କଟକ ଅଫିସ,୩୧ା୧- ଟାଙ୍ଗୀ ସ୍ଥିତ ଡ୍ରିମ୍ସ ଗ୍ରାଉଣ୍ଡରେ ଅନୁଷ୍ଠିତ ରଣଜୀ ଟ୍ରଫି କ୍ରିକେଟ ମ୍ୟାଚରେ ଓଡ଼ିଶା ଚମକପ୍ରଦ ବିଜୟ ହାସଲ କରିଛି। ପେସ୍ ବୋଲରଙ୍କ ପ୍ରଭାବଶାଳୀ ବୋଲିଂ ସହାୟତାରେ ଓଡ଼ିଶା ଏକ ଇନିଂସ ଓ ୩ରନରେ ଆସାମକୁ ପରାସ୍ତ କରିଛି। ଅଲରାଉଣ୍ଡ ପ୍ରଦର୍ଶନ କରିଥିବା ଦେବବ୍ରତ ପ୍ରଧାନ ମ୍ୟାନ ଅଫ ଦି ମ୍ୟାଚ୍ ବିବେଚିତ ହୋଇଛନ୍ତି। ଏଥି ସହିତ ଏଲିଟ୍ ଗ୍ରୁପ-ସି ପଏଣ୍ଟ ଟେବୁଲର ଶୀର୍ଷ ସ୍ଥାନକୁ ଫେରିଛି ଓଡ଼ିଶା। ୭ ମ୍ୟାଚ୍ରୁ ୫ ବିଜୟ ଓ ଗୋଟିଏ ଲେଖାଏ ପରାଜୟ, ଡ୍ର ସହିତ ଓଡ଼ିଶା ୩୫ ପଏଣ୍ଟ ହାସଲ କରିଛି। ଆସନ୍ତା ୪ ତାରିଖରେ ମହାରାଷ୍ଟ୍ରର ନାଗୋଥାନେସ୍ଥିତ ରିଲାଏନ୍ସ କ୍ରିକେଟ ଷ୍ଟାଡିୟମରେ ମହାରାଷ୍ଟ୍ର ବିପକ୍ଷରେ ଦଳ ପରବର୍ତ୍ତୀ ମ୍ୟାଚ୍ ଖେଳିବ।
ଆସାମ ୧୯୫ରେ ସୀମିତ
ଓଡ଼ିଶାର ପ୍ରଥମ ଇନିଂସ ୪୩୬ରନ ଜବାବରେ ଆସାମ ୨୩୮ରନରେ ଅଲଆଉଟ ହୋଇଥିଲା। ଫଲୋଅନ ପାଇ ଦ୍ୱିତୀୟ ଇନିଂସ ବ୍ୟାଟିଂ ଆରମ୍ଭ କରିଥିବା ଗୋକୁଳ ଶର୍ମାଙ୍କ ନେତୃତ୍ୱାଧୀନ ଆସାମ ତୃତୀୟ ଦିନ ଖେଳ ଶେଷ ସୁଦ୍ଧା ବିନା ଉଇକେଟରେ ୧୦୨ରନ କରିଥିଲା। ଦୁଇ ଓପନର ଶୁଭମ ମଣ୍ଡଳ ୪୦ରନ ଓ କୁନାଲ ସାଇକିଆ ୬୨ରନରେ ଅପରାଜିତ ଥିଲେ। ମ୍ୟାଚ୍କୁ ବଞ୍ଚାଇବା ଲକ୍ଷ୍ୟରେ ଥିଲା ଭ୍ରମଣକାରୀ ଆସାମ। ଏପରିକି ୯୬ରନ ପଛରେ ଥିବାରୁ ଓଡ଼ିଶା ସମ୍ମୁଖରେ ଆସାମ ବିଜୟଲକ୍ଷ୍ୟ ଧାର୍ଯ୍ୟ କରିବ ବୋଲି ଆଶା କରାଯାଉଥିଲା। ହେଲେ ଦୁଇ ଓପନରଙ୍କୁ ବାଦ୍ ଦେଇ ଅନ୍ୟ ସମସ୍ତ ବ୍ୟାଟ୍ସମ୍ୟାନ ବିଫଳ ହୋଇଥିଲେ। କୁନାଲ ୭୨ରନ କରିଥିବା ବେଳେ ଦେବବ୍ରତ ପ୍ରଧାନଙ୍କ ବଲରେ ବଡ୍ ଶଟ୍ ଖେଳିବାକୁ ଯାଇ ତ୍ରୁଟି କରିଥିଲେ। ସୂର୍ଯ୍ୟକାନ୍ତ ପ୍ରଧାନଙ୍କ ହାତରେ ଧରାପଡ଼ି ପ୍ୟାଭିଲିୟନ ଫେରିବା ସହ ଓଡ଼ିଶାକୁ ବହୁ ମୂଲ୍ୟବାନ ବ୍ରେକଥ୍ରୁ ମିଳିଥିଲା। ପରେ ରିଷଭ ଦାସ ୭ ଓ ଅଧିନାୟକ ଗୋକୁଳ ୯ରନ କରି ଦେବବ୍ରତଙ୍କ ପରବର୍ତ୍ତୀ ଶିକାର ହୋଇଥିଲେ। ଦଳ ୧୫୬ରନରେ ୩ଟି ଉଇକେଟ ହରାଇଥିବା ବେଳେ ଗୋଟିଏ ପାର୍ଶ୍ୱରେ ଧୈର୍ଯ୍ୟର ସହ ବ୍ୟାଟିଂ କରିଥିଲେ ବାମହାତୀ ବ୍ୟାଟ୍ସମ୍ୟାନ ତଥା ଓପନର ଶୁଭମ ମଣ୍ଡଳ। ଶୁଭମ ୭୪ରନ କରିଥିବା ବେଳେ ରାଜେଶ ମହାନ୍ତିଙ୍କ ଦ୍ରୁତ ବଲରେ ଶାନ୍ତନୁ ମିଶ୍ରଙ୍କ ଦ୍ୱାରା କ୍ୟାଚ୍ ଆଉଟ ହୋଇଥିଲେ। ଏହି ଉଇକେଟ ପରେ ଆସାମର ମଧ୍ୟକ୍ରମ ବ୍ୟାଟିଂ ଲାଇନଅପ ଭୁଶୁଡ଼ି ପଡ଼ିଥିଲା। ରିୟାନ ପରାଗ ୧, ସାହିଲ ଜୈନ ୫, ବିପ୍ଳବ ସାଇକିଆ ୧, ରଞ୍ଜିତ ମାଲି ୧, ପ୍ରୀତମ ଦାସ ୪, ଅରୁପ ଦାସ ୧୩ରନରେ ଆଉଟ ହୋଇଥିବା ବେଳେ କ୍ରୀଷ୍ଣା ଦାସ ୮ରନରେ ଅପରାଜିତ ଥିଲେ। ୧୯୫ରନରେ ଆସାମର ଦ୍ୱିତୀୟ ଇନିଂସ ସୀମିତ ରହିଯାଇଥିଲା। ଓଡ଼ିଶା ପକ୍ଷରୁ ରାଜେଶ ମହାନ୍ତି ସର୍ବାଧିକ ୪ଟି ଉଇକେଟ ଅକ୍ତିଆର କରିଥିବା ବେଳେ ସୂର୍ଯ୍ୟକାନ୍ତ ପ୍ରଧାନ ଓ ଦେବବ୍ରତ ପ୍ରଧାନଙ୍କୁ ୩ଟି ଲେଖାଏ ଉଇକେଟ ମିଳିଥିଲା।
ସଂକ୍ଷିପ୍ତ ସ୍କୋର
ଓଡ଼ିଶା ପ୍ରଥମ ଇନିଂସ: ୪୩୬/ଅଲଆଉଟ।
ଆସାମ ପ୍ରଥମ ଇନିଂସ: ୨୩୮/ଅଲଆଉଟ।
ଆସାମ ଦ୍ୱିତୀୟ ଇନିଂସ: ୧୯୫/ଅଲଆଉଟ(ଶୁଭମ୍ ମଣ୍ଡଳ-୭୪, କୁନାଲ ସାଇକିଆ-୭୨, ରାଜେଶ ମହାନ୍ତି ୧୦.୪-୩-୩୦-୪, ଦେବବ୍ରତ ପ୍ରଧାନ ୧୮-୪-୫୩-୩, ସୂର୍ଯ୍ୟକାନ୍ତ ପ୍ରଧାନ ୧୮-୩-୫୩-୩।
