ଅନୁଗୋଳ ଅଫିସ, ୧୫।୭: ୨୦୧୯-୨୦ ଆର୍ଥିକ ବର୍ଷ ଆରମ୍ଭ ହେବାକୁ ପ୍ରାୟ ୪ ମାସ ହେଲାଣି। ହେଲେ ଏ ଯାଏ ଅନୁଗୋଳ ପୌରପାଳିକା ତାର ବଜେଟ ପ୍ରସ୍ତୁତ କରିପାରିନି। ବିନା ଅଟକଳରେ ପୌର ପ୍ରଶାସନ ଏତେ ଦିନ ହେଲା ଅର୍ଥ ଖର୍ଚ୍ଚ କରିଚାଲିଥିଲେ ହେଁ ଆୟବ୍ୟୟର ହିସାବ ରଖାଯାଉ ନ ଥିବା ଭଳି ଅଭିଯୋଗ କରିଛନ୍ତି ସହରବାସୀ। ଆର୍ଥିକ ବର୍ଷ ପାଇଁ ଅଟକଳ ପ୍ରସ୍ତୁତ କରିବା ସହ ରାଜ୍ୟ ସରକାରଙ୍କୁ ଏ ବାବଦରେ ଜଣାଇବା ପାଇଁ ନିୟମ ଥିଲେ ମଧ୍ୟ ପୌରପାଳିକା ଏହି ନିୟମ ଉଲ୍ଲଂଘନ କରିଥିବା ଅଭିଯୋଗ ଉଠିଛି।
ସୂଚନା ମୁତାବକ, ଗତ ଆର୍ଥିକ ବର୍ଷରେ ପୌର ପ୍ରଶାସନ ୨୧ କୋଟି ଟଙ୍କାର ଆୟବ୍ୟୟ ଅଟକଳ ପ୍ରସ୍ତୁତ କରିଥିଲା। ହେଲେ ଚଳିତ ଆର୍ଥତ୍କ ବର୍ଷରେ କୌଣସି ବଜେଟ ନ କରାଯାଇ ଟଙ୍କା ବ୍ୟୟ ଚାଲିଛି। କେଉଁ କ୍ଷେତ୍ରରେ କେତେ ଖର୍ଚ୍ଚ ହେବ ତାହାର ଖସଡା ମଧ୍ୟ ପ୍ରସ୍ତୁତ କରାଯାଇନାହିଁ। ଗତ ୪ ମାସରେ ପୌରପାଳିକା ପ୍ରାୟ ୩ କୋଟି ଟଙ୍କା ଖର୍ଚ୍ଚ କରିସାରିଥିବା ନିର୍ବାହୀ ଅଧିକାରୀଙ୍କ ସୂଚନାରୁ ଜଣାପଡିଛି। ଏପରି କି ଆୟ ବ୍ୟୟ ଅଟକଳ ବିନା ପୌରପାଳିକା ପାଣ୍ଠିରୁ ଟଙ୍କାଟିଏ ବି ଖର୍ଚ୍ଚ କରିପାରିବ ନାହିଁ। ନିୟମ କହୁଛି, ଆର୍ଥିକ ବର୍ଷ ଶେଷ ହେବାର ଗୋଟିଏ ମାସ ପୂର୍ବରୁ ଅର୍ଥାତ ଫେବୃୟାରୀ ଶେଷ ସୁଦ୍ଧା ଆୟ ବ୍ୟୟ ଅଟକଳ ହେବା କଥା। ଏହାପରେ ଉକ୍ତ ଫାଇଲ ନିର୍ବାହୀ ଅଧିକାରୀଙ୍କ ନିକଟକୁ ପଠାଯିବ। ପରେ କାଉନସିଲର ବା ପୌର ପ୍ରଶାସକଙ୍କ ନିକଟରୁ ଅନୁମୋଦନ ମିଳିବା ପରେ ପୌରପାଳିକା ପାଣ୍ଠିରୁ ଟଙ୍କା ଖର୍ଚ୍ଚ ହୋଇପାରିବ। ଯଦି ଫାଇଲ ମଞ୍ଜୁର ନ ହୁଏ ତେବେ କେବଳ ଅତ୍ୟାବଶ୍ୟକ ସ୍ଥଳେ ପୌରପାଳିକା ଟଙ୍କା ଖର୍ଚ୍ଚ କରିପାରିବ। ଏପରିକି କର୍ମଚାରୀଙ୍କୁ ଦରମା ପ୍ରଦାନ ପାଇଁ ମଧ୍ୟ ଏହି ଅଟକଳ ଜରୁରୀ। ଅନ୍ୟପକ୍ଷରେ ଯେଉଁ ଅଧିକାରୀ ଆୟବ୍ୟୟ ଅଟକଳ ବିନା ଟଙ୍କା ଖର୍ଚ୍ଚ କରିବେ ତାଙ୍କ ନିକଟରୁ ଆବଶ୍ୟକ ପଡ଼ିଲେ ଟଙ୍କା ମଧ୍ୟ ଆଦାୟ କରିବାକୁ ମଧ୍ୟ ନିୟମ ରହିଛି। କିନ୍ତୁ ଚଳିତ ଆର୍ଥତ୍କ ବର୍ଷରେ ଅନୁଗୋଳ ପୌରପାଳିକାରେ ସେପରି କିଛି ହୋଇ ନ ଥିବା ଘଟଣା ସାମ୍ନାକୁ ଆସିଛି।
ଏ ସମ୍ପର୍କରେ ପୌର ନିର୍ବାହୀ ଅଧିକାରୀ ଶୁଭେନ୍ଦୁ ଜେନା କହିଛନ୍ତି, ଚଳିତ ବର୍ଷ ସାଧାରଣ ନିର୍ବାଚନ ଥିବାରୁ ବଜେଟ ତିଆରି ହୋଇପାରିନି। ଗୃହ ଓ ନଗର ଉନ୍ନୟନ ବିଭାଗ ବଜେଟ ପ୍ରସ୍ତୁତ କରିବା ପାଇଁ ପୂର୍ବରୁ କହିବା କଥା। କିନ୍ତୁ ଏ ପର୍ଯ୍ୟନ୍ତ ବିଭାଗ ପକ୍ଷରୁ ପୌରପାଳିକାକୁ କିଛି ଅବଗତ କରାଯାଇନାହିଁ। ୪ ମାସ ମଧ୍ୟରେ ପୌରପାଳିକା କର୍ମଚାରୀଙ୍କ ଦରମା, ପରିମଳ ଓ ଉନ୍ନୟନ କାର୍ଯ୍ୟ ପାଇଁ ଅଢେଇରୁ ୩ କୋଟି ଟଙ୍କା ଖର୍ଚ୍ଚ କରିସାରିଛି। ଚଳିତ ବର୍ଷର ବଜେଟ କେତେ ରହିବ ତାହା ସରକାରଙ୍କୁ ଜଣାଇବୁ। ଏ ନେଇ ଜିଲାପାଳ ତଥା ପୌର ପ୍ରଶାସକ ମନୋଜ କୁମାର ମହାନ୍ତି କହିଛନ୍ତି, ଏପରି ହେବା କଥା ନୁହେଁ। କେଉଁ କାରଣରୁ ତ୍ରୁଟି ହୋଇଛି ତାହାର ଅନୁଧ୍ୟାନ କରାଯିବ ବୋଲି ସେ କହିଛନ୍ତି।
