ଅନୁଗୋଳ ଅଫିସ୍, ୬।୨ – ବିନା ନୋଟିସରେ ମେସ୍ରେ ତାଲା ପକାଇ ହଷ୍ଟେଲ ମ୍ୟାନେଜର କେଉଁଆଡ଼େ ଚାଲିଯାଇଥିବାରୁ ଅନୁଗୋଳ ସରକାରୀ ସ୍ବୟଂଶାସିତ ମହାବିଦ୍ୟାଳୟ ୨ ନମ୍ବର ହଷ୍ଟେଲ ଅନ୍ତେବାସୀଙ୍କ ମଧ୍ୟରେ ବୁଧବାର ଅସନ୍ତୋଷ ଦେଖାଦେଇଥିଲା। ଦୁଇଦିନ ଧରି ଖାଦ୍ୟ ମିଳି ନ ଥିବାରୁ ପ୍ରତିବାଦରେ ସେମାନେ ମହାବିଦ୍ୟାଳୟ ମୁଖ୍ୟ ଫାଟକ ସମ୍ମୁଖରେ ପୂର୍ବାହ୍ନରେ ଧାରଣା ଦେଇଥିଲେ। କିନ୍ତୁ କଲେଜ କର୍ତ୍ତୃପକ୍ଷ ସମସ୍ୟା ନେଇ କର୍ଣ୍ଣପାତ ନ କରିବାରୁ ଛାତ୍ରମାନେ ଶୋଭାଯାତ୍ରାରେ ଯାଇ ଜିଲାପାଳଙ୍କ ଉଦ୍ଦେଶ୍ୟରେ ଡେପୁଟି କଲେକ୍ଟର ବଇତୁରା ଦୀପଙ୍କୁ ଏକ ଦାବିପତ୍ର ପ୍ରଦାନ କରିଥିଲେ। ପରେ କଲେଜ ଅଧ୍ୟକ୍ଷ ଉଦୟନାଥ ବେହେରା ଏକ ଜରୁରୀ ବୈଠକ ଡାକି ସମସ୍ୟାର ସମାଧାନ କରିବା ପରେ ପରିସ୍ଥିତି ସ୍ବାଭାବିକ ହୋଇଥିଲା।
ଛାତ୍ରମାନଙ୍କ କହିବା ଅନୁଯାୟୀ, ମହାବିଦ୍ୟାଳୟର ୨ନଂ ହଷ୍ଟେଲରେ ରହୁଥିବା ୧୦୬ ଜଣ ଛାତ୍ରଙ୍କୁ ଦୁଇ ଦିନ ହେବ ଖାଦ୍ୟ ଦିଆଯାଇ ନାହିଁ। କୌଣସି ନୋଟିସ୍ କି ପୂର୍ବ ସୂଚନା ନ ଦେଇ ହଠାତ୍ ମେସ୍ ମ୍ୟାନେଜର ତାଲା ପକାଇ ପଳାଇ ଯାଇଥିବାରୁ ଏପରି ପରିସ୍ଥିତି ଉପୁଜିଥିଲା। ଏ ନେଇ କଲେଜ କର୍ତ୍ତୃପକ୍ଷଙ୍କୁ ଅବଗତ କରିଥିଲେ ମଧ୍ୟ କୌଣସି ସମାଧାନ କରାଯାଇ ନ ଥିଲା। ତେଣୁ ବାଧ୍ୟ ହୋଇ ପୂର୍ବାହ୍ନରେ ମହାବିଦ୍ୟାଳୟ ଫାଟକ ସମ୍ମୁଖରେ ଧାରଣା ଦିଆଯାଇଥିଲା। କିନ୍ତୁ କଲେଜ ଅଧ୍ୟକ୍ଷ ନ ଆସିବାରୁ ଜିଲାପାଳଙ୍କ ଦ୍ୱାରସ୍ଥ ହୋଇଥିଲୁ ବୋଲି ଛାତ୍ରମାନେ ପ୍ରକାଶ କରିଛନ୍ତି। ଅପରପକ୍ଷରେ ବିନା ସୂଚନାରେ ଏତେ ସଂଖ୍ୟାରେ ଛାତ୍ର ଜିଲାପାଳଙ୍କ କାର୍ଯ୍ୟାଳୟକୁ ଯିବା ଦେଖି ପୋଲିସ ମଧ୍ୟ ତାଜୁବ ହୋଇଯାଇଥିଲା। ତୁରନ୍ତ ଅନୁଗୋଳ ଥାନା ଏସ୍ଆଇ ବିପ୍ଳବ ସାହୁଙ୍କ ନେତୃତ୍ୱରେ ଏକ ଟିମ୍ ସେଠାରେ ପହଞ୍ଚି ଛାତ୍ରଙ୍କୁ ବୁଝାଶୁଝା କରିବା ପରେ ସେମାନେ ଶାନ୍ତ ପଡ଼ିଥିଲେ। ପରେ କଲେଜ ଅଧ୍ୟକ୍ଷ ଏକ ବୈଠକ ଡକାଇଥିଲେ। ଏଥିରେ ଛାତ୍ର ପ୍ରତିନିଧିଙ୍କ ସହ ହଷ୍ଟେଲ ସୁପରିଣ୍ଟେଣ୍ଡେଣ୍ଟ ଓ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ। ମହାବିଦ୍ୟାଳୟ ଅଧ୍ୟକ୍ଷ ବେହେରା ତୁରନ୍ତ କଲେଜ ଏଷ୍ଟାବ୍ଲିଶମେଣ୍ଟ ପାଣ୍ଠିରୁ ହଷ୍ଟେଲ ଚାଲୁ କରିବାକୁ ୧ ଲକ୍ଷ ଟଙ୍କା ପ୍ରଦାନ କରିବା ପରେ ସନ୍ଧ୍ୟାରେ ମେସ୍ ଚାଲୁ ହୋଇଥିଲା। ଏ ସମ୍ପର୍କରେ ଅଧ୍ୟକ୍ଷ ବେହେରା କହିଛନ୍ତି, ହଷ୍ଟେଲ ଚାଲୁ କରିବାକୁ ୧ ଲକ୍ଷ ଟଙ୍କା ଦିଆଯାଇଛି। ମେସ୍ ମ୍ୟାନେଜରଙ୍କୁ ମଧ୍ୟ କାରଣଦର୍ଶାଅ ନୋଟିସ୍ ଜାରି କରାଯାଇଛି। ତାଙ୍କ ଉପରେ ଏଣିକି ସ୍ବତନ୍ତ୍ର ଦୃଷ୍ଟି ରଖାଯିବ ବୋଲି ଅଧ୍ୟକ୍ଷ ପ୍ରକାଶ କରିଛନ୍ତି।
