ବାରଙ୍ଗ,୧୪।୧(ଡି.ଏନ୍.ଏ.): ବାରଙ୍ଗ ଥାନା ସମ୍ମୁଖରେ କଟକ ଆର୍ଟିଓଙ୍କ ଦ୍ୱାରା ମଙ୍ଗଳବାର ଗାଡ଼ି ଯାଞ୍ଚ କରାଯାଉଥିବା ବେଳେ ଜଣେ ବାଇକ୍ ଚାଳକଙ୍କୁ ୨୬ହଜାର ଜରିମାନା କରାଯାଇଛି। ଚାଳକଜଣକ ନାବାଳକ ହୋଇଥିବା ବେଳେ ହେଲ୍ମେଟ୍ ପିନ୍ଧି ନ ଥିଲେ। ଏଥିସହ ତାଙ୍କର ଡିଏଲ୍ ନ ଥିବାରୁ ଆର୍ଟିଓ ପକ୍ଷରୁ ଏହି ଜରିମାନା କଟାଯାଇଥିବା ସୂଚନା ମିଳିଛି।
ଗୋଠପୁର ଗ୍ରାମର ସରୋଜ ପରିଡା(୧୭) ସ୍କୁଟି(ଓଡି-୦୫-ଏଜେ-୧୫୧୨) ଚଳାଇ ବାରଙ୍ଗ ଆସୁଥିଲେ। ଏହି ସମୟରେ କଟକ ଆଡିଶନାଲ ଆର୍ଟିଓ ରାଜେଶ ମାରାଣ୍ଡିଙ୍କ ନେତୃତ୍ୱରେ ଆର୍ଟିଓ କର୍ମଚାରୀମାନେ ବାରଙ୍ଗ ଥାନା ସମ୍ମୁଖରେ ଗାଡ଼ି ଚେକିଂ କରୁଥିଲେ। ସରୋଜ ବିନା ହେଲ୍ମେଟରେ ଆସୁଥିବାରୁ ସେଠାରେ ଧରାପଡ଼ିଥିଲେ। ଏହାପରେ ତାଙ୍କର ଡିଏଲ୍ ନ ଥିବା ସହ ନାବାଳକ ହୋଇଥିବାରୁ ୨୫ହଜାର ଏବଂ ହେଲମେଟ୍ ନ ଥିବାରୁ ଏକ ହଜାର ସମୁଦାୟ ୨୬ହଜାର ଟଙ୍କା ଆର୍ଟିଓ ଜରିମାନା କରିଥିବା ଜଣାପଡ଼ିଛି।
