ବାଲେଶ୍ୱର ଅଫିସ, ୧୭।୬-ବାଲେଶ୍ୱର ରେଳଷ୍ଟେଶନ ଟିକେଟ କାଉଣ୍ଟରରୁ ଜଣେ ଦଲାଲ ବାରମ୍ବାର ଟିକେଟ କାଟିବାକୁ ଯା’ଆସ କରୁଥିବା ଦେଖି ବାଲେଶ୍ୱର ଆରପିଏଫ୍ ଏବଂ ଖଡଗପୁର ରେଲୱେ କ୍ରାଇମବ୍ରାଞ୍ଚ ଟିମ୍ ମିଳିତ ଭାବେ ଚଢାଉ କରିଥିଲେ। ଦଲାଲଙ୍କୁ ଗିରଫ କରାଯିବା ସହ ତାଙ୍କଠାରୁ ୩ ଲକ୍ଷ ୯୨ ହଜାର ୩୭୦ ଟଙ୍କାର ଟିକେଟ ଏବଂ ନଗଦ ୬ହଜାର ୮ଶହ ଟଙ୍କା ଜବତ କରାଯାଇଛି। ଏ ସମ୍ପର୍କରେ ରେଲୱେ କ୍ରାଇମବ୍ରାଞ୍ଚ ଇନ୍ସପେକ୍ଟର ସୁରେଶ କୁମାର ସୂଚନା ଦେଇଛନ୍ତି।
ପଶ୍ଚିମବଙ୍ଗର ଦାନ୍ତୁନୁ ଥାନା ନେକଡୁଶୁନୀ ଅଞ୍ଚଳର ନିତାଇ ଦାସ (୫୯) ଦୀର୍ଘଦିନ ଧରି ବିଭିନ୍ନ ଟିକେଟ କାଉଣ୍ଟରରୁ ଟିକେଟ କାଟି ଗୌରାଙ୍ଗ ତୀର୍ଥଯାତ୍ରୀ ଏଜେନ୍ସି ମାଧ୍ୟମରେ ଚୋରା ରେଲୱେ ଟିକେଟ କାରବାରରେ ସମ୍ପୃକ୍ତ ଥିଲେ। ପୂର୍ବରୁ ଅଭିଯୋଗ ପାଇ କ୍ରାଇମବ୍ରାଞ୍ଚ ଟିମ୍ ନିତାଇଙ୍କୁ ଅନୁସରଣ କରିଆସୁଥିଲେ ମଧ୍ୟ ସଫଳତା ପାଇପାରି ନ ଥିଲେ। ରବିବାର ସକାଳେ ନିତାଇ ବାଲେଶ୍ୱର ରେଳଷ୍ଟେଶନରେ ଟିକେଟ କାଟୁଥିଲା ବେଳେ ଧରାପଡିଛନ୍ତି ା ତାଙ୍କଠାରୁ ୧୧ଟି ବିଭିନ୍ନ ସ୍ଥାନର ଲାଇଭ ଟିକେଟ, ୨୨ଟି ଅଗଷ୍ଟ ପର୍ଯ୍ୟନ୍ତ ଅବଧି ଥିବା ସଂରକ୍ଷଣ ଟିକେଟ ସହିତ ୧ ଲକ୍ଷ ୫୫ ହଜାର ୧୩୦ ଟଙ୍କାର ଅବଧି ପୂରି ଯାଇଥିବା( କ୍ୟାନସ୍ଲେଶନ) ଟିକେଟ ସହିତ ନଗଦ ୬ ହଜାର ୮ ଶହ ଟଙ୍କା ଜବତ କରାଯାଇଥିବା ସିଜିଂ ଅଫିସର ଏଏସ୍ଆଇ ସୁବାସ ଚଦ୍ର ମୁଦୁଲି ପ୍ରକାଶ କରିଛନ୍ତି ା ଏ ନେଇ ଆରପିଏଫ୍ ପୋଷ୍ଟରେ ବାଲେଶ୍ୱର କେସ୍ (ନଂ.୫୧୦/୧୯) ମାମଲା ରୁଜୁ କରାଯାଇଛି। ରେଲୱେ ଆକ୍ଟ ଦଫା ୧୪୩ ଅନୁଯାୟୀ ତାଙ୍କୁ କୋର୍ଟଚାଲାଣ କରାଯାଇଥିବା ବିଭାଗୀୟ ସୂତ୍ରରୁ ପ୍ରକାଶ ା ଚଢାଉରେ ହେଡ୍ କନଷ୍ଟେବଳ ଗଦାଧର ପାତ୍ର, କନଷ୍ଟେବଳ ସାମଲ କୁମାର ଦାସ, ପବନ କୁମାର ପାଣ୍ଡେ ଓ ଗୁଡୁ କୁମାର ଶାହା ପ୍ରମୁଖ ସାମିଲ ଥିଲେ।
