ଭବାନୀପାଟଣା,୨୮।୬(ଡି.ଏନ୍.ଏ.): ଚଳିତ ରବି ଋତୁରେ ଧାନ ସଂଗ୍ରହ ପ୍ରକ୍ରିୟାରେ ମହିଳା ଏସ୍ଏଚ୍ଜିଗୁଡ଼ିକୁ ସାମିଲ କରିବା ପାଇଁ ରାଜ୍ୟ ସରକାର ନିଷ୍ପତ୍ତି ନେଇଥିଲେ । ଏ ନେଇ କଳାହାଣ୍ଡି ଜିଲାରେ ମହିଳା ଏସ୍ଏଚ୍ଜଙ୍କୁ ପରୀକ୍ଷା ମୂଳକ ଭାବେ କେତୋଟି ମଣ୍ଡିରୁ ଧାନ ସଂଗ୍ରହ କରିବା ପାଇଁ ଦାୟିତ୍ୱ ଦିଆଯାଇଥିଲା । ଜିଲାରେ ଚଳିତ ରବି ଋତୁରେ ପ୍ରାଥମିକ କୃଷି ସେବା ସମବାୟ ସମିତି ଜରିଆରେ ଧାନ ସଂଗ୍ରହ ପାଇଁ ୮୯ ଗୋଟି ମଣ୍ଡି ଖୋଲା ଯାଇଥିଲା । ତେବେ ଜିଲାର ୧୦ ବ୍ଲକର ୧୭ ମଣ୍ଡିରେ ଆଂଶିକ ପରିମାଣରେ ଚାଷୀଙ୍କଠାରୁ ଧାନ କିଣିବା ପାଇଁ ମହିଳା ଏସ୍ଏଚ୍ଜିଙ୍କୁ ଟ୍ୟାଗ୍ କରାଯାଇଥିଲା । ତେବେ ମହିଳା ଏସ୍ଏଚ୍ଜି ଏହି ଧାନ ସଂଗ୍ରହ ପ୍ରକ୍ରିୟାରେ ଗତ ୨୬ ତାରିଖ ସୁଦ୍ଧା ୨ ଲକ୍ଷ ୩୨ ହଜାର ୪୫୫ କୁଇଣ୍ଟାଲ ଧାନ ସଂଗ୍ରହ କରିସାରିଛନ୍ତି। ଏହି ୧୭ଟି ମହିଳା ଏସ୍ଏଚ୍ଜିକୁ ଚଳିତ ରବି ଋତୁରେ ବିଭିନ୍ନ ମଣ୍ଡିରୁ ୨ ଲକ୍ଷ ୫୧ ହଜାର ୮୬୯ କୁଇଣ୍ଟାଲ ଧାନ ସଂଗ୍ରହ କରିବା ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା ।
