୍କ ପିତାଙ୍କର ମହିଳାଙ୍କ ପ୍ରତି ଥିବା ସମ୍ମାନ ଯୋଗୁ ଆଜି ସେମାନେ ଏଭଳି ସଫଳ ହୋଇପାରିଥିବା ଭଉଣୀମାନେ କୁହନ୍ତି।
