ଖୁଣ୍ଟୁଣୀ,୨୧ା୫(ଡି.ଏନ୍.ଏ.): ବଜ୍ରକାପ୍ତା ଚୋରା ଚାଲାଣ ଅଭିଯୋଗରେ ଖୁଣ୍ଟୁଣୀ ବନ ବିଭାଗ ୨ଜଣଙ୍କୁ ଗିରଫ କରି ଗୁରୁବାର କୋର୍ଟ ଚାଲାଣ କରିଛି। ସେମାନେ ହେଲେ କେନ୍ଦ୍ରାପଡ଼ା ଜିଲା ରାଜକନିକା ଅଞ୍ଚଳର ଚନ୍ଦ୍ରମଣି ଜେନା, କଟକ ଶିଖରପୁର ଅଞ୍ଚଳର ମନୋଜ ଦଳାଇ। ଏମାନଙ୍କ ନିକଟରୁ ଗୋଟିଏ ବଜ୍ରକାପ୍ତା ସହ ଦୁଇଟି ବାଇକ୍ ଜବତ ହୋଇଛି। ସୂଚନା ଅନୁଯାୟୀ, ବଜ୍ରକାପ୍ତା ଚୋରା ଚାଲାଣ ହେଉଥିବା ନେଇ ଗତ ମଙ୍ଗଳବାର ଖୁଣ୍ଟୁଣୀ ବନାଞ୍ଚଳ ଅଧିକାରୀ ମାଗୁଣୀ ଚରଣ ବେହେରା କୌଣସି ସୂତ୍ରରୁ ଖବର ପାଇଥିଲେ। ରାଜକନିକା ଅଞ୍ଚଳର ଚନ୍ଦ୍ରମଣି ଏକ ସ୍କୁଟିରେ କଟକ ଅଭିମୁଖେ ଯାଉଥିବା ବେଳେ ନୂଆପାଟଣା ମଧୁସୂଦନ ସେତୁ ନିକଟରୁ ବନକର୍ମଚାରୀମାନେ ତାଙ୍କୁ ଅଟକାଇବା ସହ ଧରିଥିଲେ। ଏହା ସହ ତାଙ୍କ ସ୍କୁଟିରୁ ଏକ ଜୀବନ୍ତ ବଜ୍ରକାପ୍ତା ଉଦ୍ଧାର କରିଥିଲେ। ସେ ଶିଖରପୁର ଅଞ୍ଚଳର ମନୋଜଙ୍କ ନିକଟକୁ ନେଉଥିବା ବନକର୍ମଚାରୀଙ୍କୁ କହିଥିଲେ। ଏହା ପରେ ମନୋଜଙ୍କୁ ଫୋନ କରି ଡାକିବା ପାଇଁ ଚନ୍ଦ୍ରମଣିଙ୍କୁ ବନକର୍ମଚାରୀ କହିଥିଲେ। ମନୋଜ ସେଠାରେ ପହଞ୍ଚିବା ପରେ ବନକର୍ମଚାରୀମାନେ ମଧ୍ୟ ତାଙ୍କୁ କାବୁ କରିନେଇଥିଲେ। ଏହି ଚଢ଼ାଉରେ ବନାଞ୍ଚଳ ଅଧିକାରୀ ବେହେରାଙ୍କ ସମେତ ଫରେଷ୍ଟର ଅକ୍ଷୟ ପ୍ରଧାନ, ରାକେଶ ଦଳାଇ, ରମାକାନ୍ତ ବଳବନ୍ତରାୟ, ଆଶିଷ ନାୟକ ପ୍ରମୁଖ ସାମିଲ ଥିଲେ।
