ମୈଇଦଲପୁର,୧୧ା୧୨(ଡି.ଏନ.ଏ.)-ଜଙ୍ଗଲକୁ କାଠ ସଂଗ୍ରହ କରିବାକୁ ଯାଇଥିବା ବେଳେ ଭାଲୁ ଆକ୍ରମଣ କରିଥିଲା। ଜୀବନ ବଞ୍ଚାଇବା ପାଇଁ ଭାଲୁ ସହ ଲଢେଇ କରି ଗୁରୁତର ହୋଇଛନ୍ତି ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ କେନ୍ଦୁଗୁଡାର ଗାଁର ସଗ ପୂଜାରୀ (୬୦)। ଗୁରୁତର ଅବସ୍ଥାରେ ସଗଙ୍କୁ ମୈଇଦଲପୁର ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ପରେ ପାପଡାହାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଇଛି। କେନ୍ଦୁଗୁଡା ଗାଁର ସଗ ପୂଜାରୀ(୬୦) ସକାଳୁ ବାର୍ଲି ଗାଁ ନିକଟ ଜଙ୍ଗଲକୁ ଜାଳେଣୀ କାଠ ପାଇଁ ଯାଇଥିଲେ । ହଠାତ ଏକ ଭାଲୁ ଆସି ଆକ୍ରମଣ କରିଥିଲା । ଜୀବନ ରକ୍ଷା ପାଇଁ ଭାଲୁ ସହ ସଗ ଲଢେଇ କରିଥିଲେ । ସଗ ଧରିଥିବା ଟାଙ୍ଗିଆରେ ଭାଲୁକୁ ଆକ୍ରମଣ କରିଥିଲେ । ଭାଲୁ ଘଟଣାସ୍ଥଳରୁ ଚାଲି ଯାଇଥିଲା । ରକ୍ତାକ୍ତ ଅବସ୍ଥାରେ ସଗ ଏକ ଗଛ ଉପରେ ଚଢିଯାଇଥିଲେ । ସଗ ଜଙ୍ଗଲରୁ ଆସିବା ବିଳମ୍ବ ହେବା ନେଇ ପରିବାର ଲୋକ ଖୋଜିବାକୁ ଯାଇଥିଲେ । ସଗଙ୍କୁ ଗଛ ତଳକୁ ଓହ୍ଲାଇ ପରିବାର ଲୋକ ଡାକ୍ତରଖାନା ଆଣିଥିଲେ । ସଗଙ୍କ ବାମକାନ୍ଧ, ଛାତିକୁ ଭାଲୁ କାମୁଡି ଥିବା ଜଣାପଡିଛି । ଏନେଇ ସଗଙ୍କ ପୁତୁରା ପର୍ଶୁରାମ ମାଝୀ ମୈଇଦଲପୁର ପୋଲିସ ଫାଣ୍ଡିରେ ଲିଖିତ ଭାବେ ଜଣାଇଛନ୍ତି।
