ବେଙ୍ଗାଲୁରୁ,୧୬-୮: କଫି ଚେନ୍ ଅପରେଟନର କଫି ଡେ ଏଣ୍ଟରପ୍ରାଇଜେସ୍ ବେଙ୍ଗାଲୁରୁ ସ୍ଥିତ କମ୍ପାନୀର ଗ୍ଲୋବାଲ ଭିଲେଜ ଟେକ୍ ପାର୍କକୁ ବ୍ଲାକ୍ଷ୍ଟୋନକୁ ବିକ୍ରି କରିଦେବ ବୋଲି ବୁଧବାର ଘୋଷଣା କରିଛି। ଏହି ବିକ୍ରିରୁ କମ୍ପାନୀକୁ ପ୍ରାୟ ୩ ହଜାର କୋଟି ଟଙ୍କା ମିଳିବ। ଏହି ଅର୍ଥକୁ ଋଣ ପରିଶୋଧ କରିବାରେ ବିନିଯୋଗ କରାଯିବ ବୋଲି କୁହାଯାଇଛି। କଫି ଡେ ଏଣ୍ଟରପ୍ରାଇଜେସ୍ ଦ୍ୱାରା ପରିଚାଳିତ କ୍ୟାଫେ କଫି ଡେର ପ୍ରତିଷ୍ଠାତା ଭି.ଜି.ସିଦ୍ଧାର୍ଥଙ୍କ ଆମତ୍ହତ୍ୟା ପରେ ଏହି ନିଷ୍ପତ୍ତି ନିଆଯାଇଛି। ଷ୍ଟକ୍ ଏକ୍ସଚେଞ୍ଜକୁ ସୂଚନା ପ୍ରଦାନ କରି କମ୍ପାନୀ କହିଛି ଯେ, ଗ୍ଲୋବାଲ ଟେକ୍ ପାର୍କକୁ ବ୍ଲାକ୍ଷ୍ଟୋନକୁ ବିକ୍ରି ପାଇଁ ବୋର୍ଡ ଅଫ୍ ଡାଇରେକ୍ଟର ନିଷ୍ପତ୍ତି ନେଇଛନ୍ତି। ଏହି ବିକ୍ରିରୁ କମ୍ପାନୀକୁ ୨୬୦୦ରୁ ୩୦୦୦ କୋଟି ଟଙ୍କା ମିଳିବ। ଏହାକୁ ନେଇ ଦୁଇ କମ୍ପାନୀ ମଧ୍ୟରେ ଅଣ ବାଧ୍ୟକାରୀ ଚୁକ୍ତି ସ୍ବାକ୍ଷର ହୋଇଛି। ବ୍ଲାକ୍ଷ୍ଟୋନ ପକ୍ଷରୁ ଟେକ୍ ଭିଲେଜର ଯାଞ୍ଚ, ଦସ୍ତାବିଜକୁ ତନଖିବା ପରେ ଏବଂ ନିୟାମକୀୟ ଅନୁମୋଦନ ଲାଭର ୩୦ରୁ ୪୫ ଦିନ ମଧ୍ୟରେ ବିକ୍ରି କାର୍ଯ୍ୟ ଶେଷ କରାଯିବ। ଏଥିସହିତ ବୋର୍ଡ ଆଲ୍ଫାଗ୍ରେପ ସିକ୍ୟୁରିଟିଜ ପ୍ରାଇଭେଟ ଲିମିଟେଡକୁ ୨୮ କୋଟି ଟଙ୍କାରେ ଇଲୁମିନାତୀ ସଫ୍ଟଓ୍ବେୟାର ପ୍ରାଇଭେଟ ଲିମିଟେଡକୁ ବିକ୍ରି କରାଯିବ ବୋଲି କମ୍ପାନୀ ଜଣାଇଛି।
