ଉଦଳା,୩୧ା୭(ଡି.ଏନ.ଏ.): ମୟୂରଭଞ୍ଜ ଜିଲା ଉଦଳା ସ୍ଥିତ ଗୋଷ୍ଠୀ ଶିକ୍ଷା କାର୍ଯ୍ୟାଳୟ (ବିଇଓ ଅଫିସ) ମୁଖ୍ୟ ଫାଟକରେ ୨ଦିନ ହେବ ତାଲା ପକାଇ ଆନ୍ଦୋଳନକାରୀମାନେ ଧାରଣାରେ ବସିଛନ୍ତି । ଏନେଇ ପ୍ରଶାସନ କୌଣସି ପଦକ୍ଷେପ ଗ୍ରହଣ ନ କରି ହାତବାନ୍ଧି ବସିଛି । ଏହି ବ୍ଲକ ଅଧୀନସ୍ଥ ଦରିକୁଲା ପ୍ରାଥମିକ ବିଦ୍ୟାଳୟକୁ ବେଗୁନିଆଡିହା ପ୍ରାଥମିକ ବିଦ୍ୟାଳୟ ସହିତ ମିଶ୍ରଣ କରାଯାଇଥିବାରୁ ଦରିକୁଲା ପ୍ରାଥମିକ ବିଦ୍ୟାଳୟର ଛାତ୍ରୀଛାତ୍ର ଏବଂ ଅଭିଭାବକମାନେ ମଙ୍ଗଳବାରଠାରୁ ବିଇଓ ଅଫିସ୍ ମୁଖ୍ୟ ଫାଟକରେ ତାଲା ପକାଇ ଧାରଣାରେ ବସିଛନ୍ତି । ଦାବି ପୂରଣ ନ ହେଲେ ଧାରଣାରୁ ଓହରିବେ ନାହିଁ ବୋଲି ସେମାନେ ଯିଦରେ ଅଟଳ ରହିିଛନ୍ତି। ଧାରଣା ଯୋଗୁ ବିଇଓ କାର୍ଯ୍ୟାଳୟ ୨ଦିନ ହେବ ସମ୍ପୂର୍ଣ୍ଣ ଅଚଳ ହୋଇ ପଡ଼ିଛି। କାର୍ଯ୍ୟାଳୟର ଅଧିକାରୀ ଏବଂ କର୍ମଚାରୀମାନେ ମୁଖ୍ୟ ଫାଟକଠାରୁ ଘରକୁ ଫେରିଯାଉଥିତ୍ବା ଦେଖିବାକୁ ମିଳୁଛି। ଏ ସମ୍ପର୍କରେ ବିଇଓ ସୁଧାକର ବେହେରାଙ୍କୁ ପଚାରିବାରୁ ସେ ଉପଜିଲାପାଳ ଏବଂ ଶିକ୍ଷା ଜିଲା ଅଧିକାରୀଙ୍କୁ ଅବଗତ କରିଥିବା କହିଛନ୍ତି।
