ସୋନପୁର,୧୧।୭(ନି.ପ୍ର.): ଜିଲା ସ୍ବାସ୍ଥ୍ୟ ସମିତି ସୁବର୍ଣ୍ଣପୁର ତରଫରୁ ବିଶ୍ୱ ଜନସଂଖ୍ୟା ଦିବସ ଗୁରୁବାର ପାଳିତ ହୋଇଯାଇଛି। ଏହି ଅବସରରେ ଜିଲା ମୁଖ୍ୟ ଚିକିତ୍ସାଳୟ ପରିସରରେ ଅନୁଷ୍ଠିତ ସଚେତନତା ସଭାରେ ଅଧ୍ୟକ୍ଷତା କରି ଭାରପ୍ରାପ୍ତ ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡାକ୍ତର ପ୍ରଦୀପ କୁମାର ଗୁରୁ ବ୍ୟାପକ ସଚେତନତା ଦ୍ୱାରା ହିଁ ସ୍ଥିରତା ସମ୍ଭବ ବୋଲି ମତବ୍ୟକ୍ତ କରିଥିଲେ। ଏହି ଅବସରରେ ସମଗ୍ର ଅଭିଯାନକୁ ଦୁଇଟି ପକ୍ଷରେ ପାଳନ କରାଯାଉଛି। ୨୭ ଜୁନ୍ରୁ ୧୦ ଜୁଲାଇ ପର୍ଯ୍ୟନ୍ତ ଏହା ସଚେତନତା ପକ୍ଷ ହିସାବରେ ପାଳିତ ହେଉଥିବା ବେଳେ ୧୧ ଜୁଲାଇରୁ ୨୪ଜୁଲାଇ ପର୍ଯ୍ୟନ୍ତ ଏହା ସ୍ଥିରୀକରଣ ପକ୍ଷ ହିସାବରେ ପାଳିତ ହେବ। ଜିଲାରେ ପୁରୁଷ ବନ୍ଧ୍ୟାକରଣ ଅସ୍ତ୍ରୋପଚାର ସଂଖ୍ୟା ନଗନ୍ୟ ଥିବାରୁ ଏ ସମ୍ପର୍କରେ ବ୍ୟାପକ ସଚେତନତା ଉପରେ ଗୁରୁତ୍ୱ ଦିଆଯାଇଥିଲା। ସଚେତନତା ପକ୍ଷରେ ଲୋକଙ୍କୁ ସଚେତନ କରିବା ପାଇଁ ତୃଣମୂଳସ୍ତରରୁ ବ୍ୟାପକ ପଦକ୍ଷେପ ନିଆଯାଇଛି। ପରିବାର ନିୟୋଜନ ସକାଶେ ସଚେତନତା ସୃଷ୍ଟି ପାଇଁ ପୋଷ୍ଟର, ବେନର, ହୋଡିଂ, ଲିଫଲେଟ୍ ସଚେତନତା ରଥ, ଗାଁ କଲ୍ୟାଣ ସମିତି ତରଫରୁ ସଚେତନତା ବୈଠକ ପରି ବିଭିନ୍ନ ପଦକ୍ଷେପ ନିଆଯାଇଛି। ସ୍ଥିରୀକରଣ ପକ୍ଷରେ ଗ୍ରାମ୍ୟସ୍ତରରେ ଆଶାକର୍ମୀଙ୍କ ଠୁ ଆରମ୍ଭ କରି ସ୍ବାସ୍ଥ୍ୟ ଉପକେନ୍ଦ୍ର, ପ୍ରାଥମିକ ସ୍ବାସ୍ଥ୍ୟକେନ୍ଦ୍ର, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ଉପଖଣ୍ଡ ଚିକିତ୍ସାଳୟ ଓ ଜିଲା ମୁଖ୍ୟ ଚିକିତ୍ସାଳୟରେ ଗର୍ଭ ନିରୋଧକ ବଟିକା, କଣ୍ଡୋମ, ଆୟୁସିଡି ପାଇଁ ନିରୋଧକ ଇଞ୍ଜେକ୍ସନ ଅନ୍ତରା, ଗର୍ଭ ନିରୋଧକ ଅସ୍ତ୍ରୋପଚାର ଆଦି ସେବା ଉପଲବ୍ଧ କରାଯିବ। ଏହି ପକ୍ଷରେ ଜିଲା ମୁଖ୍ୟ ଚିକିତ୍ସାଳୟ ଏବଂ ପ୍ରତି ବ୍ଲକ ପାଇଁ ୪୫ସଂଖ୍ୟକ ମହିଳା ପରିବାର ନିୟୋଜନ ଅସ୍ତ୍ରୋପଚାର, ୧୫ ସଂଖ୍ୟକ ପୁରୁଷ ପରିବାର ନିୟୋଜନ ଅସ୍ତ୍ରୋପଚାର, ୧୨୦ସଂଖ୍ୟକ ଆୟୁସିଡି ଏବଂ ୫୦ ସଂଖ୍ୟକ ଅନ୍ତରା ଲକ୍ଷ୍ୟ ଧାର୍ଯ୍ୟ କରାଯାଇଛି ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଥିଲା। ଅନ୍ୟମାନଙ୍କ ମଧ୍ୟରେ ଜିଲା ମ୍ୟାଲେରିଆ ଅଧିକାରୀ ଡାକ୍ତର ନବକିଶୋର ବେହେରା, ଜିଲା ଯକ୍ଷ୍ମା ଅଧିକାରୀ ଡାକ୍ତର ପଦ୍ମହଂସା ଦୋରା ପ୍ରମୁଖ ମଞ୍ଚାସୀନ ରହି ନିଜର ମତାମତ ପ୍ରଦାନ କରିଥିଲେ।
