ରାଜକୋଟ୍,୧୨।୩ (ପି.ଟି.)- ଦେଶର ସର୍ବବୃହତ୍ ଘରୋଇ କ୍ରିକେଟ ଟୁର୍ନାମେଣ୍ଟ ରଣଜୀ ଟ୍ରଫିର ଫାଇନାଲ ମ୍ୟାଚ୍ ରୋମାଞ୍ଚକ ମୋଡରେ ପହଞ୍ଚିଛି। ସ୍ଥାନୀୟ ସୌରାଷ୍ଟ୍ର କ୍ରିକେଟ ଆସୋସିଏଶନ ଗ୍ରାଉଣ୍ଡରେ ଚାଲିଥିବା ଏହି ଫାଇନାଲ ମ୍ୟାଚ୍ ଅମୀମାଂସିତ ହେବା ଏକ ପ୍ରକାର ନଶ୍ଚିତ। ତେବେ ପ୍ରଥମ ଇନିଂସ ଅଗ୍ରଣୀ ଭିତ୍ତିରେ ଫାଇନାଲ ମ୍ୟାଚର ଫଳାଫଳ ନିର୍ଣ୍ଣୟ କରାଯିବ। ତେଣୁ ମ୍ୟାଚ୍ର ପଞ୍ଚମ ତଥା ଅନ୍ତିମ ଦିବସର ଖେଳ ଉପରେ ସମସ୍ତଙ୍କ ନଜର ରହିଛି।
ଟସ୍ ଜିତି ସୌରାଷ୍ଟ୍ର ପ୍ରଥମ ଇନିଂସରେ ୧୭୧.୫ ଓଭରରେ ୪୨୫ ରନ କରି ଅଲଆଉଟ ହୋଇଥିଲା। ଜବାବରେ ପ୍ରଥମ ଇନିଂସ ଆରମ୍ଭ କରି ବେଙ୍ଗଲ୍ ଗୁରୁବାର ଚତୁର୍ଥ ଦିବସ ଖେଳି ଶେଷ ସୁଦ୍ଧା ୧୪୭ ଓଭରରେ ୬ ଉଇକେଟ ହରାଇ ୩୫୪ ରନ ସଂଗ୍ରହ କରିଛି। ଫଳରେ ବେଙ୍ଗଲ ୪ ଉଇକେଟ ହାତରେ ରଖି ୭୧ ରନ ପଛରେ ପଡିଛି। ଇନିଂସ ଅଗ୍ରଣୀ ହେବା ପାଇଁ ବେଙ୍ଗଲ୍ ଆଉ ୭୨ ରନ ଆବଶ୍ୟକ କରୁଥିବା ବେଳେ ସୌରାଷ୍ଟ୍ର ୪ ଉଇକେଟ ଦରକାର କରୁଛି। ଷ୍ଟମ୍ପ ଅପସାରଣ ବେଳକୁ ଅନୁଷ୍ଟୁପ୍ ମଜୁମ୍ଦାର ୫୮ ରନର ଅର୍ଦ୍ଧଶତକୀୟ ପାଳି ଖେଳି ଓ ଅର୍ଣ୍ଣବ ନନ୍ଦୀ ୨୮ ରନ କରି ଅପରାଜିତ ରହିଛନ୍ତି। ସପ୍ତମ ଉଇକେଟରେ ନନ୍ଦୀ ଓ ମଜୁମ୍ଦାର ଅପରାଜିତ ୯୧ ରନ କରି ସୌରାଷ୍ଟ୍ରକୁ ନିରାଶ କରିଛନ୍ତି। ଜୟଦେବ ଉନାଡ଼କଟଙ୍କ ବୋଲିଂବେଳେ ଅଙ୍ଗୁଳିରେ ଆଘାତ ପାଇଥିଲେ। ଅନ୍ୟପକ୍ଷରେ ମଜୁମ୍ଦାର ସାହସ ଦେଖାଇ ଲଢୁଆ ବ୍ୟାଟିଂ କରି ବେଙ୍ଗଲକୁ ବିଜୟ ନିକଟତର କରିଛନ୍ତି। ନନ୍ଦୀ ମଧ୍ୟ ମଜୁମ୍ଦାରଙ୍କୁ ଆବଶ୍ୟକୀୟ ସହାୟତା ପ୍ରଦାନ କରିଛନ୍ତି। ଘରୋଇ ସୌରଷ୍ଟ୍ର ଦଳର ଦୁର୍ବଳ ଫିଲ୍ଡିଂର ଫାଇଦା ଉଠାଇ ବେଙ୍ଗଲ ଚତୁର୍ଥ ଦିନ ଅନ୍ତିମ ସେସନରେ ୯୦ ରନ ସଂଗ୍ରହ କରିଥିଲା। ମଜୁମ୍ଦାର ୧୦ ରନ କରିଥିବା ବେଳେ ପ୍ରଥମ ସ୍ଲିପ୍ରେ ହାର୍ଭିକ ଦେଶାଇ ତାଙ୍କ କ୍ୟାଚ୍ ହାତଛଡ଼ା କରିଥିଲେ। ଏହା ସୌରାଷ୍ଟ୍ର ପାଇଁ ବେଶ୍ ମହଙ୍ଗା ସାବ୍ୟସ୍ତ ହୋଇଛି।
