ଖୋର୍ଦ୍ଧା ଅଫିସ,୨୧ା୩ : ସାରା ବିଶ୍ୱରେ ଲାଗି ରହିଛି କରୋନା ଆତଙ୍କ। ଏ ନେଇ ସରକାରଙ୍କ ପକ୍ଷରୁ ବିଭିନ୍ନ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଉଛି। କରୋନା ସଂକ୍ରମଣ ମୁକାବିଲା ଲାଗି ସରକାରଙ୍କ ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ କରାଯାଉଛି। ବିଦେଶ ଫେରନ୍ତାଙ୍କ ନାମ ପଞ୍ଜୀକରଣ କରାଯାଉଛି। ସେମାନଙ୍କୁ କ୍ୱାରେଣ୍ଟାଇନ କେନ୍ଦ୍ରରେ ରହିବା ଲାଗି ପରାମର୍ଶ ଦିଆଯାଇଛି। ଏହାର ଭୟାବହତାକୁ ଉପଲବ୍ଧତ୍ କରି ବିଦେଶ ଅଥବା ବାହାର ରାଜ୍ୟରେ ରହୁଥିବା ବ୍ୟକ୍ତି ବିଶେଷ ନିଜ ରାଜ୍ୟ ଏବଂ ଜିଲାକୁ ଫେରୁଛନ୍ତି। ଏଭଳି ସ୍ଥିତିରେ ଖୋର୍ଦ୍ଧା ସୁଧାର ଗୃହରେ ଥିବା ବାହାର ରାଜ୍ୟର ୧୩ ଜଣ ମହିଳା ଫସି ରହିଛନ୍ତି। ସେମାନେ ନିଜ ଘରକୁ ଯିବାକୁ ବ୍ୟାକୁଳ ହେଉଛନ୍ତି। ହେଲେ କର୍ତ୍ତୃପକ୍ଷ ସେମାନଙ୍କୁ ଉପଯୁକ୍ତ ପ୍ରମାଣପତ୍ର ବିନା ଛାଡିବାକୁ ନାରାଜ। ଏ ନେଇ ସମ୍ପୃକ୍ତା ମହିଳାମାନେ ଏବଂ ସୁଧାର ଗୃହ କର୍ତ୍ତୃପକ୍ଷ ମୁହଁ।ମୁହିଁ ହୋଇଥିବା ଜଣାପଡିଛି।
ଭୁବନେଶ୍ୱର କମିଶନରେଟ ପୋଲିସ ୩ଦିନ ତଳେ ୧୩ ଜଣ ବାହାର ରାଜ୍ୟର ମହିଳାଙ୍କୁ ଉଦ୍ଧାର କରି ଖୋର୍ଦ୍ଧା ସୁଧାର ଗୃହରେ ଛାଡିଥିଲା। ଗୁରୁବାର ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା। ପରୀକ୍ଷା ରିପୋର୍ଟ ନେଗେଟିଭ ଆସିବା ପରେ ପୋଲିସ ସେମାନଙ୍କୁ ଛାଡି ଦେବାକୁ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛି। ଏ ନେଇ ସୁଧାର ଗୃହ ଉପଦେଷ୍ଟା ମୀରା ମାନ୍ଧାତାଙ୍କୁ ପଚାରିବାରେ ପୋଲିସ ଆଣି ସେମାନଙ୍କୁ ଏଠାରେ ଛାଡିଥିଲା। ପୋଲିସ ଲିଖିତନାମା ଦେବା ପରେ ସେମାନଙ୍କୁ ଛଡାଯିବ। ଅଥବା ସେମାନଙ୍କ ପରିବାରର କୌଣସି ସଦସ୍ୟ ଆସି ଉପଯୁକ୍ତ ପ୍ରମାଣପତ୍ର ଦେଲେ ଛଡାଯିବାର ବ୍ୟବସ୍ଥା କରାଯିବ ବୋଲି ସେ କହିଛନ୍ତି।
