ମୁମ୍ବାଇ: ନିଜର ଦମ୍ଦାର ଅଭିନୟ ଓ ଡ୍ୟାନ୍ସରେ ସମସ୍ତଙ୍କୁ ବାନ୍ଧି ରଖିଥିବା ବଲିଉଡ୍ର ଚାନ୍ଦିନୀଙ୍କ ମଙ୍ଗଳବାର ଜନ୍ମଦିନ। ୧୩ ଅଗଷ୍ଟ ୧୯୬୩ ଶିବକାଶୀରେ ଅଭିନେତ୍ରୀ ଶ୍ରୀଦେବୀଙ୍କ ଜନ୍ମ ହୋଇଥିଲା। ତାଙ୍କ ପିତା ତାମିଲ ହୋଇଥିବା ବେଳେ ମା’ ତେଲଗୁ ଥିଲେ। ଶ୍ରୀଙ୍କ ପିତା ଜଣେ ଭଲ ଓକିଲ ଥିଲେ। ଫିଲ୍ମ କ୍ୟାରିୟର କଥା କହିବାକୁ ଗଲେ ସେ ବହୁ ପ୍ରକାରର ଚରିତ୍ରରେ ଅଭିନୟ କରିଛନ୍ତି। ଶ୍ରୀଦେବୀଙ୍କୁ ହିନ୍ଦୀ ଫିଲ୍ମରେ ପ୍ରଥମ ‘ଫିମେଲ ସୁପରଷ୍ଟାର’ ବୋଲି କୁହାଯାଏ। କାରଣ ୯୦ ଦଶକରେ ଫିଲ୍ମ ହିଟ୍ ହେବା ପାଇଁ କୌଣସି ପୁରୁଷ ସୁପରଷ୍ଟାରଙ୍କ ଠାରୁ ଅଧିକ ଫିଲ୍ମରେ ଶ୍ରୀଦେବୀଙ୍କ ରହିବା ଜରୁରୀ ମନେକରାଯାଉଥିଲା। ସେହି ସମୟରେ ଦର୍ଶକ ଶ୍ରୀଙ୍କୁ ବେଶ୍ ପସନ୍ଦ କରୁଥିଲେ। ଶ୍ରୀ ମାତ୍ର ୪ ବର୍ଷ ବୟସରୁ ଚାଇଲ୍ଡ ଆର୍ଟିଷ୍ଟ ଭାବେ ନିଜ ଫିଲ୍ମ କ୍ୟାରିୟର ଆରମ୍ଭ କରିଥିଲେ। ଫିଲ୍ମ ‘ଥୁନେବାନ’ରୁ ଚାଇଲ୍ଡ ଆର୍ଟିଷ୍ଟ ଭାବେ ସେ ଡେବ୍ୟୁ କରିଥିଲେ। ସେହିପରି ମାତ୍ର ୧୩ ବର୍ଷ ବୟସରେ ସେ ବଡ଼ ପରଦାରେ ସାଉଥ ସୁପରଷ୍ଟାର ରଜନୀକାନ୍ତଙ୍କ ମା’ ଚରିତ୍ରରେ ନଜର ଆସିଥିଲେ। କେ.ବାଲାଚନ୍ଦରଙ୍କ ଫିଲ୍ମ ‘ଏକ ମୋଦରୁ ମୁଦିଚୁ’ରେ ସେ ରଜନୀକାନ୍ତଙ୍କ ସାବତ ମା’ ଚରିତ୍ରରେ ଅଭିନୟ କରିଥିଲେ। ଯଦି ବଲିଉଡ୍ର କଥା କହିବା ତେବେ ତାଙ୍କର ପ୍ରଥମ ଫିଲ୍ମ ହେଉଛି ‘ ସୋଲହା ଶାଓ୍ବନ’। ଏହି ଫିଲ୍ମ ୧୯୭୮ରେ ରିଲିଜ୍ ହୋଇଥିଲା। ହେଲେ ୧୯୮୩ରେ ରିଲିଜ୍ ହୋଇଥିବା ଫିଲ୍ମ ‘ହିମ୍ମତଓ୍ବାଲା’ରୁ ତାଙ୍କୁ ଏକ ନୂଆ ପରିଚୟ ମିଳିଥିଲା। କାରଣ ସେହି ବର୍ଷ ଏହି ଫିଲ୍ମ ବ୍ଲକବଷ୍ଟର ହୋଇଥିଲା। ସେହିପରି ୧୯୯୧ରେ ଫିଲ୍ମ ‘ଲମହେ’ରେ ତାଙ୍କର ଦମ୍ଦାର ଅଭିନୟ ପାଇଁ ଶ୍ରୀଙ୍କୁ ଫିଲ୍ମ ଫେୟାର ଆଓ୍ବାର୍ଡ ମଧ୍ୟ ମିଳିଥିଲା। ଏହାପରେ ଶ୍ରୀ କେବେ ଆଉ ପଛକୁ ଚାହିଁ ନାହାନ୍ତି। ଫିଲ୍ମ ‘ସଦ୍ମା’, ‘ଖୁଦା ଗଓ୍ବା’, ‘ଚାନ୍ଦନୀ’, ‘ଜୁଦାଇ’, ‘ଆର୍ମି’, ‘ଲାଡଲା’ ଓ ‘ଗୁମରାହ’ ସମେତ ପ୍ରାୟ ୩ଶହ ଫିଲ୍ମରେ ସେ କାମ କରିସାରିଛନ୍ତି। ୧୯୯୬ରେ ଶ୍ରୀ ପ୍ରଯୋଜକ ବୋନି କପୁରଙ୍କୁ ବିବାହ କରିବା ପରେ କିଛି ସମୟ ପାଇଁ ସେ ଲାଇମ ଲାଇଟ୍ରୁ ଦୂରେଇ ଯାଇଥିଲେ। ହେଲେ ୨୦୧୨ରେ ଫିଲ୍ମ ‘ଇଂଲିଶ ଭିଙ୍ଗଲିଶ୍’ରେ ବଲିଉଡ୍ ଚାନ୍ଦନୀଙ୍କ ପୁଣି ଥରେ ଦମ୍ଦାର ଏଣ୍ଟ୍ରି ହୋଇଥିଲା। ଏହି ଫିଲ୍ମ ବେଶ୍ ଲୋକପ୍ରିୟ ହୋଇଥିବା ବେଳେ ଶ୍ରୀଦେବୀଙ୍କ ଅଭିନୟକୁ ବେଶ୍ ପ୍ରଶଂସା କରାଯାଇଥିଲା। ତେବେ ୨୦୧୭ରେ ତାଙ୍କର ଶେଷ ଫିଲ୍ମ ‘ମମ୍’ ହୋଇଥିବା ବେଳେ ୨୦୧୮ ଫେବୃୟାରୀ ୨୪ରେ ତାଙ୍କର ଆକସ୍ମିକ ଭାବେ ମୃତ୍ୟୁ ହୋଇଥିଲା। ତାଙ୍କୁ ମୃତ୍ୟୁକୁ ନେଇ ଫିଲ୍ମ ଜଗତରେ ଶୋକର ଛାୟା ଖେଳିଯାଇଥିଲା।
