ଯାଜପୁର ଅଫିସ,୩ା୩: ଏକାଧିକ ଥର ପ୍ରେମ ନିବେଦନ କରି ବିଫଳ ହେବା ପରେ ଯୁବତୀଙ୍କ ଘରେ ନିଆଁ ଲଗାଇ ଦେଇଛନ୍ତି ଜଣେ ଯୁବକ। ଏହି ଘଟଣା ସମଗ୍ର ଯାଜପୁର ଜିଲାରେ ଚର୍ଚ୍ଚାର ବିଷୟ ହୋଇଛି। ସମ୍ପୃକ୍ତ ଯୁବତୀଙ୍କ ପରିବାର ପକ୍ଷରୁ ଏନେଇ ରବିବାର ଅଭିଯୋଗ ହେବା ପରେ କୋରେଇ ଥାନାରେ ଏକ ମାମଲା (ନଂ. ୫୧/୨୦୨୦) ରୁଜୁ ହୋଇଥିବା ଥାନାଧିକାରୀ ରଞ୍ଜିତ କୁମାର ମହାନ୍ତି ସୂଚନା ଦେଇଛନ୍ତି । ଅଭିଯୋଗ ଅନୁଯାୟୀ କୋରେଇ ଥାନା ଅର୍ନ୍ତଗତ ରଣେସରପୁର ଗ୍ରାମର ଜଣେ ଯୁବତୀ ଭୁବନେଶ୍ୱରରେ ରହି ଏକ ଘରୋଇ ସଂସ୍ଥାରେ ଚାକିରି କରୁଥିଲେ । ସେଠାରେ କଟକ ଜିଲା ଅଡସପୁର ଅଞ୍ଚଳର ପପୁ ସୁନ୍ଦରାୟ ଯୁବତୀଙ୍କୁ ବାରମ୍ବାର ପ୍ରେମ ନିବେଦନ କରି ଆସୁଥିଲେ। କିନ୍ତୁ ଯୁବତୀ ଜଣଙ୍କ ପପୁଙ୍କ ନିବେଦନ ନ ମାନିବାରୁ ତାଙ୍କୁ ନାନା ହଇରାଣ କରିବା ସହିତ ଜୀବନରୁ ମାରିଦେବାକୁ ଧମକ ଦେଉଥିଲେ। ଏ ବିଷୟରେ ପୂର୍ବରୁ ଯୁବତୀ ଜଣଙ୍କ ମଞ୍ଚେଶ୍ୱର ଥାନାରେ ଅଭିଯୋଗ କରି ଭୁବନେଶ୍ୱର ଛାଡି ଦେଇଥିଲେ। କିନ୍ତୁ ଅଭିଯୁକ୍ତ ପପୁ ଯୁବତୀଙ୍କ ପିଛା ଛାଡି ନ ଥିଲେ। ଏପରିକି ସେ ଯୁବତୀଙ୍କ ଘର ଆସିବାକୁ ପଛାଇ ନ ଥିଲେ। ରବିବାର ପପୁ ରଣେଶପୁର ଗ୍ରାମକୁ ଆସି ଯୁବତୀ ଓ ତାଙ୍କ ମା’ଙ୍କୁ ଧମକ ଦେଇଥିଲେ। ତେବେ ଯୁବତୀଙ୍କର ଅନ୍ୟତ୍ର ବାହାଘର ଠିକ ହୋଇଥିବା ଖବର ପାଇ ରବିବାର ରାତିରେ ସମସ୍ତେ ଶୋଇଥିବାବେଳେ ପପୁ ଯୁବତୀଙ୍କ ଘରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ। ଏଥିରେ ଘରଟି ସମ୍ପୂର୍ଣ୍ଣ ଜଳିଯାଇଥିବାବେଳେ କେହି ମୃତାହତ ହୋଇ ନଥିବା ଜଣାପଡିଛି। ରିପୋର୍ଟ ଲେଖାହେବା ପର୍ଯ୍ୟନ୍ତ କାହାରିକୁ ଗିରଫ କରାଯାଇ ନାହିଁ।