ତୃତୀୟ ଦିନର ଅସମାପ୍ତ ପ୍ରଥମ ଇନିଂସ ସ୍କୋର ୧୩୪/୩ରୁ ଖେଳ ଆରମ୍ଭ କରିଥିଲା ବେଙ୍ଗଲ। ଓଭରନାଇଟ ବ୍ୟାଟ୍ସମ୍ୟାନ ସୁଦୀପ ଚାଟାର୍ଜୀ ଓ ରିଦ୍ଧିମାନ ଶାହା ଯଥାକ୍ରମେ ୪୭ ଓ ୪ ରନରୁ ଖେଳ ଆରମ୍ଭ କରିଥିଲେ। ତେବେ ଚାଟାର୍ଜୀ ୮୧ ରନ କରିଥିବା ବେଳେ ଧର୍ମେନ୍ଦ୍ରସିନ ଜାଡେଜାଙ୍କ ବଲ୍ରେ ଶର୍ଟ ଲେଗ୍ରେ ଭିସବରାଜ ଜାଡେଜାଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ସେହିପରି ରିଦ୍ଧିମାନ ୬୪ ରନ କରିଥିତ୍ବା ବେଳେ ପ୍ରେରକ ମଙ୍କଡଙ୍କ ଦ୍ୱାରା ବୋଲ୍ଡ ହୋଇଥିଲେ। ଚତୁର୍ଥ ଉଇକେଟରେ ଚାଟାର୍ଜୀ ଓ ରିଦ୍ଧିମାନ ଲଢୁଆ ୧୦୧ ରନର ଭାଗୀଦାରି ସ୍ଥାପନ କରି ବେଙ୍ଗଲ ଆଶା ଉଜ୍ଜୀବିତ ରଖିଥିଲେ ସୌରାଷ୍ଟ୍ର ବୋଲରଙ୍କୁ ହତାଶ କରିଥିଲେ। ମର୍ଣ୍ଣିଂ ସେସନରେ ସୌରାଷ୍ଟ୍ର ଗୋଟିଏ ହେଲେ ବି ଉଇକେଟ ହାସଲ କରିପାରି ନ ଥିଲା। ଏହାପରେ ୧୬ ରନ କରି ଶାହାବାଜ ଅହମ୍ମଦ ଚେତନ ସାକାରିୟାଙ୍କ ଦ୍ୱାରା ବୋଲ୍ଡ ହୋଇଥିଲେ। ବୋଲିଂରେ ସୌରାଷ୍ଟ୍ର ତରଫରୁ ଜାଡେଜା ଓ ମଙ୍କଡ ୨ଟି ଲେଖାଏ, ସାକାରିୟା ଓ ଚିରାଗ ଜାନୀ ଗୋଟିଏ ଲେଖାଏ ଉଇକେଟ ହାସଲ କରିଥିଲେ।
ସଂକ୍ଷିପ୍ତ ସ୍କୋର:
ସୌରାଷ୍ଟ୍ର ପ୍ରଥମ ଇନିଂସ: ୪୨୫ ଅଲଆଉଟ।
ବେଙ୍ଗଲ ପ୍ରଥମ ଇନିଂସ: ୩୫୪/୬
(ଚାଟାର୍ଜୀ- ୮୧, ରିଦ୍ଧିମାନ- ୬୪, ମଜୁମ୍ଦାର- ୫୮*, ନନ୍ଦୀ- ୨୮*, ଧର୍ମେନ୍ଦ୍ରସିନ ଜାଡେଜା- ୨/୧୦୬, ପ୍ରେରକ ମଙ୍କଡ- ୨/୪୫, ସାକରିୟା- ୧/୫୨, ଜାନୀ- ୧/୩୨)।
