ଭୁବନେଶ୍ୱର,୧୮।୨(ବ୍ୟୁରୋ): ଆମକୁ କେବେ ଘର ମିଳିବ? ଆବେଦନ କରିବାର ୭ ମାସ ହୋଇଗଲା। ଆଉ ୩ ମାସ ହେଲେ ପିଲା ଜନ୍ମ ନେବ। ଅତ୍ୟନ୍ତ ଅସ୍ବାସ୍ଥ୍ୟକର ପରିବେଶରେ ଆମକୁ ରହିବାକୁ ପଡ଼ୁଛି। ଆମେ ବିପିଏଲ୍ କାଟାଗୋରି ବିଧାୟକ। ଆପଣ ଏପିଏଲ୍ କାଟାଗୋରି। ତେଣୁ ଆପଣ ଆମ କଥା ବିଚାରକୁ ନେଉ ନାହାନ୍ତି। ମଙ୍ଗଳବାର ବିଧାନସଭା ଶୂନ୍ୟକାଳରେ ଏଭଳି ଅଭିଯୋଗ କରିଥିଲେ ବିରୋଧୀ ଦଳ ମୁଖ୍ୟ ସଚେତକ ବିଷ୍ଣୁ ଚରଣ ସେଠୀ। ସେ କହିଥିଲେ ଯେ, ଆଇଏଏସ୍, ଆଇପିଏସ୍ ଅଫିସରଙ୍କୁ ଆଗେ ଘର ମିଳୁଛି। ଆମକୁ ମିଳି ନାହିଁ। କେଉଁ ଦିନ ମିଳିବ ବାଚସ୍ପତି ଆମକୁ ନିର୍ଦ୍ଦିଷ୍ଟ ଭାବେ କୁହନ୍ତୁ। ଏ ପ୍ରସଙ୍ଗରେ ବିଷ୍ଣୁ ମୁଖ୍ୟମନ୍ତ୍ରୀଙ୍କୁ ଇଙ୍ଗିତ କରି ଏକ ଗୀତ ମଧ୍ୟ ଗାଇଥିଲେ। ତାଙ୍କୁ ସମର୍ଥନ କରି ଭାଜପାର ଅନ୍ୟ ସଭ୍ୟମାନେ ନିଜ ଆସନ ନିକଟରେ ଛିଡ଼ା ହୋଇ ପାଟିତୁଣ୍ଡ କରିଥିଲେ। ବାଚସ୍ପତି କହିଥିଲେ ଯେ, ଏ ବିଷୟ ମୁଁ ଅନୁଭବ କରୁଛି। ଘର ଯୋଗାଇବା ସାଧାରଣ ପ୍ରଶାସନ ବିଭାଗର ଦାୟିତ୍ୱ । ତେବେ ମୁଁ ନିଶ୍ଚିତ କରୁଛି ଯେ, ଖୁବ୍ଶୀଘ୍ର ଘର ଯୋଗାଇ ଦେବା ପାଇଁ ବ୍ୟବସ୍ଥା ହେବ। ଏହା କହିବା ପରେ ଭାଜପା ସଭ୍ୟମାନେ ନିଜ ସିଟ୍ରେ ବସିଥିଲେ।
