ଝରିଗାଁ,୧୪ା୬(ସ୍ବ.ପ୍ର.): ନବରଙ୍ଗପୁର ଜିଲା ଝରିଗାଁ ବ୍ଲକ ଚକଲାପଦର ପଞ୍ଚାୟତ ଅନ୍ତର୍ଗତ ଭଇରାଘୁମର ଜଙ୍ଗଲକୁ ଚଢ଼େଇ ଶିକାର କରିବା ନେଇ ଆସିଥିବା କୁହୁଡି ଗ୍ରାମର ୪ ଜଣଙ୍କୁ ଝରିଗାଁ ବନାଞ୍ଚଳ କାର୍ଯ୍ୟାଳୟରେ ଅଟକ ରଖିବା ସହ ସେମାନଙ୍କ ନିକଟରୁ ଦୁଇ ଦେଶୀ ପୁରୁଣା ବନ୍ଧୁକ ଜବତ କରାଯାଇଛି। ପ୍ରାପ୍ତ ଖବରରୁ ପ୍ରକାଶ ଯେ, ବନ୍ୟଜନ୍ତୁ ସଂରକ୍ଷଣ ପାଇଁ ଭୁବନେଶ୍ୱରରୁ ସର୍ଭେ ପାଇଁ ଆସିଥିବା ଟିମ୍ ସହ ସ୍ଥାନୀୟ ବନ ବିଭାଗୀୟ ରେଞ୍ଜର ମୁକୁନ୍ଦ ଦିଶାରୀ, ଫରେଷ୍ଟର ଚନ୍ଦ୍ରଧ୍ୱଜ ଲାମତାଙ୍କ ସହ ବନ ବିଭାଗୀୟ କର୍ମଚାରୀମାନେ ଗୁରୁବାର ଚକଲାପଦରସ୍ଥିତ ଘୁମର ଜଙ୍ଗଲକୁ ଯାଇଥିଲେ। ସେଠାରେ ଚଢ଼େଇ ଶିକାରକୁ ଆସିଥିବା ଲୋକଙ୍କ ସହ ସାମ୍ନାସାମ୍ନି ହୋଇଥିଲେ। ଦୁଇଜଣ ଦେଶୀ ବନ୍ଧୁକଧାରୀଙ୍କ ସହ ଆଉ ଦୁଇ ଜଣଙ୍କୁ ବନ ବିଭାଗୀୟ କର୍ମଚାରୀମାନେ ଧରି ଝରିଗାଁ ବନ ବିଭାଗୀୟ ଅଧିକାରୀଙ୍କ କାର୍ଯ୍ୟାଳୟକୁ ଆଣିଥିଲେ। ସେମାନେ ହେଲେ କୁହୁଡ଼ି ଗ୍ରାମର ଅଭିକେତ ଭୁଞ୍ଜିଆ(୪୫), ମନୋହର ପୂଜାରୀ(୪୦), ବିକ୍ରମ ପୂଜାରୀ(୩୭) ଏବଂ ଗଜେନ୍ଦ୍ର ସୁନା(୪୨)। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ରେଞ୍ଜର ମୁକୁନ୍ଦ ଦିଶାରୀ ପ୍ରକାଶ କରିଛନ୍ତି।
