ଶ୍ରୀନଗର,୨୩।୫: ଦେଶରେ କରୋନା ସଂକ୍ରମଣ ଜାରି ରହିଛି। ଏହାକୁ ଦୃଷ୍ଟିରେ ରଖି ସରକାରଙ୍କ ପକ୍ଷରୁ ଲକ୍ଡାଉନ୍ ସମୟ ସୀମାକୁ ବୃଦ୍ଧି କରାଯାଇଛି। ବିଭିନ୍ନ ସ୍ଥାନରେ ଅଟକି ରହିଥିବା ପ୍ରବାସୀ ଶ୍ରମିକଙ୍କୁ ନିଜ ନିଜ ରାଜ୍ୟକୁ ଫେରାଇ ଅଣାଯିବାର ଉଦ୍ୟମ ଅବ୍ୟାହତ ରହିଛି। ଏପରିସ୍ଥଳେ ବହୁ ଲୋକଙ୍କ ପାଖରେ ଆତ୍ୟାବଶ୍ୟକ ଖାଦ୍ୟ ସାମଗ୍ରୀର ଅଭାବ ଦେଖାଦେଇଛି। ତେବେ ଏହି ସମୟରେ ଅସୁବିଧାରେ ପଡ଼ିଥିବା ଲୋକଙ୍କୁ ସହାୟତାର ହାତ ବଢ଼ାଇବା ପାଇଁ ବହୁ ସଂସ୍ଥା ପ୍ରୟାସ ଜାରି ରଖିଛନ୍ତି। ଜଣେ ଅସୁବିଧାରେ ପଡ଼ିଥିଲେ ଅନ୍ୟ ଜଣେ ଭାରତବାସୀଙ୍କ ହୃଦୟ କିଭଳି କାନ୍ଦି ଉଠେ ତାହାର ଉଦାହରଣ ସୃଷ୍ଟି କରିଛନ୍ତି ବୈଷ୍ଣୋଦେବୀ ମନ୍ଦିର ବୋର୍ଡ। ରମ୍ଜାନ ମାସ ଅବସରରେ କ୍ୱାରାଣ୍ଟାଇନ୍ରେ ଥିବା ୫୦୦ ମୁସଲମାନଙ୍କୁ ମନ୍ଦିର ଟ୍ରଷ୍ଟ୍ ପକ୍ଷରୁ ଶେହରୀ ଏବଂ ଇଫ୍ତାର ଯୋଗାଇ ଦିଆଯାଇଛି। ମାର୍ଚ୍ଚ ମାସଠାରୁ ମନ୍ଦିର ଟ୍ରଷ୍ଟ୍ ପକ୍ଷରୁ କତ୍ରାସ୍ଥିତ ଆଶୀର୍ବାଦ ଭବନକୁ କ୍ୱାରାଣ୍ଟାଇନ୍ ସେଣ୍ଟରରେ ପରିଣତ କରାଯାଇଛି। କ୍ୱାରାଣ୍ଟାଇନ୍ ସେଣ୍ଟରରେ ରହିଥିବା ମୁସଲମାନଙ୍କୁ ପାହାନ୍ତାରେ ଶେହରୀ ଏବଂ ସନ୍ଧ୍ୟା ସମୟରେ ଇଫତାର ଯୋଗାଇ ଦିଆଯାଉଥିବା ବୈଷ୍ଣୋଦେବୀ ମନ୍ଦିର ବୋର୍ଡ ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ ରମେଶ କୁମାର ସୂଚନା ଦେଇଛନ୍ତି। ଜମ୍ମୁ-କଶ୍ମୀରରେ ଥିବା ବୈଷ୍ଣୋଦେବୀ ମନ୍ଦିର ବୋର୍ଡର କ୍ୱାରାଣ୍ଟାଇନ୍ ସେଣ୍ଟରରେ ମୁଖ୍ୟତଃ ପ୍ରବାସୀ ଶ୍ରମିକମାନେ ହିଁ ରହିଛନ୍ତିି। ରମଜାନ ମାସରେ ସେମାନଙ୍କ ପାଇଁ ଖାଦ୍ୟ ବ୍ୟବସ୍ଥା କରାଇବା ଲାଗି ମନ୍ଦିର ବୋର୍ଡ ପକ୍ଷରୁ ଯୋଜନା ପ୍ରସ୍ତୁତ କରାଯାଇଥିବା ସେ କହିଛନ୍ତି।
