ନୂଆଦିଲ୍ଲୀ, ୨୩।୬: ଆଜିକୁ ୩୫ ବର୍ଷ ତଳେ ଜୁନ୍ ୨୩ର କଳା ରବିବାରରେ ମଝି ଆକାଶରେ ବିମାନ ଦୁର୍ଘଟଣାରେ ୩୨୯ ଲୋକଙ୍କ ମୃତ୍ୟୁ ଘଟିଥିଲା। ୩୦୭ ଯାତ୍ରୀ ଏବଂ ୨୨ ଜଣ ବିମାନ କର୍ମଚାରୀଙ୍କର ଏହି ଦୁର୍ଘଟଣାରେ ମୃତ୍ୟୁ ହୋଇଥିଲା। ଏହି ଦୁଃଖଦ ଘଟଣା ୧୯୮୫ ଜୁନ୍ ୨୩ରେ ଘଟିଥିଲା। ସେ ଦିନ ବି ଥିଲା ରବିବାର। ଏୟାର ଇଣ୍ଡିଆର ବିମାନ କନିଷ୍କ-୧୮୨ ଟରୋଣ୍ଟୋରୁ ଉଡ଼ାଣ ଆରମ୍ଭ କରିଥିଲା। ଲଣ୍ଡନ ଦେଇ ଏହା ନୂଆଦିଲ୍ଲୀରେ ପହଞ୍ଚିଥାନ୍ତା। ତେବେ ସକାଳ ହେବା ପୂର୍ବରୁ ୟୁରୋପ ସୀମାରେ ପହଞ୍ଚିବା ପରେ ୩୧ ଫୁଟ ଉଚ୍ଚରେ ମଝି ଆକାଶରେ ବିମାନରେ ହଠାତ୍ ବିସ୍ଫୋରଣ ହୋଇଥିଲା। ଅୟାରଲାଣ୍ଡ ପାଖାପାଖି ଅଞ୍ଚଳରେ ଏପରି ହୋଇଥିଲା। ବିମାନଟିର ଭଗ୍ନାବଶେଷ ଆଟଲାଣ୍ଟିକ୍ ସାଗରରେ ପଡ଼ିଥିଲା। ଯାତ୍ରୀଙ୍କ ମଧ୍ୟରୁ ୨୬୮ ଜଣ କାନାଡ଼ାର ଥିବାବେଳେ ୨୭ ଜଣ ଇଂଲଣ୍ଡ, ୧୦ ଆମେରିକାର ଏବଂ ୨ ଜଣ ଭାରତୀୟ ଥିଲେ। ସାଗର ଗର୍ଭରୁ ୧୩୧ ଜଣଙ୍କ ମୃତ ଦେହ ଉଦ୍ଧାର ହୋଇଥିଲା। ବିମାନରେ ଏମ୍. ସିଂ ନାମକ ଜଣେ ଯାତ୍ରୀ ଯିବାର ଥିଲା। ମାତ୍ର ତାଙ୍କର କିଛି ସାମଗ୍ରୀ ବିମାନରେ ଥିବାବେଳେ ସମ୍ପୃକ୍ତ ସନ୍ଦିଗ୍ଧ ବ୍ୟକ୍ତି ବିମାନରେ ଚଢ଼ି ନ ଥିବା କୁହାଯାଇଥିଲା। ତେବେ ଏପର୍ଯ୍ୟନ୍ତ ଏମ୍.ସିଂଙ୍କ ସମ୍ପର୍କରେ କୌଣସି ତଥ୍ୟ ମିଳି ପାରି ନାହିଁ। ଏହା ଖଲିସ୍ତାନ ଉଗ୍ରପନ୍ଥୀଙ୍କ ପ୍ରତିଶୋଧ ବୋଲି କୁହାଯାଇଥିଲା। ୧୯୮୪ ଜୁନ୍ ୬ରେ ସ୍ବର୍ଣ୍ଣମନ୍ଦିରରେ ହୋଇଥିବା ଅପରେଶନ୍ ବ୍ଲୁଷ୍ଟାରର ପ୍ରତିଶୋଧ ନେବା ପାଇଁ ଉଗ୍ରପନ୍ଥୀ ଏଭଳି କାଣ୍ଡ ଭିଆଇଥିବା କୁହାଯାଇଥିଲା।
