କଟକ ଅଫିସ,୨୭ା୨: ୩ ବର୍ଷ ତଳେ ପାଠ ପଢାଉଥିବାବେଳେ ନିଜ ଛାତ୍ରୀଙ୍କ ପ୍ରେମରେ ପଡ଼ିଥିଲେ। ପରେ ତାଙ୍କୁ କୋର୍ଟରେ ବିବାହ କରିଥିଲେ। ଉଭୟଙ୍କୁ ସ୍ବାମୀ-ସ୍ତ୍ରୀ ଭାବେ ଆଇନର ସ୍ବୀକୃତି ମିଳିଥିଲା। ତେବେ ସ୍ତ୍ରୀଙ୍କୁ ନିଜ ଘରକୁ ନେଇ ନ ଥିଲେ କି ବିବାହ କରିଥିବା କଥା କାହାକୁ ଜଣାଇ ନ ଥିଲେ। ବରଂ ଏଭଳି ସ୍ଥିତିରେ ସେ ପୁଣି ଦ୍ୱିତୀୟ ବିବାହ ପାଇଁ ବେଦିରେ ବସିଥିଲେ। ଏହି ଖବର ପାଇ ପୋଲିସ ସହିତ ବାହାବେଦି ନିକଟରେ ପହଞ୍ଚିଥିଲେ ପ୍ରଥମ ସ୍ତ୍ରୀ। ତାଙ୍କ ଅଭିଯୋଗ କ୍ରମେ ବେଦିରୁ ବର ଅର୍ଥାତ୍ ପ୍ରିୟରଞ୍ଜନ ପତିଙ୍କୁ ପୋଲିସ ଉଠାଇ ଥାନାକୁ ନେଇଯାଇଛି। ଚାଉଳିଆଗଞ୍ଜ ଅଞ୍ଚଳରେ ବୁଧବାର ଏହି ଘଟଣା ଦେଖିବାକୁ ମିଳିଛି।
ସୂଚନା ଅନୁଯାୟୀ, ପ୍ରିୟରଞ୍ଜନ(୨୮)ଙ୍କ ଘର ବିଡ଼ାନାସୀ ଥାନା ଅନ୍ତର୍ଗତ ଦେଉଳସାହି ଅଞ୍ଚଳରେ ହୋଇଥିବାବେଳେ ସେ ଖପୁରିଆସ୍ଥିତ ସରକାରୀ ଆଇଟିଆଇରେ ଅଧ୍ୟାପକ ଭାବେ ଚାକିରି କରନ୍ତି। ପାଠ ପଢାଇବା ଭିତରେ ୨୦୧୭ ମସିହାରେ ଆଇଟିଆଇର ଜଣେ ଛାତ୍ରୀଙ୍କ ସହ ତାଙ୍କର ପ୍ରେମ ସମ୍ପର୍କ ଗଢି ଉଠିଥିଲା। ସମ୍ପୃକ୍ତା ଛାତ୍ରୀଙ୍କ ଘର ବୟାଳିଶ ମୌଜା ଅନ୍ତର୍ଗତ ଝିଙ୍କିରିଆ ଅଞ୍ଚଳରେ। ପ୍ରିୟରଞ୍ଜନଙ୍କୁ ଛାତ୍ରୀ ଜଣକ ବିବାହ ପ୍ରସ୍ତାବ ଦେଇଥିଲେ। ହେଲେ ବାହାଘର ପାଇଁ ଘରଲୋକେ ରାଜି ନ ଥିବା ସେ କହିଥିଲେ। ମାତ୍ର ଛାତ୍ରୀ ଜଣକ ତାଙ୍କୁ ବିବାହ କରିବା ପାଇଁ ଜିଦ୍ ଧରିିଥିଲେ। ଶେଷରେ ୨୦୧୭ ମସିହା ଜୁନ ୨୦ ତାରିଖରେ ଉଭୟ କୋର୍ଟରେ ବିବାହ କରିଥିଲେ। ତେବେ ଏ ବିଷୟରେ କେହି ନିଜ ପରିବାରକୁ ଜଣାଇ ନ ଥିଲେ। ବିବାହ ପରେ ଦୁହେଁ ଅଲଗା ରହୁଥିଲେ। ପ୍ରିୟରଞ୍ଜନ ପରିବାର ଲୋକଙ୍କୁ ରାଜି କରାଇ ତାଙ୍କୁ ଘରକୁ ନେଇଯିବେ ବୋଲି ପ୍ରତିଶ୍ରୁତି ଦେଇଥିଲେ। ତେବେ ଗତ ଦୁଇ ତିନି ମାସ ହେବ ସ୍ତ୍ରୀଙ୍କଠାରୁ ପ୍ରିୟରଞ୍ଜନ ସମ୍ପୂର୍ଣ୍ଣ ଭାବେ ଦୂରେଇ ଯାଇଥିଲେ। ଅନ୍ୟପକ୍ଷରେ ପ୍ରିୟରଞ୍ଜନଙ୍କ ବାହାଘର ପାଇଁ ପରିବାରଲୋକେ ବିଭିନ୍ନ ସ୍ଥାନରେ ପ୍ରସ୍ତାବ ଖୋଜିଥିଲେ। ପ୍ରସ୍ତାବ ଠିକ୍ ହେବା ପରେ ବୁଧବାର ଚାଉଳିଆଗଞ୍ଜ ଅଞ୍ଚଳରେ ତାଙ୍କର ବିବାହ ହେଉଥିଲା। ତାଙ୍କର ପ୍ରଥମ ସ୍ତ୍ରୀ ଏହି ଖବର ପାଇ ଜିଲା ଆଇନ ସେବା ପ୍ରାଧିକରଣ କର୍ତ୍ତୃପକ୍ଷଙ୍କୁ ଜଣାଇବା ସହ ନିଜର ବିବାହ ପଞ୍ଜୀକରଣ ସାର୍ଟିଫିକେଟ ଦେଖାଇଥିଲେ। ଆଇନସେବା ପ୍ରାଧିକରଣର ପିଏଲ୍ଭି ଶର୍ମିଷ୍ଠାରାଣୀ ନନ୍ଦ ଉକ୍ତ ମହିଳାଙ୍କୁ ଚାଉଳିଆଗଞ୍ଜ ଥାନାକୁ ନେଇ ଘଟଣା ବିଷୟରେ ପୋଲିସକୁ ଜଣାଇଥିଲେ। ଏଥିସହିତ ଏକ ଏତଲା ମଧ୍ୟ ଦେଇଥିଲେ। ପୋଲିସ ଆଇପିସି ୪୯୪, ୪ ଡିପି ଆକ୍ଟରେ ଏକ ମାମଲା ରୁଜୁ କରି ସନ୍ଧ୍ୟା ପ୍ରାୟ ୬ଟା ବେଳେ ମହାନଦୀ ବିହାରସ୍ଥିତ ସେଲିବ୍ରେସନ ମଣ୍ଡପରେ ଚଢାଉ କରିଥିଲା। ଆଉ ବେଦିରୁ ବରକୁ ଉଠାଇ ଆଣିଥିଲା। ଫଳରେ ଘଟଣାସ୍ଥଳରେ ଚାପା ଉତ୍ତେଜନା ସୃଷ୍ଟି ହୋଇଥିଲା। ପ୍ରିୟରଞ୍ଜନ ପ୍ରଥମ ବିବାହ କରିଥିବା କଥା ଝିଅଘର ଜାଣି ନ ଥିବା କହିଥିଲେ। ପୋଲିସ ପ୍ରିୟରଞ୍ଜନଙ୍କୁ ଥାନାରେ ଅଟକ ରଖି ପଚରାଉଚୁୁରା କରିବା ପରେ ଗିରଫ କରିଛି। ଗୁରୁବାର ତାଙ୍କୁ କୋର୍ଟ ଚାଲାଣ କରାଯିବ ବୋଲି ସୂଚନା ମିଳିଛି।
