ଅନୁଗୋଳ ଅଫିସ,୧୨।୧୦: ଅନୁଗୋଳ ଜିଲା ବଅଁରପାଳ ଥାନା ଅନ୍ତର୍ଗତ ମହୀଧରପୁରରେ ଶନିବାର ୨ଟି ସ୍ଥାନରେ ଦୁର୍ଘଟଣା ଘଟିଛି। ଏଥିରେ ଜଣଙ୍କର ମୃତ୍ୟୁ ହୋଇଥିବା ବେଳେ ୨ ଜଣ ଗୁରୁତର ହୋଇଛନ୍ତି। ମୃତକ ହେଲେ ଶୁଶୁଡା ଅଞ୍ଚଳର ନରେଶ ମାହାଳିକ(୩୨) ଓରଫ ପିଣ୍ଟୁ। ଗୁରୁତର ଦ୍ୱୟ ହେଲେ ଶୁଶୁଡା ଅଞ୍ଚଳର ସତ୍ୟବ୍ରତ ମହାପାତ୍ର ଓ ଫୁଲପଡା ଅଞ୍ଚଳର ଯଶବନ୍ତ ତ୍ରିପାଠୀ।
ସୂଚନାଯୋଗ୍ୟ, ପିଣ୍ଟୁ ଓ ସତ୍ୟବ୍ରତ ବାଇକ୍ (ଓଡି୧୯ କେ ୭୦୫୨) ଯୋଗେ ମହୀଧରପୁରରୁ ଅନୁଗୋଳ ଅଭିମୁଖେ ଯାଉଥିଲେ। ହାଟଛକ ନିକଟରେ ଏକ ୪୦୭ ଟ୍ରକ୍ ତାଙ୍କୁ ସମ୍ମୁଖରୁ ଧକ୍କା ଦେଇଥିଲା। ଗୁରୁତର ଅବସ୍ଥାରେ ଉଭୟଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଡାକ୍ତର ପିଣ୍ଟୁଙ୍କୁ ମୃତ ଘୋଷଣା କରିଥିଲେ।
ସେହିପରି ମହୀଧରପୁର କାଜୁ ସାହିର ଯଶବନ୍ତ ବାଇକ୍ ଯୋଗେ ଅନୁଗୋଳ ଅଭିମୁଖେ ଯାଉଥିବା ବେଳେ ଏକ ଟିପ୍ପର ଗାଡ଼ି (ଓଡି ୧୫ ଏସ ୫୪୪୫) ତାଙ୍କୁ ଧକ୍କା ଦେଇଥିଲା। ଗୁରୁତର ଅବସ୍ଥାରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ତେବେ ଦୁର୍ଘଟଣା ଘଟାଇଥିବା ମିନିଟ୍ରକ୍ ଏବଂ ଟିପ୍ପର ଗାଡି ଘଟଣାସ୍ଥଳରୁ ଫେରାର ହୋଇଯାଇଥିବା ପୋଲିସ ତଦନ୍ତ ଜାରି ରଖିଛି।
