ବାସେଲ,୨୩ା୮(ପି.ଟି.)-ବ୍ୟାଡ୍ମିଣ୍ଟନ ଓ୍ବାଲ୍ଡର୍ର୍ ଫେଡେରେଶନ (ବିଡବ୍ଲ୍ୟୁଏଫ୍) ଓ୍ବାଲର୍ଡ ଚାମ୍ପିୟନଶିପ୍ରେ ଭାରତର ପି.ଭି. ସିନ୍ଧୁ ଏବଂ ବି. ସାଇ ପ୍ରଣିଥ ସେମାନଙ୍କ ପଦକ ପକ୍କା କରିଛନ୍ତି। ଶୁକ୍ରବାର ସେ ଏକ ମହିଳା ସିଙ୍ଗଲ୍ସ କ୍ୱାର୍ଟରଫାଇନାଲ ମ୍ୟାଚରେ ଚାଇନିଜ ତାଇପେର ଏସିଆନ ଗେମ୍ସ ସ୍ବର୍ଣ୍ଣ ବିଜୟିନୀ ତାଇ ତିଜୁ ୟିଙ୍ଗ୍ଙ୍କୁ ୧୨-୨୧, ୨୩-୨୧, ୨୧-୧୯ରେ ହରାଇ ଦେଇଛନ୍ତି। ୨୪ବର୍ଷୀୟା ଭାରତୀୟ ଖେଳାଳି ଶନିବାର ସେମିଫାଇନାଲରେ ଚାଇନାର ଚେନ୍ ୟୁ ଫେଇ ଏବଂ ଡେନମାର୍କର ମିଆ ବ୍ଲିଚଫିଲ୍ଡଙ୍କ ମଧ୍ୟରେ ଖେଳାଯିବାକୁଥିବା ମ୍ୟାଚର ବିଜେତାଙ୍କୁ ଭେଟିବେ। ଏହି ସମ୍ମାନଜନକ ଟୁର୍ନାମେଣ୍ଟ ଗତ ଦୁଇଟି ସଂସ୍କରଣରେ ସିନ୍ଧୁ ରୌପ୍ୟ ଜିତି ଆସିଛନ୍ତି। ଏହାଛଡ଼ା ପୂର୍ବରୁ ସେ ଦୁଇଟି ବ୍ରୋଞ୍ଜ ପଦକ ମଧ୍ୟ ହାସଲ କରି ସାରିଛନ୍ତି। ଅନ୍ୟପକ୍ଷରେ ପ୍ରଣିଥ୍ ୩୬ବର୍ଷରେ ପ୍ରଥମ ଭାରତୀୟ ପୁରୁଷ ଖେଳାଳି ଭାବେ ଏହି ସମ୍ମାନଜନକ ଟୁର୍ନାମେଣ୍ଟରେ ପଦକ ହାସଲ କରିବାକୁ ଯାଉଛନ୍ତି। ବିଶ୍ୱର ୧୯ନମ୍ବର ର଼୍ୟାଙ୍କିଙ୍ଗପ୍ରାପ୍ତ ଏହି ଖେଳାଳି କ୍ୱାର୍ଟରଫାଇନାଲରେ ବିଶ୍ୱର ୪ ନମ୍ବର ମାନ୍ୟତାପ୍ରାପ୍ତ ତଥା ଇଣ୍ଡୋନେସିଆର ଜୋନାଥନ କ୍ରିଷ୍ଟିଙ୍କୁ ୨୪-୨୨, ୨୧-୧୪ରେ ପରାସ୍ତ କରିଛନ୍ତି। ବ୍ୟାଡମିଣ୍ଟନ କିମ୍ବଦନ୍ତୀ ପ୍ରକାଶ ପାଦୁକୋନ୍ ପ୍ରଥମ ଭାରତୀୟ ଖେଳାଳି ଭାବେ ୧୯୮୩ ବିଶ୍ୱ ଚାମ୍ପିୟନଶିପ୍ ପୁରୁଷ ସିଙ୍ଗଲ୍ସରେ ଏକ ବ୍ରୋଞ୍ଜ ପଦକ ଜିତିଥିଲେ। ସୂଚନାଯୋଗ୍ୟ, ପ୍ରଣିଥ୍ ୨୦୧୭ରେ ସିଙ୍ଗାପୁର ଓପନ ଜିତିଥିବାବେଳେ ଚଳିତବର୍ଷ ପ୍ରାରମ୍ଭରେ ସୁଇସ୍ ଓପନ୍ରେ ରନର୍ସଅପ୍ ହୋଇଛନ୍ତି।
