ଓ୍ବାଶିଂଟନ୍: ସାଧାରଣତଃ ବିଶ୍ୱରେ ଲମ୍ବା ବ୍ୟକ୍ତିଙ୍କ ରେକର୍ଡ ବାରମ୍ବାର ବଦଳିଥାଏ। କିନ୍ତୁ ଏକ ରେକର୍ଡ ଅଛି, ଯାହା ୮୦ ବର୍ଷ ପର୍ଯ୍ୟନ୍ତ ସ୍ଥିର ରହିଛି। ୧୯୪୦ ପରଠାରୁ କେହି ସେହି ରେକର୍ଡ ଭାଙ୍ଗି ନାହାନ୍ତି। ଏହି ରେକର୍ଡ ହେଉଛି ରୋବର୍ଟ ଓ୍ବାଡ୍ଲୋ। ଯିଏ କି ଇତିହାସରେ ସବୁଠାରୁ ଉଚ୍ଚ ବ୍ୟକ୍ତି ଭାବରେ ଜଣାଶୁଣା। ତାଙ୍କର ଲମ୍ବ ୮ ଫୁଟ ୧୧.୧ ଇଞ୍ଚ ଥିଲା। ଏହିପରି ଲମ୍ବା ବ୍ୟକ୍ତି ଆଜି ପର୍ଯ୍ୟନ୍ତ ପୃଥିବୀରେ ଜନ୍ମ ହୋଇନାହାନ୍ତି। ତାଙ୍କ ନାମ ଗିନିଜ୍ ବୁକ୍ ଅଫ୍ ଓ୍ବାଲର୍ଡ ରେକର୍ଡରେ ଲିପିବଦ୍ଧ ହୋଇଛି।
ରୋବର୍ଟ ଆମେରିକାର ଏଲ୍ଟନ (ଇଲିନୋଇସ୍) ସହରର ବାସିନ୍ଦା ଥିଲେ। ୨୨ ଫେବୃୟାରୀ ୧୯୧୮ରେ ସେ ଜନ୍ମ ନେଇଥିଲେ। ଜନ୍ମର କିଛି ମାସ ପରେ ତାଙ୍କର ଉଚ୍ଚତା ଅସ୍ବାଭାବିକ ଭାବରେ ବଢ଼ିବାରେ ଲାଗିଲା। ମାତ୍ର ଛଅ ମାସ ମଧ୍ୟରେ ତାଙ୍କର ଲମ୍ବ ୩ ଫୁଟ ପାଖାପାଖି ହୋଇଯାଇଥିଲା। ଯାହାକି ସାଧାରଣ ପିଲାଙ୍କୁ ଅତି କମ୍ରେ ଦୁଇ ବର୍ଷ ସମୟ ଲାଗେ।
ଯେତେବେଳେ ରୋବର୍ଟଙ୍କୁ ୧ ବର୍ଷ ହୋଇଥିଲା, ସେ ୩ ଫୁଟ ଛଅ ଇଞ୍ଚ ଲମ୍ବ ଥିଲେ। ଯାହା ଦୁଇ ବର୍ଷ ବେଳକୁ ୪ ଫୁଟ ୬ ଇଞ୍ଚରୁ ଅଧିକ ବଢ଼ିଥିଲା। ୫ ବର୍ଷ ବୟସରେ ସେ ୫ଫୁଟ ୬ ଇଞ୍ଚରୁ ଅଧିକ ଏବଂ ୧୨ ବର୍ଷ ବୟସରେ ୭ ଫୁଟ ଉଚ୍ଚର ହୋଇଯାଇଥିଲେ। ରୋବର୍ଟ ସେତେବେଳେ ବିଶ୍ୱର ସବୁଠାରୁ ଲମ୍ବା ବାଳକ ବୋଲି ରେକର୍ଡ ସୃଷ୍ଟି କରିଥିଲେ।
୧୯୩୬ ମସିହାରେ ମାତ୍ର ୧୮ ବର୍ଷ ବୟସରେ ସେ ବିଶ୍ୱର ସବୁଠାରୁ ଉଚ୍ଚ ବ୍ୟକ୍ତିଙ୍କ ରେକର୍ଡ ଭାଙ୍ଗିଥିଲେ। ସେତେବେଳେ ତାଙ୍କର ଉଚ୍ଚତା ୮ ଫୁଟ ୪ ଇଞ୍ଚ ଥିଲା। ଯଦିଓ ଲୋକମାନେ ସାଧାରଣତଃ ଲୋକେ ୯,୧୦ କିମ୍ବା ୧୧ ନଂ ଜୋତା ପିନ୍ଧନ୍ତି। ମାତ୍ର ଏକ ଜୋତା କମ୍ପାନୀ ରୋବର୍ଟଙ୍କ ୩୭ ନଂ ଜୋତା ତିଆରି କରିଥିଲା। ରୋବର୍ଟଙ୍କ ଅସାଧାରଣ ଲମ୍ବ ବୃଦ୍ଧି ହେବାର ମୁଖ୍ୟ କାରଣ ହେଲା ତାଙ୍କ ପିଟୁଇଟାରୀ ଗ୍ରନ୍ଥି ବୃଦ୍ଧି। ଅବଶ୍ୟ ରୋବର୍ଟଙ୍କ ପାଇଁ ତାହା ସାଂଘାତିକ ହୋଇଥିଲା। କାରଣ ତାଙ୍କର ଗୋଡ଼ ଦୁର୍ବଳ ଥିଲା, ଯାହା ତାଙ୍କୁ ଚାଲିବାରେ କଷ୍ଟ ହେଉଥିଲା। ତାଙ୍କ ଗୋଡରେ ଫୁଲା ମଧ୍ୟ ହୋଇଥିଲା। ପରେ ସଂକ୍ରମଣର କାରଣ ପାଲଟିଥିଲା। ଏପରି ସମସ୍ୟା ସହ ସଂଗ୍ରାମ କରୁଥିବାବେଳେ ସେ ୧୫ ଜୁଲାଇ ୧୯୪୦ରେ ମାତ୍ର ୨୨ ବର୍ଷ ବୟସରେ ପୃଥିବୀରୁ ସବୁଦିନ ପାଇଁ ବିଦାୟ ନେଇଥିଲେ।
