ଓଡ଼ିଆ ସଙ୍ଗୀତ ଜଗତରେ ଅସୀମା ପଣ୍ଡା ଜଣେ ଚର୍ଚ୍ଚିତ ଚେହେରା। ଗତ କିଛି ବର୍ଷ ହେବ ଏହି କଣ୍ଠଶିଳ୍ପୀଙ୍କ ସ୍ବର ଓଡ଼ିଆ ଶ୍ରୋତାଙ୍କୁ ମତୁଆଲା କରି ରଖିଛି। ଗୋଟିଏ ପରେ ଗୋଟିଏ ସୁପରହିଟ୍ ଗୀତ ପରିବେଷଣ କରୁଥିବା ଅସୀମା ଫିଟ୍ନେସ୍ ପାଇଁ ବି ସମୟ କାଢ଼ନ୍ତି। ବ୍ୟସ୍ତବହୁଳ ଜୀବନ ଭିତରୁ ନିଜକୁ ଫିଟ୍ ରଖିବା ପାଇଁ ବି ଚିନ୍ତା କରନ୍ତି..
ଭେଜ୍ ଖାଇବାକୁ ଭଲ ପାଏ
ଅଧିକ ସମୟ ଭେଜ୍ ତରକାରି ଖାଇବାକୁ ପସନ୍ଦ କରେ। ଘରେ ମା’ଙ୍କ ହାତରନ୍ଧା ସମସ୍ତ ଭେଜ ତରକାରି ମୋର ଅତିପ୍ରିୟ। ଆମିଷ ତଥା ନନ୍ଭେଜ ଖାଦ୍ୟ ବହୁତ ଖାଉଥିଲି। ଆମିଷ ଖାଦ୍ୟ ପ୍ରତି ଦୁର୍ବଳତା ଅଛି। ହେଲେ କେବଳ ଘରେ ତିଆରି ହେଉଥିବା ଆମିଷ ଖାଦ୍ୟ ଖାଏ। ବାହାରେ ତେଲମସଲାରେ ଭର୍ତ୍ତି ତରକାରି ଖାଇବାକୁ ଆଦୌ ପସନ୍ଦ କରେନି। ବାହାରେ ଥିଲେ ଭେଜ୍ ଖାଇବାକୁ ପଡ଼େ।
ନିୟମିତ ବ୍ୟବଧାନରେ ପାଣି ପିଏ
ଷ୍ଟେଜ ପ୍ରୋଗ୍ରାମ ହେଉ ଷ୍ଟୁଡ଼ିଓରେ ଡବିଂ। ଯେଉଁଠି ଥିଲେ ବି ନିୟମିତ ସମୟ ବ୍ୟବଧାନରେ ପାଣି ପିଏ। ପ୍ରଚୁର ମାତ୍ରାରେ ପାଣି ପିଇବା ଦ୍ୱାରା ଶରୀର ସୁସ୍ଥ ରହିବା ସହିତ ତ୍ୱଚା ମଧ୍ୟ ଉଜ୍ଜ୍ୱଳ ହୁଏ। ପାଣି ପିଇବାକୁ କେବେ ଭୁଲେନାହିଁ। ଘରୁ ବାହାରିବା ମାତ୍ରେ ମୋ ସହିତ ପାଣି ବୋତଲ ଥାଏ। କଣ୍ଠଶିଳ୍ପୀ ହୋଇଥିବାରୁ ଥଣ୍ଡା ପାଣି କି କୋଲ୍ଡ ଡ୍ରିଙ୍କସ ପିଏ ନାହିଁ। ସକାଳେ ଅଦା ମିଶା ଚା’ ପିଏ।
ମନକୁ ତାଜା ରଖେ ଜୁସ୍, ସୁପ୍
ସକାଳେ ଉଠିବା ପରେ ଅଳ୍ପ ସମୟ ଯୋଗ କରେ। ଯୋଗ ଦ୍ୱାରା ମନକୁ ଫୂର୍ତ୍ତି ମିଳେ। ବ୍ରେକ୍ଫାଷ୍ଟରେ ଘର ତିଆରି ଖାଦ୍ୟ ସହିତ ଫ୍ରୁଟ୍ ଜୁସ ସାମିଲ ଥାଏ। ଏହାବ୍ୟତୀତ ସନ୍ଧ୍ୟା ସମୟରେ ଘରେ ଥିଲେ ପ୍ରାୟ ସମୟ ସୁପ୍ ପିଏ। ବାର ଅନୁସାରେ ଭେଜ୍ କିମ୍ବା ନନଭେଜ ସୁପ୍ ପିଇଥାଏ। ଚିକେନ୍ ଓ ଏଗ୍ ଫ୍ଲାୱାର ସୁପ୍ ଭଲପାଏ।
