ବାରାଣସୀ,୭ା୭(ଆଇଏଏନ୍ଏସ୍); ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ତାଙ୍କ ନିଜ ନିର୍ବାଚନମଣ୍ଡଳୀ ବାରାଣସୀରୁ ଶାସକ ଦଳ ଭାଜପାର ସଭ୍ୟସଂଗ୍ରହ ଅଭିଯାନ ଶୁଭାରମ୍ଭ କରିଛନ୍ତି। ସବୁ ବର୍ଗର ଲୋକଙ୍କୁ ଗୈରିକ ଦଳ ସହ ଯୋଡିବା ଲାଗି ଏହି ଅଭିଯାନ ଆରମ୍ଭ ହୋଇଛି। ଏହି ଅବସରରେ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ, ଭାରତକୁ ୫ ଟ୍ରିଲିୟନ ଡଲାର ଅର୍ଥନୀତିରେ ପରିଣତ କରିବା ଲାଗି ତାଙ୍କ ସରକାର ଲକ୍ଷ୍ୟଧାର୍ଯ୍ୟ କରିଛନ୍ତି। ସରକାରଙ୍କ ଏହି ଦୂରଦୃଷ୍ଟିକୁ ସମାଲୋଚନା କରୁଥିବା ଲୋକେ ପେସାଦାର ନିରାଶାବାଦୀ ବୋଲି ସେ କହିଛନ୍ତି।
ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଶୁକ୍ରବାର ଉପସ୍ଥାପିତ କରିଥିବା କେନ୍ଦ୍ର ବଜେଟରେ ଭାରତକୁ ଆଗାମୀ ୫ ବର୍ଷ ମଧ୍ୟରେ ୫ ଟ୍ରିଲିୟନ ଡଲାର ଅର୍ଥନୀତିରେ ପରିଣତ କରିବାକୁ ଲକ୍ଷ୍ୟଧାର୍ଯ୍ୟ କରାଯାଇଛି। ସରକାର କାହିଁକି ଏତେବଡ଼ ଲକ୍ଷ୍ୟଧାର୍ଯ୍ୟ କଲେ, ଏହାର ଆବଶ୍ୟକତା କ’ଣ, ଏହା କିପରି ସମ୍ଭବ ହେବ- ଏଭଳି ପ୍ରଶ୍ନ କେତେଜଣ କରୁଛନ୍ତି। ଏମାନେ ସାଧାରଣ ଲୋକଙ୍କଠାରୁ ଭିନ୍ନ। ଏମାନଙ୍କୁ ପେସାଦାର ନିରାଶାବାଦୀ କୁହାଯିବା ଆବଶ୍ୟକ ବୋଲି ପ୍ରଧାନମନ୍ତ୍ରୀ କହିଛନ୍ତି। ଯଦି ଆପଣ କୌଣସି ସମସ୍ୟା ନେଇ ଜଣେ ସାଧାରଣ ଲୋକଙ୍କ ପାଖକୁ ଯାଆନ୍ତି, ସେ ଏହାର ସମାଧାନ ଖୋଜି ବାହାର କରିବାରେ ସହାୟତା କରିବେ। କିନ୍ତୁ ଜଣେ ନିରାଶାବାଦୀଙ୍କ ପାଖକୁ ଗଲେ ସେ ସମସ୍ୟାକୁ ବିପଦରେ ପରିଣତ କରିଦେବେ। ଅର୍ଥନୀତି ଦ୍ୱିଗୁଣିତ ହେଲେ ପ୍ରତ୍ୟେକ ଭାରତୀୟ ସେଥିରୁ ଉପକୃତ ହେବେ। ବିଶ୍ୱର ବିକଶିତ ରାଷ୍ଟ୍ରଗୁଡ଼ିକ ନିଜସ୍ବ ସଂଘର୍ଷ ବଳରେ ଆଜିର ସ୍ଥିତିରେ ପହଞ୍ଚତ୍ପାରିଛନ୍ତି। ଭାରତ ପାଇଁ ଏବେ ସମୟ ଆସିଛି । ଅର୍ଥନୀତିକୁ ବଢ଼ାଇବାକୁ ହେଲେ କୃଷକମାନଙ୍କୁ କେବଳ ଖାଦ୍ୟ ପ୍ରସ୍ତୁତକାରୀ ଭାବେ ନ ନେଇ ସେମାନଙ୍କୁ ଦେଶର ସମ୍ପତ୍ତି ସୃଷ୍ଟିକାରୀ ଭାବେ ଦେଖିବାକୁ ହେବ। ଏବେ ସେମାନଙ୍କୁ ଆମ ସରକାର ରପ୍ତାନିକାରୀ ଭାବେ ଦେଖୁଛି ବୋଲି ପ୍ରଧାନମନ୍ତ୍ରୀ କହିଥିଲେ।
ଜନସଂଘର ପ୍ରତିଷ୍ଠାତା ଶ୍ୟାମାପ୍ରସାଦ ମୁଖାର୍ଜୀଙ୍କ ୧୧୮ତମ ଜନ୍ମବାର୍ଷିକୀ ଅବସରରେ ଭାଜପା ଏହାର ସଭ୍ୟସଂଗ୍ରହ ଅଭିଯାନ ଆରମ୍ଭ କରିଛି। ଉତ୍ତରପ୍ରଦେଶରୁ ୩୬ ଲକ୍ଷ ନୂଆ ସଭ୍ୟ ସଂଗ୍ରହ ଲାଗି ଲକ୍ଷ୍ୟ ରଖାଯାଇଛି। ମୋଦି ବିଭିନ୍ନ ବର୍ଗରୁ ୧୧ ଜଣ ପ୍ରମୁଖ ବ୍ୟକ୍ତିଙ୍କୁ ଭାଜପାକୁ ସ୍ବାଗତ କରିଥିଲେ।
