ଲଣ୍ଡନ,୧୫।୭:୨୦୧୯ ଆଇସିସି ବିଶ୍ୱକପର ଫାଇନାଲ ମୁକାବିଲା କ୍ରିକେଟର ମକ୍କା କୁହାଯାଉଥିବା ଲର୍ଡସ ପଡିଆରେ ରବିବାର ଶେଷ ହୋଇଛି। ନ୍ୟୁଜିଲାଣ୍ଡକୁ ପରାସ୍ତ କରି ଆୟୋଜକ ଇଂଲଣ୍ଡ ଷଷ୍ଠ ଦଳ ଭାବେ ବିଶ୍ୱକପ ଚାମ୍ପିୟନ ହୋଇଛି। ଏହା ସହିତ ଦୀର୍ଘ ୨୩ ବର୍ଷ ପରେ ଏକ ନୂଆ ଦଳ ବିଶ୍ୱକପ ଜିତିଛି। ଅନ୍ତିମଥର ଶ୍ରୀଲଙ୍କା ୧୯୯୬ରେ ନୂଆ ଦଳ ଭାବେ ବିଶ୍ୱକପ ଜିତିଥିଲା। କିନ୍ତୁ ଏଥର ବିଶ୍ୱବିଜେତା ଟିମକୁ ଅସଲି ଟ୍ରଫି ମିଳିନାହିଁ। ଆଇସିସି ନିଜ ପାଖରେ ଅସଲି ଟ୍ରଫି ରଖିଥିବାବେଳେ ଉକ୍ତ ଆକୃତିର ଆଉ ଟ୍ରଫି ଇଂଲଣ୍ଡ ଟିମକୁ ଦିଆଯାଇଥିଲା। ବିଶ୍ୱକପ ଟ୍ରଫିର ଓଜନ ୧୧ କିଲୋ। ସୁନା ଏବଂ ଚାନ୍ଦିରେ ଏହାକୁ ନିର୍ମାଣ କରାଯାଇଛି। ଟ୍ରଫି ମଝିରେ ଥିବା ଗ୍ଲୋବଟି ସୁନାରେ ତିଆରି ହୋଇଛି। ୬୦ ସେଣ୍ଟିମିଟର ଉଚ୍ଚତା ବିଶିଷ୍ଟ ଏହି ଟ୍ରଫି ପ୍ରଥମେ ୧୯୯୯ରେ ନିର୍ମାଣ କରାଯାଇଥିଲା। ଏହି ମ୍ୟାଚ୍ ଜିତିବା ପରେ ଇଂଲଣ୍ଡ ଦଳକୁ ୪୦ ଲକ୍ଷ ଡଲାର ଅର୍ଥାତ୍ ୨୮ କୋଟି ଟଙ୍କା ପୁରସ୍କାର ରାଶି ମିଳିଛି। ସେହିପରି ଉପବିଜେତା ନ୍ୟୁଜିଲାଣ୍ଡ ଦଳକୁ ୧୪ କୋଟି ଟଙ୍କା ପୁରସ୍କାର ଦିଆଯାଇଛି। ସେମିଫାଇନାଲରେ ପରାସ୍ତ ହୋଇଥିବା ଭାରତ ଏବଂ ଅଷ୍ଟ୍ରେଲିଆକୁ ୫-୫ କୋଟି ଲେଖାଁଏ ଟଙ୍କା ମିଳିଛି।
