ଛେଣ୍ଡିପଦା,୩୧।୭(ସ୍ବ.ପ୍ର.)-ଅନୁଗୋଳ ଜିଲା ଛେଣ୍ଡିପଦା ବ୍ଲକ ଅଞ୍ଚଳ ଦେଇ ଯିବାକୁ ଥିବା ଜଗଦିଶପୁର-ହଳଦିଆ-ବୋକାରୋ-ଧାମରା ଗ୍ୟାସ ପାଇପ ଲାଇନ ତଥା ସ୍ପର ପାଇପ ଲାଇନ ନିମନ୍ତେ ଗେଲ୍ ଇଣ୍ଡିଆ ଲିମିଟେଡ ପକ୍ଷରୁ ଜମି ଅଧିଗ୍ରହଣ ନିମନ୍ତେ ୩(୧) ବିଜ୍ଞପ୍ତି ପ୍ରକାଶ ପାଇଥିଲା। ଏହାକୁ ଛେଣ୍ଡିପଦା ବ୍ଲକର ବିଭିନ୍ନ ଗ୍ରାମର କ୍ଷତିଗ୍ରସ୍ତ ପ୍ରଜାମାନେ ବିରୋଧ କରିବା ସହିତ ଗେଲଇଣ୍ଡିଆ ନିକଟରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ଗେଲ ଇଣ୍ଡିଆ ପକ୍ଷରୁ ମଙ୍ଗଳବାର ଛେଣ୍ଡିପଦା ତହସିଲ ଅଫିସରେ ଅଭିଯୋଗ ଶୁଣାଣି ହୋଇଥିଲା। ଏହି ଶୁଣାଣି ସମୟରେ ଉପସ୍ଥିତ କ୍ଷତିଗ୍ରସ୍ତ ପ୍ରଜାମାନେ ୧୯୬୨ ଅଧିଗ୍ରହଣ ନିୟମାନୁଯାୟୀ କରାଯାଉଥିବା ଅଧିଗ୍ରହଣକୁ ତୀବ୍ର ବିରୋଧ କରିଥିଲେ। ଫଳରେ ତହସିଲ କାର୍ଯ୍ୟାଳୟ ସମ୍ମୁଖରେ ଉତ୍ତେଜନା ଦେଖାଦେଇଥିଲା।
ଅଭିଯୋଗ ମୁତାବକ, ଗେଲ ଇଣ୍ଡିଆ ପକ୍ଷରୁ ୧୯୬୨ ପିଆଣ୍ଡପି ଆକ୍ଟ ଅନୁଯାୟୀ ସମ୍ପୂର୍ଣ୍ଣ ଜମିକୁ ଅଧିଗ୍ରହଣ କରା ନ ଯାଇ ଯେତିକିରେ ପାଇପ ଲାଇନ ଯିବ, ସେତିକି ଜମିର କ୍ଷତିପୂରଣ ପ୍ରଦାନ କରାଯିବ। ଏପରିକି ପାଇପ ଲାଇନ ଯାଇଥିବା ଜମିରେ ଘର ନିର୍ମାଣ, ଗଛ ଲଗାଇବା, ଜଳସେଚନ ପାଇଁ କୂପ ତିଆରି କରାଯାଇପାରିବ ନାହିଁ। କିନ୍ତୁ ଏହାକୁ ଗ୍ରାମବାସୀ ବିରୋଧ କରିବା ସହ ସମ୍ପୂର୍ଣ୍ଣ ଜମିକୁ ଅଧିଗ୍ରହଣ କରାଯିବା ସହିତ ନୂତନ ବିସ୍ଥାପନ ନୀତି ଅନୁଯାୟୀ କ୍ଷତିପୂରଣ ପ୍ରଦାନ ପାଇଁ ଦାବି କରିଥିଲେ। ଏହି ଜନ ଶୁଣାଣିରେ ଗେଲ ଇଣ୍ଡିଆର କ୍ଷମତାପନ୍ନ ପ୍ରାଧିକାରୀ ବିନୋଦ ପଣ୍ଡା, ଅଧିକାରୀ ପ୍ରେମାନନ୍ଦ ବେଉରା, କେଶବ ଚନ୍ଦ୍ର ବିଶ୍ବାଳ, ଆସିଷ୍ଟାଣ୍ଟ ଜେନେରାଲ ମ୍ୟାନେଜର ଶରତ କୁମାର ଗୁପ୍ତା ପ୍ରମୁଖ ଉପସ୍ଥିତ ଥିଲେ। କ୍ଷତିଗ୍ରସ୍ତ ପ୍ରଜାମାନେ ତହସିଲ କାର୍ଯ୍ୟାଳୟ ସମ୍ମୁଖରେ ଗେଲ୍ ଇଣ୍ଡିଆ ଅଧିକାରୀଙ୍କୁ ଘେରାଉ କରିବା ସହ ଜମି ଛାଡିବେ ନାହିଁ ବୋଲି ଅଡ଼ି ବସିଥିଲେ। ଏ ସମ୍ପର୍କରେ କ୍ଷମତାପନ୍ନ ପ୍ରାଧିକାରୀ କୁହନ୍ତି, ୧୯୬୨ ଅଧିଗ୍ରହଣ ଆଇନ ପରିବର୍ତ୍ତନ ଯୋଜନା ଚାଲିଛି। କମିଟି ପକ୍ଷରୁ ଯାହା ନିଷ୍ପତ୍ତି ନିଆଯିବ ସେହି ଅନୁଯାୟୀ କ୍ଷତିପୂରଣ ଯୋଗାଇ ଦିଆଯିବ।
