ନୂଆପଡା ଅଫିସ,୨୭ା୮
ଆମ ଦେଶ ଏକଦା ରାମ ରାଜ୍ୟ ଭାବେ ଅଭିହିତ ହୋଇ ରହିଥିଲା । ପରବର୍ତ୍ତି ସମୟରେ ବୈଦେଶିକ ଶତ୍ରୁ ଆକ୍ରମଣର ଶିକାର ହୋଇ ଏହା ଖଣ୍ଡ ବିଖଣ୍ଡିତ ହୋଇଗଲା । ଫଳରେ ଏଠାରେ ଶାନ୍ତି ଏକତା ବ୍ୟାହତ ହୋଇଥିଲା । ଏଥିପାଇଁ ଆମକୁ ସଜାଗ ରହିବାକୁ ପଡିବ । ପରସ୍ପର ମଧ୍ୟରେ ଏକ ଧର୍ମୀୟ ଭାବନାରେ ବାନ୍ଧି ହୋଇ ଏକତା ଆଣିବାକୁ ପଡିବ ବୋଲି ମତ ପ୍ରକାଶ ପାଇଛି । ସ୍ଥାନୀୟ ସରସ୍ବତୀ ଶିଶୁ ବିଦ୍ୟାମନ୍ଦିରରେ ଆୟୋଜିତ ବିଶ୍ୱହିନ୍ଦୁ ପରିଷଦ ପ୍ରତିଷ୍ଠା ଦିବସ ଉତ୍ସବ ପାଳନ ଅବସରରେ ଅତିଥିମାନେ ଯୋଗଦେଇ ଏହା କହିଥିଲେ । କାର୍ଯ୍ୟକ୍ରମରେ ଜିଲା ସଭାପତି ବିଭୁତି ଭୁଷଣ ପାଣିଗ୍ରାହୀ ସଭାପତିତ୍ୱ କରିଥିଲେ । କେନ୍ଦ୍ରିୟ ମାର୍ଗଦର୍ଶକ ମଣ୍ଡଳୀ ସଦସ୍ୟ ପୁରୀରୁ ସ୍ବାମୀ ଜୀବନମୁକ୍ତାନନ୍ଦ ଜୀ ମୁଖ୍ୟଅତିଥି, ରାଷ୍ଟ୍ରିୟ ସ୍ବଂୟ ସେବକ ସଂଘ ଜିଲା ସଂଘ ଚାଳକ ପୁସ୍ତମ ସୁନାନୀ, ବିଶ୍ୱ ହିନ୍ଦୁ ପରିଷଦର କଳାହାଣ୍ଡି ବିଭାଗ ପ୍ରମୁଖ ରାମେଶ୍ୱର ମୁଣ୍ଡ, ହରିପୁର ଗୁରୁକୁଳରୁ ଦିଲୀପ ଆର୍ଯ୍ୟ ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇଥିଲେ। ଏହି ଅବସରରେ ଅତିଥିମାନଙ୍କୁ ସ୍ବାଗତ ସମ୍ବର୍ଦ୍ଧନା କରାଯାଇଥିଲା । ବିଶ୍ୱ ହିନ୍ଦୁ ପରିଷଦ ପ୍ରତିଷ୍ଠା ଉଦ୍ଦେଶ୍ୟ ଏବଂ ଲକ୍ଷ୍ୟ ସମ୍ପର୍କରେ ଅତିଥିମାନେ ଉପସ୍ଥାପନ କରିଥିବାବେଳେ ହିନ୍ଦୁ ସ୍ଥାନରେ ଏକ ହିନ୍ଦୁ ସାମା୍ରଜ୍ୟ ଗଠନର ଲକ୍ଷ୍ୟ ଦିନେ ଚରିତାର୍ଥ ହେବ । ଏଥିପାଇଁ ସମସ୍ତଙ୍କ ମଧ୍ୟରେ ଧର୍ମୀୟ ଭାବନା ଜାଗ୍ରତ ହେବା ସହ ମଜଭୁତ ହେବା ଜରୁରୀ ବୋଲି ବକ୍ତାମାନେ କହିଥିଲେ । ରାଜ୍ୟରେ ଦିନକୁ ଦିନ ଧର୍ମାନ୍ତରୀକରଣ କାର୍ଯ୍ୟ ବୃଦ୍ଧି ହେଉଛି । ରାଜ୍ୟ ସରକାର ଶାନ୍ତି ସ୍ଥାପନରେ ବିଫଳ ହେଉଛନ୍ତି । ସ୍ବାମୀ ଲକ୍ଷ୍ମଣାନନ୍ଦଙ୍କର ହତ୍ୟା ମାମଲାକୁ ନେଇ ସରକାର ନିଦାବିଷ୍ଣୁ ହୋଇ ରହିଛନ୍ତି । ଏହାକୁ ନେଇ ଏକ କମିଶନ ବସାଇଥିଲେ ହେଁ ଏତେ ଦିନ ପରେ ମଧ୍ୟ ତାକୁ ସାର୍ବଜନୀନ କରିପାରୁନାହାନ୍ତି। ଏହା ହିନ୍ଦୁମାନଙ୍କ ମଧ୍ୟରେ ଏକ ଅଶାନ୍ତି ସୃଷ୍ଟି କରୁଛି । ବିଶ୍ୱ ହିନ୍ଦୁ ପରିଷଦ ସାରା ଦେଶରେ ଶାନ୍ତି ଏକତା ଆଣିବାରେ ପ୍ରଚେଷ୍ଟା ଜାରି ରଖିଛି ବୋଲି କହିଥିଲେ । କାର୍ଯ୍ୟକ୍ରମ ଶେଷରେ ସହଭୋଜ କାର୍ଯ୍ୟକ୍ରମ ହୋଇଥିଲା। କାର୍ଯ୍ୟକ୍ରମରେ ଜିଲା ସମ୍ପାଦକ ଭାନୁପ୍ରତାପ ଦଣ୍ଡସେନା ମଞ୍ଚ ପରିଚାଳନା କରିଥିଲେ। ବିଶ୍ୱହିନ୍ଦୁ ପରିଷଦ ବିଭାଗ ସଙ୍ଗଠନ ସମ୍ପାଦକ ସତ୍ୟନାରାୟଣ ଥନାପତି, ଲୋକନାଥ ରଥ, ରିଙ୍କୁ ବଗର୍ତ୍ତି, ହେମନ୍ତ କୁମାର ଦଣ୍ଡସେନା ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ। ଅନ୍ୟମାନଙ୍କ ମଧ୍ୟରେ ପ୍ରସନ୍ନ କୁମାର ପାଢୀ, କ୍ଷୀରୋଦ ନିବାସ ପଣ୍ଡା, ଚିନ୍ତାମଣୀ ପାଣିଗ୍ରାହୀ, ମନୁ ସାହୁ ପ୍ରମୁଖ ଯୋଗଦେଇଥିଲେ ।
