ଢେଙ୍କାନାଳ ଅଫିସ, ୨୨।୫
କରୋନା ପ୍ରଭାବିତ ଢେଙ୍କାନାଳ ଜିଲାରେ ଖରିଫ୍ ଚାଷକୁ ସୁବ୍ୟବସ୍ଥିତ କରିବାକୁ ଅଣ୍ଟା ଭିଡିଛି ପ୍ରଶାସନ। ଖରିଫ୍-୨୦୨୦ ନେଇ ଗୁରୁବାର ଜିଲା କାର୍ଯ୍ୟାଳୟ ସଦ୍ଭାବନା ଗୃହରେ କୃଷି ନିର୍ଦ୍ଧାରଣ କମିଟି ବୈଠକ ଅନୁଷ୍ଠିତ ହୋଇଯାଇଛି। ଚଳିତ ବର୍ଷ ୧,୮୫,୨୧୦ ହେକ୍ଟର ଜମିରେ ଖରିଫ୍ ଚାଷ କରିବାକୁ ନିର୍ଦ୍ଧାରଣ କରାଯାଇଛି। ଜଳସେଚିତ ଜମିରେ ପାଣି ପହଞ୍ଚତ୍ବାରେ ଯେପରି କୌଣସି ସମସ୍ୟା ନ ଉପୁଜେ ସେଥିଲାଗି ଯୁଗ୍ମ ଯାଞ୍ଚ କରିବାକୁ ଆର୍ଆଇ, ଗ୍ରାମସେବକ ଏବଂ ସେଚ ବିଭାଗ ଅଧିକାରୀଙ୍କୁ ଜିଲାପାଳ ଭୂମେଶ ଚନ୍ଦ୍ର ବେହେରା ନିର୍ଦ୍ଦେଶ ଦେଇଛନ୍ତି।
କୃଷି ବିଭାଗ ପକ୍ଷରୁ ଦିଆଯାଇଥିବା ତଥ୍ୟ ଅନୁଯାୟୀ, ଚଳିତବର୍ଷ ୯୫,୦୦୦ ହେକ୍ଟର ଜମିରେ ଧାନ, ୨୩,୦୦୦ ହେକ୍ଟରରେ ଡାଲିଜାତୀୟ, ୨୦,୫୦୦ ହେକ୍ଟରରେ ତୈଳବୀଜ, ୧୩୦ ହେକ୍ଟରରେ କପା ଓ ଝୋଟ, ୩୭,୫୦୦ ହେକ୍ଟରରେ ପରିବା, ୫,୨୦୦ ହେକ୍ଟରରେ ମସଲା, ୪୦୦ ହେକ୍ଟରରେ ଆଖୁ ଏବଂ ୨,୮୮୦ ହେକ୍ଟର ଜମିରେ ଅନ୍ୟାନ୍ୟ ଫସଲ କରାଯିବ। ୧ଲକ୍ଷ ୪ହଜାର ୭୫୭ ହେକ୍ଟର ଜମିକୁ ଜଳସେଚନ ସୁବିଧା ଯୋଗାଇ ଦିଆଯିବ। ଆବଶ୍ୟକ ପରିମାଣର ସାର ମହଜୁଦ୍ ରଖିବା ଲାଗି ର଼୍ୟାଗ୍ (ଗୋଦାମ ଗୃହ) କରାଯିବ। ଚାଷୀଙ୍କ ପାଖରେ ପର୍ଯ୍ୟାପ୍ତ ବିହନ ଉପଲବ୍ଧ କରାଯିବ। କରୋନା ସଂକ୍ରମଣ ପ୍ରତିରୋଧ କରିବାକୁ ସାମାଜିକ ଦୂରତ୍ୱ ଅବଲମ୍ବନ କରି କୃଷିକାର୍ଯ୍ୟ ପରିଚାଳନା କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଏହାବ୍ୟତୀତ ପ୍ରବାସୀ ଓଡ଼ିଆ ଶ୍ରମିକଙ୍କୁ ନେଇ ଅଧିକ ଫାର୍ମପଣ୍ଡ ଖୋଳିବା, ଚାଷୀଙ୍କୁ ସୁବିଧାରେ ଋଣ ଯୋଗାଣ କରିବା ଦିଗରେ ଆଲୋଚନା କରାଯାଇଥିଲା।
ବୈଠକରେ ଜିଲା କୃଷି ଉପନିର୍ଦ୍ଦେଶକ ରାଜକିଶୋର ନାୟକ, ଅତିରିକ୍ତ ଜିଲାପାଳ ଭବେଶ କୁମାର ନାୟକ, ପିଡି ଡିଆର୍ଡିଏ ନରୋତ୍ତମ ବେହେରା, ଉଦ୍ୟାନକୃଷି ଉପନିର୍ଦ୍ଦେଶକ ଭଗବାନ ଦାସଙ୍କ ସମେତ ବିଭିନ୍ନ ବିଭାଗର ଅଧିକାରୀ, ଅଗ୍ରଣୀ ବ୍ୟାଙ୍କ ପରିଚାଳକମାନେ ଉପସ୍ଥିତ ଥିଲେ।
