ନୂଆଦିଲ୍ଲୀ,୨୩-୧୨: ଦେଶରେ ମାନ୍ଦାବସ୍ଥା ଲାଗି ରହିବା ସତ୍ତ୍ୱେ ଶେୟାର ବଜାର ଉପରେ ବିଦେଶୀ ପୁଞ୍ଜି ନିବେଶକ(ଏଫ୍ପିଆଇ)ଙ୍କ ଭରସା ତୁଟିନି। ୨୦୧୯ରେ ବିଦେଶୀ ପୁଞ୍ଜି ନିବେଶକମାନେ ଶେୟାର ବଜାରରେ ୧.୩ ଲକ୍ଷ କୋଟି ଟଙ୍କାର ନେଟ୍ ନିବେଶ କରିଥିବା ଜଣାପଡିଛି। ଏହା ମଧ୍ୟରେ ଇକ୍ୱିଟିରେ ୯୭,୨୫୦ କୋଟି ଟଙ୍କା ସାମିଲ ରହିଛି। ଏହା ୬ ବର୍ଷରେ ସର୍ବାଧିକ। ୨୦୨୦ରେ ମଧ୍ୟ ଏହି ଧାରା ଲାଗି ରହିବ ବୋଲି ବଜାର ବିଶେଷଜ୍ଞମାନେ କହିିଛନ୍ତି। ବିଶ୍ୱସ୍ତରର ସୁଧହାର, ଆରବିଆଇ ଦ୍ୱାରା ବ୍ୟାଙ୍କଗୁଡିକୁ ପୁଞ୍ଜି ଯୋଗାଣ ଏବଂ ଘରୋଇ କର୍ପୋରେଟଗୁଡିକର ଲାଭ ଆଶାକୁ ନେଇ ବଜାର ଉପରେ ଏଭଳି ପ୍ରଭାବ ପଡିଥିବା ବଜାଜ କ୍ୟାପିଟାଲର ରିସର୍ଚ୍ଚ ଆଣ୍ଡ ଆଡଭାଇଜରି ମୁଖ୍ୟ ଆଲୋକ ଅଗରଓ୍ବାଲା କହିଛନ୍ତି।
ଏହାବାଦ ଆମେରିକା ଚାଇନା ବାଣିଜ୍ୟ ଯୁଦ୍ଧ, ଅଶୋଧିତ ତୈଳ ଦରରେ ବୃଦ୍ଧି, ଅଣ ବ୍ୟାଙ୍କିଙ୍ଗ ବିତ୍ତ ପ୍ରତିଷ୍ଠାନଗୁଡିକରେ ଋଣ ପ୍ରଦାନ ସମସ୍ୟା ଲାଗି ରହିଲେ ଏହା ପୁଞ୍ଜି ବଜାର ଉପରେ ପ୍ରଭାବ ପକାଇପାରେ ବୋଲି ସେ ମତ ଦେଇଛନ୍ତି। ଏହି ସମୟରେ ବିଦେଶୀ ନିବେଶକମାନେ ୧୯ ବିଲିୟନ ଡଲାରର ନେଟ ନିବେଶ କରିଛନ୍ତି। ଏଫପିଆଇଙ୍କ ଗ୍ରସ ପରଚେଜ ବା ମୋଟ କ୍ରୟ ୧୮ ଲକ୍ଷ କୋଟି ଟଙ୍କା ରହିଛି। ଇକ୍ୱିଟି,ଡେଟ ଏବଂ ହାଇବ୍ରିଡ ସିକ୍ୟୁରିଟିରେ ଏମାନେ ୧୬.୭ ଲକ୍ଷ ଟଙ୍କାର ସିକ୍ୟୁରିଟି କ୍ରୟ କରିଥିବା ଶେୟାର ବଜାର ଡିପୋଜିଟୋରୀ ଡାଟାରୁ ସାମ୍ନାକୁ ଆସିଛି। ୨୦୧୭ରେ ବିଦେଶୀ ନିବେଶକଙ୍କ ନେଟ ପୁଞ୍ଜି ଆଗମନ ପ୍ରାୟ ୨ ଲକ୍ଷ କୋଟି ଟଙ୍କା ରହିଥିଲା।
