ଭୁବନେଶ୍ୱର, ୨୪।୧୦(ବ୍ୟୁରୋ): ବିଲ୍ଡିଂ ପ୍ଲାନ ନ ମାନିବାରୁ ଉଚ୍ଛେଦ। ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ଦ୍ୱାରା ଦିଆଯାଇଥିବା ବିଲ୍ଡିଂ ପ୍ଲାନ ଅନୁସାରେ ଗୃହ ନ କରିବାରୁ ଜୟଦେବ ବିହାରସ୍ଥିତ ଜୟଦେବ ଟାୱାରରେ ମିଳିତ ଏନ୍ଫୋର୍ସମଣ୍ଟେ ସ୍କ୍ବାଡ ପକ୍ଷରୁ ଉଚ୍ଛେଦ କରାଯାଇଛି। ବୁଧବାର ହୋଇଥିବା ଏହି ଉଚ୍ଛେଦରେ ଟାୱାରର କିଛି ଅଂଶ ଭଙ୍ଗା ଯାଇଥିବା ବେଳେ ଗୁରୁବାର ବିଲ୍ଡିଂର ଉପର ମହଲା ଓ ପାର୍କିଂ ଅଞ୍ଚଳକୁ ସମ୍ପୂର୍ଣ୍ଣ ଭଙ୍ଗାଯିବ। ବିଡିଏର ବିନା ଅନୁମତିରେ ବିଲ୍ଡିଂରେ ବେଆଇନ ଭାବେ ନିର୍ମାଣ କାର୍ଯ୍ୟ ହୋଇଥିବାରୁ ଏହି ଉଚ୍ଛେଦ କରାଯାଇଛି ବୋଲି ବିଡିଏ ପକ୍ଷରୁ କୁହାଯାଇଛି।
ସୂଚନାଯୋଗ୍ୟ, ବିଡିଏ ଟ୍ବାୱାର ଭାଙ୍ଗିବାକୁ ଆସିଥିବା ବେଳେ ବିଲ୍ଡିଂରେ ଘର କିଣିଥିବା ଲୋକମାନେ ବେଶ୍ ଖୁସି ଥିବା ପରିଲକ୍ଷିତ ହୋଇଥିଲା। କାରଣ ଦୀର୍ଘଦିନ ହେବ ଏଠାରେ ସେମାନେ ଘର କିଣି ରହୁଥିଲେ ମଧ୍ୟ ଗାଡ଼ି ପାର୍କିଂ ପାଇଁ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଥିଲେ। କାରଣ ୨୦୦୦ରେ ନିର୍ମାଣ ହୋଇଥିବା ଏହି ଟାୱାର ୫ ମହଲା ପର୍ଯ୍ୟନ୍ତ ଅନୁମତି ପାଇଥିବା ବେଳେ ଏହାର ମାଲିକ ସତ୍ୟଶେଖର ରଥ ବେଆଇନ ଭାବେ ଆଉ ଗୋଟିଏ ମହଲା ବଢ଼ାଇ ଦେଇଥିଲେ। ସେହିପରି ପାର୍କିଂ ପାଇଁ ଉଦ୍ଦିଷ୍ଟ ସ୍ଥାନରେ ମଧ୍ୟ ଘର ନିର୍ମାଣ କରି କେତେଜଣ ଲୋକଙ୍କୁ ଭଡ଼ା ଦେଇଥିଲେ। ଯେଉଁଥିପାଇଁ ପୂର୍ବରୁ ଘର କିଣିଥିବା ଲୋକମାନେ ନିଜର ଗାଡ଼ି ପାର୍କିଂ କରିବାକୁ ଅସୁବିଧାର ସମ୍ମୁଖୀନ ହେଉଥିଲେ। ହେଲେ ବୁଧବାର ଏହା ଭଙ୍ଗାଯିବା ପରେ ଏଠାରେ ରହୁଥିବା ଲୋକମାନେ ଗାଡ଼ି ପାର୍କିଂ କରିବାକୁ ସୁବିଧା ପାଇଛନ୍ତି ବୋଲି ପ୍ରକାଶ ପାଇଛି। ତେବେ ବେଆଇନ ନିର୍ମାଣ ପାଇଁ ବିଲ୍ଡରଙ୍କ ନାଁରେ କେସ୍ ହେବା ପରେ ହାଇକୋର୍ଟ ପର୍ଯ୍ୟନ୍ତ ବି ମାମଲା ଯାଇଥିଲା। ହେଲେ ସବୁଆଡୁ ମାମଲା ହାରିବା ପରେ ବିଡିଏକୁ ବିଲ୍ଡିଂର ବେଆଇନ ଅଂଶକୁ ଭାଙ୍ଗିବା ପାଇଁ ଅନୁମତି ମିଳିଥିଲା। ଏହି ଆପାର୍ଟମେଣ୍ଟଟି ବେଆଇନ୍ ଭାବେ ନିର୍ମାଣ କରାଯାଇଥିବାରୁ ଏହାକୁ ଭଙ୍ଗିବା ପାଇଁ ସମ୍ପୃକ୍ତ ମାଲିକଙ୍କୁ ପୂର୍ବରୁ ବିଡିଏ ପକ୍ଷରୁ ନୋଟିସ୍ ମଧ୍ୟ କରାଯାଇଥିଲା।
ବିଡିଏର ଜଣେ ଅଧିକାରୀଙ୍କ କହିବା ଅନୁଯାୟୀ, ଏହି ବିଲ୍ଡିଂରେ ଗାଡ଼ି ପାର୍କିଂ ଏରିଆ ନାହିଁ। ଯେଉଁ ସ୍ଥାନରେ ପାର୍କିଂ କରିବା କଥା ସେଠାରେ ଘର କରି ଭଡ଼ାରେ ଲଗାଯାଇଛି। ଏହାସହ ବିଡିଏଠାରୁ ଅନୁମତି ମିଳିଥିବା ମହଲାଠାରୁ ମଧ୍ୟ ଏଠାରେ ଅଧିକ ମହଲା ବଢ଼ାଯାଇଛି। ଦୀର୍ଘଦିନ ହେବ ଏହି ବେଆଇନ୍ କୋଠାଟି ନିର୍ମାଣ ହୋଇଥିବା ବେଳେ ୨୦୦୮ ସର୍ବକ୍ଷମାରେ ନିୟମିତ କରିବାକୁ ଆବେଦନ ହୋଇଥିଲା। ମାତ୍ର ତାହା ଖାରଜ ହୋଇଥିବା ଯୋଗୁ, ହାଇକୋର୍ଟରେ ମଧ୍ୟ ମାମଲା ଚାଲିଥିଲା। ହାଇକୋର୍ଟ ମଧ୍ୟ ଏହାକୁ ଭାଙ୍ଗିବାକୁ ନିର୍ଦ୍ଦେଶ ଦେବା ପରେ ବିଡିଏ ସମସ୍ତ ପ୍ରସ୍ତୁତି ଶେଷ କରିଛି ବୋଲି ସେ କହିଛନ୍ତି।
