ପରଜଙ୍ଗ, ୩।୧୧(ଡି.ଏନ.ଏ.) – ଢେଙ୍କାନାଳ ଜିଲା ପରଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଶନିବାର ବନ୍ଧ୍ୟାକରଣ ଅସ୍ତ୍ରୋପଚାରରେ ଗୁରୁତର ତ୍ରୁଟି ହୋଇଛି। ଦୁଇଟି ପରବର୍ତ୍ତେ ଗୋଟିଏ ଷ୍ଟିଚ୍ କରାଯାଇଥିବାରୁ ରକ୍ତସ୍ରାବ ହୋଇ ଜଣେ ମହିଳା ଗୁରୁତର ହୋଇଛନ୍ତି। ସେ ହେଲେ ଆଖୁଆପାଳ ପଞ୍ଚାୟତ ମୋହନପଶି ଗ୍ରାମର ଲାଲମୋହନ ମୁଣ୍ଡାଙ୍କ ସ୍ତ୍ରୀ ତୁଳସୀ। ତାଙ୍କୁ ଚିକିତ୍ସା ପାଇଁ ତାଳଚେର ଡାକ୍ତରଖାନାରେ ଭର୍ତ୍ତି କରାଯାଇଛି। ଡାକ୍ତରଙ୍କ ଅବହେଳାରୁ ଏପରି ତ୍ରୁଟି ହୋଇଥିବା ମହିଳାଙ୍କ ପରିବାର ଲୋକେ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ, ପରଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଶନିବାର ଲାପାରୋସ୍କୋପି ସହାୟତାରେ ସାମୂହିକ ବନ୍ଧ୍ୟାକରଣ ଅସ୍ତ୍ରୋପଚାର କରାଯାଇଥିଲା। ଡାକ୍ତର ଦୀପକ ଦେହୁରୀ ୩୦ଜଣ ମହିଳାଙ୍କ ଅସ୍ତ୍ରୋପଚାର କରିଥିଲେ। ଏହାପରେ ଡାକ୍ତରଖାନା ପକ୍ଷରୁ ଗାଡ଼ିରେ ସମସ୍ତଙ୍କୁ ଘରେ ଛଡ଼ାଯାଇଥିଲା। ତେବେ ଘରେ ପହଞ୍ଚତ୍ବା ପରେ ତୁଳସୀଙ୍କ ପ୍ରବଳ ରକ୍ତସ୍ରାବ ହୋଇଥିଲା। ଏହାପରେ ତାଙ୍କୁ ପୁଣି ଥରେ ପରଜଙ୍ଗ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଥିଲା। ଡାକ୍ତର ଅଜୟ ନାୟକ ତାଙ୍କର ପରୀକ୍ଷା କରିଥିଲେ। ତାଙ୍କ ପେଟରେ ୨ଟି ବଦଳରେ ଗୋଟିଏ ଷ୍ଟିଚ୍ ପଡ଼ିଥିବା କାରଣରୁ ରକ୍ତସ୍ରାବ ହେଉଥିବା ଜଣାପଡ଼ିଥିଲା। ତାଙ୍କୁ ତୁରନ୍ତ ତାଳଚେର ଡାକ୍ତରଖାନାକୁ ୧୦୮ ଆମ୍ବୁଲାନ୍ସରେ ସ୍ଥାନାନ୍ତର କରାଯାଇଛି। ଏ ନେଇ ଡାକ୍ତର ଅଜୟ କୁହନ୍ତି, ଡାକ୍ତରଖାନାରେ ଷ୍ଟିଚ୍ ପକାଇବା ରିସ୍କ ଥିବାରୁ ମହିଳାଙ୍କୁ ତାଳଚେର ରେଫର କରିଦିଆଯାଇଛି। ଡାକ୍ତର ଦୀପକ ଦେହୁରୀ ମହିଳାଙ୍କ ଅପରେଶନ କରିଥିବା ଜନସ୍ବାସ୍ଥ୍ୟ ସମ୍ପ୍ରସାରଣ ଅଧିକାରିଣୀ କବିତା ସ୍ବାଇଁ ସୂଚନା ଦେଇଛନ୍ତି। ଡାକ୍ତର ଦୀପକଙ୍କ ସହ ଯୋଗାଯୋଗ ସମ୍ଭବପର ହୋଇପାରି ନ ଥିବାରୁ ତାଙ୍କ ମତାମତ ମିଳିପାରିନାହିଁ।
