ଇସ୍ଲାମାବାଦ,୧୩।୯: ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁ ଗୋଟିଏ ପରେ ଗୋଟିଏ ସତ ମାନୁଛନ୍ତି। ଏବେ ଇମ୍ରାନ୍ କହିଛନ୍ତି କି ୧୯୮୦ରେ ଆଫଗାନିସ୍ତାନରେ ରୁଷ( ତତ୍କାଳିନ ସୋଭିଏତ୍ ସଂଘ)ବିରୋଧରେ ଲଢିବା ପାଇଁ ପାକିସ୍ତାନ ଜେହାଦିଙ୍କୁ ପ୍ରସ୍ତୁତ କରିଥିଲା। ଏମାନଙ୍କୁ ପ୍ରଶିକ୍ଷଣ ମଧ୍ୟ ଦିଆଯାଇଥିଲା। ତେବେ ରୁଷର ଏକ ଇଂରାଜୀ ନ୍ୟୁଜ ଚ୍ୟାନେଲକୁ ଦେଇଥିବା ସାକ୍ଷାତ୍କାରରେ ଇମ୍ରାନ ଏହା କହିଥିବା ସୂଚନା ମିଳିଛି। ଏହି ସାକ୍ଷାତ୍କାରରେ ଇମ୍ରାନ୍ ଆମେରିକାକୁ ମଧ୍ୟ ଟାର୍ଗେଟ କରିଥିଲେ। ଇମ୍ରାନ୍ କହିଥିଲେ ସେତେବେଳେ ଚାଲିଥିବା ଶୀତଳ ଯୁଦ୍ଧରେ ରୁଷ ବିରୋଧରେ ପାକିସ୍ତାନ ଆମେରିକାକୁ ସାହାଯ୍ୟ କରିଥିଲା। ରୁଷ ବିରୋଧରେ ଲଢିବାକୁ ଜେହାଦିଙ୍କୁ ପ୍ରଶିକ୍ଷଣ ମଧ୍ୟ୍ ଦିଆଯାଇଥିଲା। ହେଲେ ଏବେ ଆମେରିକା କହୁଛି ପାକିସ୍ତାନ ଆତଙ୍କବାଦ ସୃଷ୍ଟି କରୁଛି। ଆମେରିକା ପାଇଁ ପାକିସ୍ତାନ ଅନେକ ତ୍ୟାଗ କରିଥିବା ବେଳେ ଏବେ କିନ୍ତୁ ଆମେରିକା ପାକିସ୍ତାନକୁ ଦୋଷ ଦେଉଛି । ସେତେବେଳେ ପାକିସ୍ତାନର ପ୍ରାୟ ୭୦ ହଜାର ଲୋକଙ୍କୁ ଜୀବନ ହାରିବାକୁ ପଡିଥିଲା । ଏହାସହ ପାକିସ୍ତାନ ଅର୍ଥ ବ୍ୟବସ୍ଥାକୁ ଶହେ ଅରବ ଡଲାରରୁ ଊର୍ଦ୍ଧ୍ୱ କ୍ଷତି ସହିବାକୁ ପଡିଥିଲା। ତେବେ ଜେହାଦି ପ୍ରଶିକ୍ଷଣ ପାଇଁ ଆମେରିକାର ଏଜେନ୍ସି ସିଆଇଏ ଦ୍ୱାରା ଅର୍ଥ ଦିଆଯାଇଥିବା ଇମ୍ରାନ୍ କହିଛନ୍ତି।
