ରେଷ୍ଟୁରାଣ୍ଟରେ ମାତ୍ର ୧୦୦୦ ଟଙ୍କାର ଖାଦ୍ୟ ଖାଇ ଓ୍ବେଟରଙ୍କୁ ୨ ଲକ୍ଷ ଟଙ୍କାର ଦେଲେ ଟିପ୍ସ: ତା’ପରେ ଆସିଲା ଟ୍ବିଷ୍ଟ୍‌
12:49 pmSeptember 20, 2022 / 07

ପ୍ରାୟତଃ ଲୋକମାନେ ରେଷ୍ଟୁରାଣ୍ଟ କିମ୍ବା ହୋଟେଲକୁ ଗଲେ ଭଲ ସେବା ପାଇଁ ୱେଟରଙ୍କୁ ଏକ ଟିପ୍ସ ମଧ୍ୟ ଦିଅନ୍ତି। କିଛି ଲୋକ ଟିପ୍ସରେ ଆଶାଠୁ ଅଧିକ ଟଙ୍କା ଦିଅନ୍ତି। ଟଙ୍କା ପାଇ ଓ୍ବେଟର ମଧ୍ୟ ଖୁସି ହୋଇଯାନ୍ତି। ଆଜିକାଲି ଆମେରିକାରେ ‘ଟିପ୍ସ ଫର୍‌ ଜେଶଶ୍‌’ ଅଭିଯାନରେ ଲୋକମାନେ ରେଷ୍ଟୁରାଣ୍ଟକୁ ଯାଇ ସେଠାରେ ଥିବା ୱେଟର କିମ୍ବା କର୍ମଚାରୀଙ୍କୁ ବହୁ ପରିମାଣର ଦାନ ଦେଇ ଖୁସି କରୁଛନ୍ତି।
ଆମେରିକାର ପେନସିଲଭାନିଆର ଆଲଫ୍ରେଡୋ କାଫେ ନାମକ ଏକ ସ୍ଥାନ ଅଛି, ଯେଉଁଠାରେ ମାରିଆନା ଲାମବର୍ଟ ନାମକ ଜଣେ ମହିଳା ୱେଟର କାମ କରନ୍ତି। ପ୍ରାୟ ତିନିମାସ ପୂର୍ବେ ଏରିକ ସ୍ମିଥ ନାମକ ଜଣେ ବ୍ୟକ୍ତି କାଫେକୁ ଆସି ପ୍ରାୟ ଏକ ହଜାର ଟଙ୍କା ମୂଲ୍ୟର ଖାଦ୍ୟ ଖାଇଥିଲେ, କିନ୍ତୁ ଗଲା ବେଳେ ସେ ଟିପ୍ସ ଆକାରରେ ମାରିଆନାଙ୍କୁ ୨ ଲକ୍ଷ ଟଙ୍କା ଦେଇଥଲେ। ଏତେ ଟଙ୍କା ପାଇଁ ମାରିଆନା ବହୁତ ଆଶ୍ଚର୍ଯ୍ୟ ହୋଇଗଲେ। ଏହା ଦେଖି କହିଥିଲେ ‘ଟିପ୍ସ ଫର୍‌ ଜେଶଶ୍‌’ ଅଭିଯାନ ଦ୍ୱାରା ପ୍ରଭାବିତ ହୋଇ ସେ ଏହି ନିଷ୍ପତ୍ତି ନେଇଛନ୍ତି। କିନ୍ତୁ ଦୁଇ ମାସ ପରେ ମାରିଆନା ଏପରି ଏକ ଝଟକା ପାଇଥିଲେ, ଯାହା କେହି ଆଶା କରି ନ ଥିଲେ।
ଏରିକ ସ୍ମିଥ ଗତ ମାସରେ ରେଷ୍ଟୁରାଣ୍ଟକୁ ଏକ ଚିଠି ପଠାଇ ତାଙ୍କ ଟଙ୍କା ଫେରସ୍ତ କରିବାକୁ କହିଥିଲେ। କ୍ରେଡିଟ କାର୍ଡର ଚାର୍ଜ ବ୍ୟାକ ନିୟମ ଅନୁଯାୟୀ ଏକ ଫେରସ୍ତ ଦାବି ଦାଖଲ କରିଥିଲେ। ରେଷ୍ଟୁରାଣ୍ଟ ପକ୍ଷରୁ ଫେସବୁକରେ ସ୍ମିଥଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରିଥିଲା, କିନ୍ତୁ କୌଣସି ସୁଫଳ ମିଳି ନ ଥିଲା। ଏହା ପରେ ରେଷ୍ଟୁରାଣ୍ଟ କୋର୍ଟର ଦ୍ୱାରସ୍ଥ ହୋଇଥିଲା। ରେଷ୍ଟୁରାଣ୍ଟ ମ୍ୟାନେଜର ଜ୍ୟାକ ଯାଦବସନ କହିଛନ୍ତି,ଏହି ଘଟଣା ମୋତେ ବହୁତ ନିରାଶ କରିଛି। ଆମେ ଭାବୁଥିଲୁ ପ୍ରକୃତରେ କେହି ଜଣେ ଏପରି ଭଲ କାମ କରିବାକୁ ଚାହୁଁଛନ୍ତି, କିନ୍ତୁ ବର୍ତ୍ତମାନ ଆମେ ବିଶ୍ୱାସ ହରାଇଛୁ। ଏନେଇ ମାଜିଷ୍ଟ୍ରେଟ କୋର୍ଟରେ ଏକ ମାମଲା ରୁଜୁ ହୋଇଛି।