ଜୁନାଗଡ,୬।୫(ଡି.ଏନ୍.ଏ): କଳାହାଣ୍ଡି ଜିଲା ଜୁନାଗଡ ବ୍ଲକ ରଣପୁର ପୋଡଚୁଆଁ ପାହାଡରେ ଦେଶୀ ହାତରନ୍ଧା ମଦ ତିଆରି ହେଉଥିବା ଖବର ପାଇ ଅବକାରୀ ବିଭାଗ ପକ୍ଷରୁ ଚଢାଉ କରାଯାଇଥିଲା। ସେଠାରେ ତଲାସୀ ପରେ ୨୭.୪୦ କୁଇଣ୍ଟାଲ ମହୁଲ ପୋଚ, ୩୫ଲିଟର ହାତରନ୍ଧା ମଦ ଓ ମଦରନ୍ଧା ସାମଗ୍ରୀ ଜବତ କରାଯାଇଥିଲା। ଘଟଣାସ୍ଥଳରେ ଜବତ ହୋଇଥିବା ସାମଗ୍ରୀଗୁଡିକୁ ବିଭାଗ ପକ୍ଷରୁ ନଷ୍ଟ କରାଯାଇଥିଲା। ଏହାସହ ଜୁନାଗଡ ବରଗଛପଡାର କୁଞ୍ଜ ବିହାରୀ ମେହେରଙ୍କଠାରୁ ୧୦ଲିଟର ହାତରନ୍ଧା ମଦ, ଗୋଟିଏ ସାଇକେଲ ଓ ଖର୍ଲାବେଡା ଗ୍ରାମର ରାଜେନ୍ଦ୍ର ରଣାଙ୍କଠାରୁ ୧୦ଲିଟର ହାତରନ୍ଧା ମଦ ଜବତ କରାଯାଇଥିଲା। ଏହି ଚଢାଉରେ ଧର୍ମଗଡ ରେଞ୍ଜ ଅବକାରୀ ନିରୀକ୍ଷକ ସୁବନ ନାଏକ, ଜୁନାଗଡ ଅବକାରୀ ଉପନିରୀକ୍ଷକ ଦିଲୀପ କୁମାର ରଥ, ଏଏସ୍ଆଇ ବସନ୍ତ ବିଶି ପ୍ରମୁଖ ସାମିଲ ଥିଲେ।
