ଚଣ୍ଡିଗଡ଼,୯।୯: ହରିୟାଣା-ପଞ୍ଜାବ ସମେତ ଅମ୍ବାଲାର ସବୁ ରେଳ ଷ୍ଟେଶନର ଦୋକାନୀମାନଙ୍କ ପାଇଁ ନୂଆ ନିୟମ ଲାଗୁ କରାଯାଇଛି। ଏବେ ଗ୍ରାହକଙ୍କୁ ଦୋକାନୀମାନେ ଉଚ୍ଚା ଦରରେ ଆଉ ଠକି ପାରିବେନି। କାରଣ ଏହି ନିୟମ ଅନୁସାରେ ‘ନୋ ବିଲ୍’ ‘ଫ୍ରି ଫୁଡ୍’ ଅର୍ଥାତ୍ ବିଲ୍ ନ ଦେଲେ ଯାତ୍ରୀଙ୍କୁ ମାଗଣା ଖାଦ୍ୟ ପ୍ରଦାନ କରିବେ ଦୋକାନୀ। ସୂଚନାଯୋଗ୍ୟ, ରେଲଓ୍ବେ ଷ୍ଟେସନଗୁଡିକରେ ଏବେ ନିର୍ଦ୍ଧାରିତ ହୋଇଥିବା ଦାମ୍ରେ ହିଁ ଦୋକାନୀମାନେ ଯାତ୍ରୀଙ୍କୁ ଖାଦ୍ୟଦ୍ରବ୍ୟ ବିକ୍ରି କରିବା ସହ ଯେମିତି ହେଲେ ସେମାନଙ୍କୁ ବିଲ୍ ଦେବା ବାଧ୍ୟତାମୂଳକ ହେବ। ଯଦି ଦୋକାନୀମାନେ ଗ୍ରାହକଙ୍କୁ ବିଲ୍ ଦେବେ ନାହିଁ, ତେବେ ସେମାନଙ୍କୁ ଅନ୍ୟ ଖାଦ୍ୟ ପଦାର୍ଥ ମାଗଣାରେ ଦେବାକୁ ପଡ଼ିବ। କେନ୍ଦ୍ର ରେଳମନ୍ତ୍ରୀ ପୀୟୁଷ ଗୋଏଲଙ୍କ ନିର୍ଦ୍ଦେଶ ପରେ ଅମ୍ବାଲାର ସବୁ ରେଳ ଷ୍ଟେଶନଗୁଡ଼ିକରେ ଏହି ନିୟମ ଲାଗୁ କରାଯାଇଛି। ଏହାପରେ ଦୋକାନୀମାନେ ଯାତ୍ରୀମାନଙ୍କୁ ଖାଦ୍ୟ ଓ ଏକ ଟି-ସାର୍ଟ ମାଗଣାରେ ପ୍ରଦାନ କରିଛନ୍ତି। କାରଣ ଏହି ଟି-ସାର୍ଟରେ ଏକ ନମ୍ବର ଉଲ୍ଲେଖ ରହିଛି, ଯେଉଁଥିରେ ଖାଦ୍ୟରେ କୌଣସି ସମସ୍ୟା ହେଉ କି ବର୍ଦ୍ଧିତ ଦରରେ ଖାଦ୍ୟ ବିକ୍ରି ଏହାର ଅଭିଯୋଗ ନେଇ ଉକ୍ତ ନମ୍ବରରେ ଯୋଗାଯୋଗ କରିପାରିବେ। ଫୋନ୍ କରିବାର କିଛି ସମୟ ମଧ୍ୟରେ ହିଁ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ରେଲଓ୍ବେର ପାରଦର୍ଶିତା ବଢ଼ାଇବା ସହ ଯାତ୍ରୀଙ୍କ ମଧ୍ୟରେ ସଚେତନତା ଏବଂ ସମସ୍ତ ଅସୁବିଧାରୁ ବଞ୍ଚାଇବା ପାଇଁ ଏଭଳି ପଦକ୍ଷେପ ନିଆଯାଇଛି ବୋଲି କେନ୍ଦ୍ର ରେଳମନ୍ତ୍ରୀ କହିଛନ୍ତି।
